“Aku enda kala ngambarka aku ulih gawa mayuh ke Jehovah baka tu.” Tu meh utai ke diasaika Gwen ari England lebuh iya ngambarka pasal pengawa iya ba Albania. a

 Gwen nya seiku ari Saksi-Saksi Jehovah ke pindah ngagai Albania kena nulung ngumpul “pengaya” ari semua bansa. (Hagai 2:7) Nama utai ke meransang bala penginjil tu? Nama utai ke patut diubah sida ngambika sida ulih pindah? Lalu nama berekat ke ulih nulung sida betan napi penanggul?

 Semua penginjil ke nulung ba Albania bisi tuju ti sama: Sida rinduka Jehovah lalu deka nulung mayuh orang ngelala iya.

 Sebedau pindah, sida ngaga ubah ngambika ngemansangka pengawa nginjil sida, lalu tu nulung sida mutarka penanggul lebuh pindah ke menua bukai. Gwen madah: “Keterubah iya, aku enggau raban ke ngena jaku bansa Albania ba menua aku empu. Pengudah nya aku ngagai konvensyen ba Albania. Udah nya, aku kin baru kena belajarka bansa jaku tu enggau manah agi.”

 Lebuh Manuela beumur 23 taun, iya pindah ngagai endur ti bukai ba menua asal iya empu, ba Itali, kena nulung ba siti eklisia ti mit. Iya madah: “Aku gawa ba dia pengelama empat taun. Lalu aku nemu ba Albania begunaka mayuh penginjil. Nya alai, aku mutuska diri ngerintis ba dia pengelama beberapa bulan.”

 Federica semina beumur tujuh taun lebuh iya ninga riput ari Albania ba konvensyen. Ku iya: “Pencheramah madah, penginjil ba Albania bisi mayuh pemelajar Bup Kudus, sereta orang ke minat datai ke gempuru. Aku madah ngagai apai indai, aku deka ngagai Albania. Pemutus aku ngasuh sida tekenyit, tang apai aku madah, ‘Besampi pasal nya, lalu enti tu peneka Jehovah, Iya deka ninga.’ Beberapa bulan udah nya, kami sebilik dikangau gawa ba Albania!” Diatu, Federica udah kawin enggau Orges. Sida gawa penuh jam ke Jehovah ba Albania.

 Pengudah Gianpiero pinchin, iya pindah ngagai Albania enggau bini iya Gloria. Ku iya: “Kami ngemesaika bala anak lelaki kami ba Itali. Tiga iku ari sida pindah ke menua bukai ke begunaka penginjil. Kami diperansang ari artikel Menara Jaga ‘Bisakah Saudara Melangkah ke Makedonia?’ b Kami berandau pasal chara ngena duit pinchin kena gawa ba Albania.”

 Sida ke pindah ngagai endur ti begunaka bantu patut ngaga pelan enggau manah lalu ngaga ubah ngambika ulih pindah. (Luke 14:28) Siti ari utai ke patut diperundingka sida, sida patut ngiga chara kena ngidupka diri. Lebuh Gwen ke dipadah tadi agi ba England, keterubah iya pindah ngagai rumah menyadi indu iya ngambika iya ulih nyimpan duit. Sophia enggau Christopher ke mega datai ari England ngenang: “Kami nyual kerita enggau sekeda perabot kami. Kami ngarapka diri ulih diau ba Albania abis nadai setaun.” Tang, sida ulih diau dia jauh lama agi ari diperundingka sida.

 Sekeda penginjil ke diau ba Albania pengelama beberapa bulan pulai baru ngagai menua sida empu kena kereja lalu nyimpan duit. Pengudah nya, sida pulai baru ngagai Albania. Tu meh utai ti digaga Eliseo enggau Miriam. Eliseo nerangka: “Kampung Miriam nya endur ke mayuh pelancong ba Itali. Ba dia, senang ngiga kereja sementara. Kami ngagai endur nya lalu gawa dia pengelama tiga bulan maya musin angat, lalu ngena duit simpan nya kena diau ba Albania pengelama semilan bulan. Kami ngereja tu pengelama lima taun.”

 Sida ke pindah ngagai endur ti begunaka bantu patut nelebaka diri enggau gaya pengidup ti baru. Tang jaku lalau sereta teladan bala Saksi ke diau dia nulung sida mutarka penanggul. Sophia ke dipadah tadi madahka: “Maya musin chelap ba Albania rumah kami chelap agi ari rumah ke ba menua asal kami. Aku berengkah begari nitihka chara bala menyadi indu ba dia.” Grzegorz enggau bini iya Sona datai ari Poland nulung ba Prizren, kampung ti lawa ba Kosovo. c Ku Grzegorz madahka: “Penginjil ba ditu amat baruh ati, manah sereta sabar! Sida nulung kami belajarka bansa jaku sereta utai bukai. Ngambika chunto, sida nunjukka kami endur bebelika barang enggau rega ti manah, lalu sida nerangka chara meli barang ba makit.”

 Sida ke pindah ngagai endur ke begunaka bantu bulih penguntung ari kaul ti rapat enggau bala menyadi sereta ngelala gaya pengidup sida. Sona nerangka: “Aku udah meda kuasa pengerindu Jehovah ngubah pengidup orang. Bala menyadi ngemansangka pengarap aku, laban aku meda chara sida ngubah utai ke dipechaya enggau gaya pengidup sida lebuh sida belajarka pasal Jehovah. Ba eklisia, kami ngasaika diri bisi ungkup sereta bisi utai ke ulih dikereja. Bala menyadi ke enggau kami gawa nyadi kaban.” (Mark 10:29, 30) Ku Gloria: “Aku nemu mayuh menyadi indu ke betan lebuh disakal orang ke enggai meda Saksi-Saksi Jehovah. Tu negu ati aku lebuh meda pengerindu sida ngagai Jehovah.”

 Sida ke pindah ngagai endur ke begunaka bantu bisi peluang belajarka utai ti penting ke enda kala dipelajarka sida ba menua diri empu. Ngambika chunto, lebuh sida ngereja utai ke enda kala digaga sida, sida ulih ngasaika pengaga ati ari Jehovah. Stefano nyimpulka: “Ba menua aku empu aku suah nginjil ngena interkom, lalu enda ulih bejaku lama. Tang orang ba Albania rindu bejaku lama kelebih agi maya ngirup kupi. Keterubah iya, aku berasai malu lalu enda nemu utai ke deka disebut. Taja pia, nyau kelama aku belajar begulai enggau orang bukai lalu diatu aku rindu berandau enggau sida. Pengawa nginjil aku amat ngemuaska ati.”

 Leah enggau laki iya William pindah ngagai Albania ari Amerika Serikat. Ku iya: “Nginjil ba menua tu muka runding enggau ati kami. Kami belajar pasal gerah jari nerima temuai, ngayanka basa, sereta ngembuan kaul ti manah enggau orang bukai. Kami mega udah belajar pasal chara nginjil ti baru, nerangka Bup Kudus sereta mansutka runding ngagai pangan diri.” Ku William: “Mayuh orang ke ngelawa Albania rindu meda pantai ti lawa. Aku empu rindu hiking ba endur ti bebukit ba Albania. Tang utai ke pemadu dikerinduka aku nya, iya nya orang ke diau ditu. Mayuh kampung ba endur kami nginjil semina diabas maya kimpin spesial aja. Lebuh kami kin, kekadang sepemanjai hari nya kami berandau enggau beberapa iti ruang bilik aja.”

 Tang kelebih agi, sida ke pindah tu gaga ati agi lebuh orang nerima Berita Manah. (1 Tesalonika 2:19, 20) Laura, ke pindah ngagai Albania maya agi biak madahka: “Aku kala gawa ba Fier. Dalam timpuh dua taun setengah, bisi 120 iku penginjil ti baru! Aku belajar enggau 16 iku ari sida!” Seiku menyadi indu ke benama Sandra ngenang: “Aku nginjil ngagai seiku indu ke gawa ba makit. Iya nyadi seiku ari Saksi lalu pindah ngagai kampung iya empu. Kepenudi aku bejaku enggau iya, iya bisi 15 iku pemelajar Bup Kudus!”

 Sekeda sida ke udah lama gawa ba Albania agi gaga ati enggau pengawa sida. Sida alit ati lebuh nemu orang ke ditemu sida maya nginjil suba diatu udah nerima pemendar. (Pengajar 11:6) Christopher ke dipadah tadi madahka: “Aku tetemuka seiku lelaki ke kala enggau aku belajar suba lebuh aku keterubah pindah ngagai Albania. Aku gaga ati laban iya agi ingat randau kami pasal Bup Kudus suba. Diatu, seduai bini iya udah dibaptisa.” Federica ke dipadah tadi madahka: “Ba siti eklisia, seiku menyadi indu mansang ngagai aku lalu nanya kati aku ingatka iya. Iya madah aku kala nginjil ngagai iya semilan taun suba. Pengudah aku pindah ngagai endur bukai iya berengkah belajar Bup Kudus lalu ngaga pemansang nyentukka dibaptisa. Aku berunding taun keterubah kami ba Albania, nadai mayuh asil ti manah. Tang aku salah!”

 Bala menyadi ke pindah ngagai Albania tauka Kosovo gaga ati meda Jehovah merekatka pengawa sida, lalu meri sida pengidup ti ngemuaska ati. Pengudah betaun-taun ba Albania, Eliseo ngelansa peneleba iya. Ku iya: “Mensia senang ditipu lalu pechaya sida deka idup senang enti nitihka runding dunya tu. Tang, tu enda betul. Iya ke amat, prinsip Jehovah ngasuh pengidup kitai bisi tuju sereta likun. Pengawa nginjil ba endur ke begunaka bantu nulung aku mengkang ingatka nya. Aku ngasaika diri ulih diguna Jehovah. Aku bisi kaban ti bendar ke sama tuju ba pengidup.” Sandra setuju. Ku iya: “Lebuh aku pindah ngagai endur ke begunaka bantu, aku ngasaika Jehovah meri aku peluang ngereja utai ke dikedekaka aku—nyadi pengerintis seberai tasik. Aku enda kala nesal pindah ngagai Albania. Aku amat gaga ati.”