Aku diadaka ba Ciudad Obregón mua ke begian utara Mexico. Apai indai aku bisi sembilan iku anak, lalu aku anak ke lima. Kami diau enda jauh ari bandar, endur nya nyamai, sereta apai aku bisi sebuah ladang ti mit ba dia. Diri sebilik kami idup enggau gaga ati. Tang sayau, ladang kami dirusakka ribut taufan lebuh aku beumur lima taun, lalu kami patut pindah ngagai endur bukai.

 Apai aku majak kaya, tang iya mega nyadi pengirup. Utai tu mai penusah ngagai ruang bilik iya, pia mega enggau kami ke anak iya. Kami berengkah nginsap insap ke dichuri ari apai. Keterubah aku mabuk, maya aku beumur enam taun. Enda lama udah nya, apai indai aku beserara, lalu ulah aku nyau majak jai.

 Indai aku mai kami diau enggau iya begulai enggau seiku lelaki bukai. Lelaki nya enda meri indai aku duit, lalu gaji indai endang enda chukup kena nupi semua kami. Nyadi, aku enggau bala menyadi ngereja sebarang pengawa ke ulih kami. Tang, duit ke diulih nya agi enda chukup kena nampung utai guna kami ninting hari. Aku ngilat kasut enggau nyual ruti, surat khabar, chewing gum, sereta utai bukai. Aku mega segau-segau ba sebelah kaki lima ngiga pemakai ari tong sampah ba luar rumah orang kaya.

 Lebuh aku beumur 10 taun, seiku lelaki mai aku bekereja enggau iya ba endur ngumpul sampah. Aku nerima pengawa nya, lalu ngetu sekula, sereta ninggalka rumah. Lelaki nya meri aku gaji penyampau 10 Peso Mexico (kira-kira RM2.10) sehari. Ninting hari, iya meri aku pemakai ke diulih ari endur muai sampah. Aku diau ba sebuah pondok ke digaga aku empu ari utai ke dibuai orang. Orang ke ngelingi aku suah ngena jaku ti kamah, lalu sida udah biasa enggau pengawa seks ti enda bemoral. Mayuh ari sida gian dadah enggau ai bisa. Nya meh maya ti amat jai ba pengidup aku. Aku nyabak ninting malam, lalu gegitik ketegal takut. Aku berasai amat malu laban aku seranta sereta nadai besekula. Aku diau ba endur muai sampah pengelama tiga taun, nyentukka aku pindah ngagai menua bukai dalam Mexico. Ba dia, aku bekereja ba ladang, ngumpul bungai enggau kapas, ngumpul tebu, enggau ngetau kentang.

 Empat taun udah nya, aku pindah baru ngagai Ciudad Obregón. Aku diau ba rumah ibu aku, iya nya seiku manang. Aku berengkah bisi mimpi enda lantang, lalu nyadi balat tusah ati nyentukka deka munuh diri. Bisi sekali maya malam hari, aku besampi ngagai Petara. “Tuan, enti nuan bisi, aku deka ngelala nuan lalu nyembah nuan belama iya. Enti bisi pengarap ti bendar, aku deka nemu mayuh agi.”

 Aku suah beminat pasal pengarap. Kenyau ari mit, aku ngagai mayuh gerija, tang semua nya ngelebuka aku. Nadai siti pan ari sida ngajar aku pasal Bup Kudus tauka ulih ngemuaska utai ke diguna aku ba pengarap. Sekeda gerija kelalu ngemeratka duit, lalu bisi mega ngawakka bala sida ngereja ulah seks ti enda bemoral.

 Lebuh aku beumur 19 taun, seiku ari ipar lelaki aku bekunsika pasal nama utai ke didinga iya ari Saksi-Saksi Jehovah. Sida ngayanka nama utai ke dipadah Bup Kudus pasal ngena patung. Iya macha ke aku Pemansut 20:4, 5. Ayat tu madahka kitai enda patut ngaga engkeramba. Ayat 5 nyebut, ‘Anang meremi ngagai engkeramba, tauka nyembah sida, laban Aku tu Jehovah, Petara ti chemburu.’ Udah nya, ipar lelaki aku nanya, “Enti Petara ngena patung ngaga pengawa ajih tauka deka kitai ngena patung ba pengarap, nama kebuah Petara nagang pengawa tu?” Tanya nya ngasuh aku berunding. Udah nya, kami neruska randau pasal topik Bup Kudus. Aku amat rindu enggau randau nya, nyentukka aku enda sedar jam nyau lalu.

 Bisi sekali, iya mai aku ngagai gempuru Saksi-Saksi Jehovah. Aku berasai alit ati enggau utai ke dipeda sereta didinga aku ba dia. Indah orang ke biak mega bisi begian dalam program nya lalu bejaku enggau lanchar ari panggau! Aku berunding, ‘Sida bulih ajar ti amat manah ba ditu!’ Taja pan buk aku panjai sereta chara aku begari enda menuku, Saksi-Saksi Jehovah agi ngelaluka penatai aku enggau manah. Siti ruang bilik, indah mai aku makai malam enggau sida pengudah gempuru!

 Ketegal belajarka Bup Kudus enggau bala Saksi, aku nemu Petara Jehovah nya seiku Apai ti bepengerindu. Iya ibuhka kitai enda ngira kitai seranta tauka kaya, besekula tauka enda. Pangkat tauka bansa enda dikemeratka Petara. Iya enda bechiping. (Kereja Rasul 10:34, 35) Pengujung iya, utai ke diguna aku ba pengarap pan ulih dipuaska. Pengidup aku enda puang agi.

 Pengidup aku nyau majak manah enggau ngenyit! Aku ngetu nginsap, badu mabuk, enggau badu ngena jaku ti kamah. Asai ati ti bedendam ke diasaika aku kenyau ari mit, berengkah lenyau. Pia mega, mimpi ke enda lantang nadai ngachau aku agi. Aku mega mujur mulaika baru asai ati ti pechaya diri ke udah anchur, ketegal penusah ke ditapi maya agi mit sereta nadai besekula.

 Diatu aku bisi seiku bini ke rinduka Jehovah, lalu iya mayuh nulung aku. Diatu, aku gawa nyadi tuai ti ngabas Saksi-Saksi Jehovah. Aku ngabas mayuh eklisia kena meransang sereta ngajar bala menyadi Kristian aku. Aku beterima kasih laban bulih sekula ti pemadu manah ari Petara, lalu bulih pengelantang ari Bup Kudus. Aku enda agi malu kediri empu.