Aku ada ba Gomba Uganda. Mayuh ari orang ke diau ba endur tu amat seranta. Ba endur aku diau, nadai karan. Nya alai, maya malam hari, kami bekenaka lampu pelita.

 Apai indai aku pindah ari Rwanda ngagai Uganda. Sida gawa nyadi orang ke betanam, iya nya kupi enggau pisang. Ari pisang ke ditanam sida, sida ngasilka waragi, iya nya siti bansa ai bisa ke amat tebilang ba Uganda. Sida mega betupika manuk, kambing, babi sereta chapi. Ketegal adat sereta chara aku dibesaika, aku ngumbai, bini patut tunduk mati ngagai laki, lalu nadai ulih mansutka penemu diri.

 Maya aku 23 taun, aku pindah ngagai Rwanda. Dia, aku rindu ngagai kelab malam begulai enggau bala kaban. Bisi siti kelab malam ke selalu dituju aku. Ketegal suah kia, nyentukka aku ulih tama enda bebayar. Aku amat rindu meda cherita ke kasar sereta jai. Asil ari pemerindang ke dipilih, aku pan nyadi kasar sereta pemabuk.

 Kena taun 2000, aku diau enggau seiku indu ke benama Skolastique Kabagwira. Kami bisi tiga iku anak. Ketegal chara aku dibesaika enda manah, aku dekaka iya nundukka pala tiap kali iya minta sesiti utai ari aku. Aku mega ngumbai, tiap iti utai ke dikemisika kami, nya enggi aku, lalu aku aja bisi hak ngena nya enggau peneka ati. Nambahka nya, aku mega selalu pansut maya malam hari, lalu pulai pukul tiga pagi enggau mabuk. Enti aku udah datai ba mua pintu, lalu Skolastique lubah muka pintu, aku sigi malu iya.

 Maya nya aku gawa nyadi manager ba siti kompeni jaga. Gaji aku mega besai. Bisi sekali, Skolastique mai aku enggau iya ngagai gerija Pantekosta. Iya ngarapka aku ulih berubah enti aku kin. Tang aku nadai minat. Indah, aku gila indu bukai. Ketegal ulah ti kasar sereta balat nelihka ati Skolastique, iya nabanka tiga iku anak kami, lalu diau enggau apai indai iya.

 Seiku kaban rapat kami ngelalau aku. Iya meransang aku begulai baru enggau Skolastique. Iya ngingatka aku, bala anak kami begunaka apai. Nya alai, kena taun 2005, aku ngetu ngirup ai bisa, lalu ninggalka indu ke enggau aku gila, pulai baru ngagai Skolastique. Ba taun 2006, aku ngaga surat kawin enggau Skolastique. Tang, aku agi kasar enggau iya.

 Ba taun 2008, seiku Saksi Jehovah ke benama Joel datai ke rumah kami. Aku ningaka berita ke dibai iya. Dalam beberapa bulan, iya enggau seiku Saksi Jehovah ke bukai ti benama Bonaventure datai ngabas aku, lalu belajarka beberapa iti topik dalam Bup Kudus. Aku nanya mayuh utai, kelebih agi pasal bup Pemandang. Tang iya ke bendar, aku semina deka ngiga penyalah sida. Ngambika chunto, aku nanya nama kebuah Saksi Jehovah ngumbai ‘raban ti besai’ ba bup Pemandang 7:9 nya deka idup ba dunya, tang ba ayat nya udah nyata madahka sida ‘bediri di mua kerusi diraja enggau di mua Anak Domba, iya nya Jesus Kristus. Joel nyaut tanya aku enggau sabar. Chunto iya, iya nerangka Isaiah 66:1, ke nyebut Petara ngumbai dunya tu ‘nyadika pelasar kaki iya.’ Nyadi, ‘raban ti besai’ nya diau ba dunya maya sida bediri di mua kerusi diraja Petara. Aku mega macha Masmur 37:29, ti madahka, orang ti lurus deka diau ba dunya tu belama iya.

 Nyau pengujung iya, aku deka belajarka Bup Kudus enggau sida. Nya alai, Bonaventure ngajar Bup Kudus ngagai kami duai bini aku. Pengudah belajar, ati aku pan tekuing deka berubah. Aku belajar ngayanka basa ngagai bini aku. Aku mega enda ngasuh iya nundukka pala agi, maya iya deka bejaku tauka minta sesiti utai ari aku. Aku ngumbai semua utai ke dikemisi kami, enggi semua kami, ukai ke aku aja. Aku mega ngetu meda cherita ti kasar. Nya enda senang ba aku. Aku patut enggau naka ulih nagang diri sereta baruh ati.

 Beberapa taun sebedau nya, aku ngasuh anak tuai kami ke benama Christian, diibun diri sebilik kami ba Uganda. Tang pengudah macha bup Ulang Adat 6:4-7, aku nemu, Petara meri apai indai tanggung pengawa ngemesaika anak, nyengkaum ngajar sida pasal Bup Kudus. Maya kami ngambi Christian pulai, ruang bilik kami berasai amat gaga!

 Ari Bup Kudus aku belajar, Jehovah nya Petara ti pengampun. Nya alai, aku andal, semua pengawa jai aku ke suba udah diampunka. Aku amat gaga ati maya Skolastique pan belajar. Kami nyerahka diri ngagai Jehovah, lalu dibaptisa kena 4 Disember 2010. Diatu, kami pechayaka pangan diri, lalu ngasaika mayuh penguntung pengudah nitihka lalau Bup Kudus ba ruang bilik kami. Bini aku mega amat gaga sereta beterima kasih, laban aku ukai baka aku ke suba. Enti udah abis kereja, aku terus pulai ke rumah. Aku mega enda kasar agi enggau iya. Aku udah ngetu ngirup ai bisa, lalu enda kasar baka suba. Kena 2015, aku dipilih nyadi tuai gempuru, lalu nulung nyaga eklisia. Ari lima iku anak kami, tiga iku nya udah dibaptisa.

 Maya keterubah belajarka Bup Kudus enggau Saksi-Saksi Jehovah, aku enda tekala nya pechayaka sida. Tang, utai ke ngalitka ati aku, sida selalu nyaut bepelasarka Bup Kudus. Aku enggau Skolastique mereti, orang ke ngaku diri nyembah Petara patut ngereja peneka Iya, ukai semina ngereja utai kedeka diri aja. Lalu utai ti pemadu dikerinduka aku, Jehovah deka nyadi Pangan aku, lalu aku pan ulih nyadi sebagi ari ruang bilik gerempung Iya. Lebuh aku ngenang baru pengidup diri, aku amat andalka tulung ari Petara. Sapa-sapa ke deka ngelantangka Petara, tentu ulih nyadi orang ke menyana.