Aku ada ba Tiranë, indu nengeri Albania. Apai aku seiku lelaki ti lurus, sereta iya bendar gawa kena ngidupka kami sebilik. Tang kami selalu enda chukup duit. Maya agi mit, aku tusah ati enggau penyeranta kami. Aku nadai kasut, sereta enda chukup pemakai.

 Taja agi mit, aku udah berengkah ngenchuri. Ba runding aku, tu meh chara aku nulung kami sebilik. Udah nya aku ditangkap polis. Kena taun 1988, maya aku beumur 14 taun, apai nganjung aku ngagai sekula pemulihan. Aku dia pengelama dua taun, lalu belajarka pengawa welding. Lebuh aku pansut ari sekula nya, aku deka nyadi orang ke lurus, tang aku nadai bulih kereja. Ketegal penanggul politik ti balat, mayuh orang ba Albania nadai kereja. Tu ngasuh aku asa ati, nyadi aku ngiga bala kaban aku ke lama, lalu berengkah ngenchuri baru. Udah nya, semua kami sekaban ditangkap lalu dijil pengelama tiga taun.

 Pengudah pansut ari jil, aku ngereja pengawa jenayah baru. Ekonomi ba Albania amat jai maya nya. Nambahka agi, penyarut nyadi ba menua nya. Maya tu, aku ngumpul mayuh duit asil ari pengawa jenayah ke dikereja aku. Lebuh kami ngerumpak senyata, dua iku kaban aku ditangkap. Aku ngerarika diri ngagai menua bukai ngambi enda dijil lama. Aku mai bini aku Julinda sereta anak lelaki kami ke agi mit.

 Tu ngujungka kami diau ba England. Aku deka ngepunka pengidup ti baru enggau bini sereta anak aku. Tang ulah aku ke lama datai baru. Aku berengkah baru enggau pengawa jenayah. Aku nyual dadah lalu bulih mayuh duit.

 Nama asai ati Julinda lebuh aku nyual dadah? Julinda nerang: “Lebuh aku ba Albania, aku deka pansut ari pemerinsa ketegal seranta. Nyadi, aku sanggup ngereja sebarang utai ngambi ulih idup nyamai. Ba runding aku, duit ulih mutarka semua penanggul aku. Nya alai, aku nyukung Artan taja pan iya nipu, ngenchuri, sereta nyual dadah. Aku nyukung semua pengawa iya, asal meh bulih duit.”

 Kena taun 2002, pengidup kami berubah. Semua pelan kami pasal duit sereta utai ke deka digaga kami puntan. Sekali agi aku ditangkap lalu dijil, laban dadah ke dikembuan aku udah ngelui ari ke patut.

 Pemendar ari Bup Kudus ngubah pengidup aku, indah sebedau aku empu nemu nya. Kena pun taun 2000, Julinda betemu enggau Saksi-Saksi Jehovah, lalu berengkah belajarka Bup Kudus. Ba aku, belajarka Bup Kudus nya enda ngerinduka ati, tang Julinda rindu. Iya madah: “Aku dibesaika ba ruang bilik ti bepengarap, nyadi aku bebasaka Bup Kudus. Aku selalu deka nemu nama utai ke diajar dalam Bup Kudus. Nyadi, aku amat gagit belajar enggau bala Saksi Jehovah. Ba aku, mayuh ajar Bup Kudus nya ulih dikena. Utai ke dipelajar aku, ngasuh aku berubah ba pengidup. Tang duit tetap lumur satu ba aku. Runding aku berubah lebuh Artan ditangkap. Maya nya aku sedar, utai ke diajar dalam Bup Kudus pasal duit nya endang amat. Kami bendar begigaka duit, tang nya enda meri kami pengelantang. Nyadi aku nemu, aku patut nitihka ajar Bup Kudus.”

 Kena taun 2004, aku pansut ari jil lalu pulai baru bejualka dadah. Tang runding Julinda udah berubah, lalu jaku iya amat negu ati aku. Ku iya, “Aku enggaika duit nuan agi. Aku deka ngembuan kaul ti manah enggau laki aku, lalu aku deka anak aku ngembuan kaul ti manah enggau apai sida.” Aku tekenyit, tang utai ke disebut iya endang amat. Betaun-taun aku jauh ari diri sebilik. Aku pan berunding pasal pemerinsa ke diasaika aku ketegal bendar ngulihka duit enggau chara ti salah. Nyadi aku ngaga pemutus, ngubah pengidup aku, lalu badu begulai enggau bala kaban aku ke suba.

 Ubah ti besai ba aku nya, maya aku datai ngagai gempuru Saksi-Saksi Jehovah enggau bini anak aku. Aku amat rindu meda orang ke ditemu aku ba dia. Sida amat pengerah sereta enda bula manah. Tu ngujungka aku berengkah belajarka Bup Kudus.

 Utai ke dipelajar aku ari Bup Kudus nya, “pengangkun ke duit nya pun semua macham penyai. . . . sekeda orang limpang ari pengarap, lalu ngachuk sida ngena mayuh macham pemedis.” (1 Timoti 6:9, 10) Ari pengidup aku, ulih meda pengamat jaku Bup Kudus tu! Aku amat nesal ke ulah diri, laban udah ngemedis kami sebilik sereta aku empu. (Galatia 6:7) Lebuh aku belajar pasal baka ni Jehovah enggau Anak Iya Jesus rinduka kami, aku berengkah ngubah ulah diri. Aku enda kelalu berundingka diri empu. Tang aku berundingka orang bukai, lalu aku berengkah ngena mayuh awak begulai enggau kami sebilik.

 Ayat Bup Kudus tu nulung aku: “Anang angkunka duit. Kita patut nemu puas ati ke utai ti dikemisi kita.” (Hebrew 13:5) Diatu, runding sereta ati aku berasai nyamai. Tu meh ke ngasuh aku gaga ati. Tikah aku mega tegut agi, lalu kaul kami sebilik rat agi.

 Suba, aku ngumbai pengaya nya meri pengelantang. Tang diatu aku sedar, jenayah sereta angkunka duit nya mai mayuh pemedis. Kami enda kaya, tang aku ngasaika, kami udah tetemuka utai ti jauh beguna agi, iya nya kaul ti rapat enggau Petara Jehovah. Kami sebilik bulih pengelantang ti bendar, laban ulih nyembah Iya begulai.