Brooke nya siku ari Saksi-Saksi Jehovah ke diau ba Amerika Serikat. Maya pandemik COVID-19 iya nginjil ngena surat. Ninting minggu Brooke nulis mayuh surat. Tang pengudah satu taun setengah semina siku aja ke malas surat iya, lalu orang nya madah ngagai iya, enda ibuh nulis surat agi. Tu ngasuh iya berasai asa ati. Brooke kakang ati sekalika surat ke ditulis iya ulih nulung orang bukai tauka enda.

 Tang nyau kelama, Brooke berandau enggau Kim, siku agi Saksi Jehovah ke gawa ba bank. Kim madah ngagai Brooke pasal randau iya enggau siku orang ke datai ngagai bank. Orang nya madah ngagai Kim iya bisi nerima surat ke ditulis siku ari Saksi-Saksi Jehovah. Nyau kelama Kim nemu surat nya ditulis Brooke. Seminggu udah nya, orang nya datai baru ngagai bank. Maya iya berandau enggau Kim iya nanya enti iya ulih enggau gempuru. (Maya nya gempuru dipejalaika nengah konferen video.)

 Enda lama udah nya, siku agi Saksi Jehovah ke benama David madah ngagai Brooke pasal siku pekereja ke sama gawa enggau iya udah nerima surat ari Brooke. Pekereja nya amat alit ati macha surat ke ditulis iya. Ku iya: “Semua orang patut ngayanka pengibuh ngagai orang bukai baka tu.” David ngena peluang tu kena bekunsika mayuh agi pasal Bup Kudus ngagai orang nya. David mega meri litaricha ngagai orang nya lalu iya nerima enggau gaga ati.

 Saksi-Saksi Jehovah nemu, lebuh sida naburka benih ba pengawa nginjil, sida enda selalu nemu ni bagi benih ke deka matuk. (Pengajar 11:5, 6) Taja pia, pengalaman tu nulung Brooke berasai gaga ati pasal ungkup iya ba pengawa nginjil.—1 Korint 3:6.