Seiku indu ke banama Danielle, seiku Saksi Jehovah ba Afrika Selatan. Iya tetemuka siti bik ke tinggal ba siti Café. Dalam bik nya bisi dumpit ke ngembuan duit, sereta mayuh kad. Danielle keran deka mulaika bik nya. Tang iya semina tetemuka nama seiku lelaki. Danielle nguji talipun ngagai lelaki nya, tang enda mujur. Taja pia, Danielle enda ngetu baka nya aja. Ba bik nya mega bisi surat berubat ari lutur. Iya nguji talipun ngagai endur lutur nya gawa. Orang ke gawa ba klinik nya nyaut talipun ari Danielle, lalu setuju meri iya lumur talipun lelaki ke lenyau bik nya.

 Lelaki nya amat tekenyit nerima talipun ari klinik endur iya berubat, ti madahka Danielle udah tetemuka bik iya ti lenyau, lalu deka mulaika nya baru. Udah nya, Danielle enggau lelaki nya besemaya deka betemu. Maya sida betemu, Danielle enggau apai iya nerangka, bendar sida ngiga lelaki nya. Sida madahka diri Saksi Jehovah, lalu sida bebendar deka nitihka ajar ari Bup Kudus. Ketegal nya meh sida deka ngereja pengelurus dalam semua utai.—Hebrew 13:18.

 Beberapa jam udah nya, lelaki nya nganjung mesej ngagai Danielle sereta apai iya. Sekali agi iya beterima kasih laban udah mulaika bik iya. Ku mesej iya, “Meri besai terima kasih, laban seduai udah bebendar ngiga aku. Aku amat gaga ngelala seduai. Aku deka seruran ingatka pemanah seduai, laban seduai amat manah ati. Nyadika tanda terima kasih, aku deka meri seduai hadiah. Aku nemu, seduai udah mayuh pengawa ke Petara. Seduai amat orang ke manah. Nya ulih dipeda ari pengelurus ke diayanka Danielle. Sekali da agi, terima kasih au! Arapka Petara merekat pengawa kita.”

 Beberapa bulan udah nya, lelaki nya ngiga apai Danielle. Lelaki nya madahka, empai lama ti udah, iya tetemuka dumpit maya iya benung bebelika barang. Maya iya betemu enggau orang ke ngempu dumpit nya, iya mulaika dumpit lalu madahka kebuah iya ngereja nya. Iya becherita, empai lama tadi, bik iya lenyau. Tang bisi orang ke lurus ati mulaikanya baru. Iya madah, “Pengelurus sereta pemanah ati seseiku orang, ulih meransang orang bukai ngereja utai ti sama. Asil iya, tu ulih ngasuh pengidup semua orang nyadi manah agi.”