Aku dibesaika ba ruang bilik Katolik ba Rochester, New York. Apai indai sarak maya aku beumur 8 taun. Hari Satu nyentukka Hari Lima aku begulai enggau indai ba endur orang ke biasa aja. Tang ujung minggu, aku begulai enggau apai ba endur orang kaya. Maya aku meda indai bebendar ngemesaika enam iku anak, aku pan bisi pengingin deka nyadi kaya ngambi ulih nulung kami sebilik.

 Apai deka meda aku mujur ba pengidup. Nyadi, iya ngatur ngambika aku enggau kursus ba siti hotel ke tebilang. Aku amat gaga, lalu ngumbai Petara udah nyaut sampi aku ngambi idup kaya sereta lantang. Pengelama lima taun, aku belajar pasal chara pengurusan hotel, undang-undang bisnis, enggau pasal akaun. Aku mega gawa ba Kasino, Las Begas Nevada.

 Maya aku beumur 22 taun, aku nyadi penulung ke naib presiden ba hotel kasino. Ba mata orang mayuh, aku tu kaya sereta tebilang. Aku selalu makai pemakai ti pemadu manah sereta ai bisa ti mar. Mayuh bala kaban aku madah: “Kingatka, duit meh utai ti pemadu beguna ba dunya.” Ba sida, duit meh resia pengelantang ti bendar.

 Ba pengawa aku, aku selalu begulai enggau orang kaya ari Las Vegas ke bejudi. Taja pan sida kaya, tang sida nadai pengelantang. Indah, aku empu pan berasai puang ba pengidup. Mayuh agi duit, balat agi pengirau aku. Aku enda ulih tinduk jenak, sereta enda gaga ati. Aku berengkah berunding, “Nama guna aku idup?” Runding aku charut. Aku nanya Petara: “Dini endur aku bulih pengelantang ti bendar?”

 Dalam urung maya nya, dua iku menyadi tuai aku ke indu, Saksi-Saksi Jehovah. Seduai iya pan pindah ngagai Las Vegas. Taja pan aku enggai macha litaricha ke diberi sida, tang aku setuju begulai enggau sida macha Bup Kudus. Ba Bup Kudus aku empu, jaku ke disebut Jesus bewarna mirah. Ketegal aku semina nerima jaku Jesus, sida pan semina ngemeratka jaku Jesus maya berandau enggau aku. Kekadang, maya aku kediri, aku pan macha Bup Kudus.

 Mayuh ayat dalam Bup Kudus ngasuh aku tekenyit, laban enda sama enggau utai ke dipelajarka aku ari gerija. Chunto, Jesus enda ngasuh kitai nandu sampi baka orang parisi, laban sida ngumbai sampi ti panjai didinga Petara. (Matthew 6:7) Tang, seiku paderi meri aku gambar Jesus. Iya madah, enti aku meda gambar nya lalu nyebut sampi Apai kami, sereta besampi ngagai Maria 10 kali, Petara tentu meri aku duit. Tu ngasuh aku berunding, “Enti baka nya, ukai enda aku benung nandu sampi?” Kelimpah ari nya, Jesus kala madah: ‘Anang ngumbai orang di dunya tu Apai, laban kita semina bisi siku aja Apai, Iya ke di serega.’ (Matthew 23:9) Sekali agi aku berunding, “Enti pia, nama kebuah aku enggau orang Katolik ke bukai ba gerija ngangauka paderi nya ‘Father’ [tauka ‘Apai’]?”

 Maya aku macha bup James dalam Bup Kudus, aku pan berundingka pengawa aku ngelamatu. James bagi 4 madah: ‘Kati kita enda nemu, enti kita bepangan enggau dunya kita bemunsuh ngelaban Petara?’ (James 4:4) Aku balat agi tekenyit maya macha ayat 17 ti madah: “Nya alai, barang sapa nemu utai ti patut dikereja diri, tang enda ngereja iya, bedosa.” Pengudah nya aku lalu madah ngagai dua iku madi tuai aku ke saksi, aku deka badu gawa ba kasino, laban aku enggai besangkut-paut enggau pengawa judi sereta pengamu agi.

 Aku mega bisi juluk ati deka ngerapatka kaul enggau Petara sereta diri sebilik kami. Nyadi, aku berengkah idup enggau penumbas iya. Keterubah, enda senang. Chunto, aku dikangauka gawa ba siti kasino, lalu gaji iya amat besai. Sida deka meri aku gaji dua tauka tiga kali lipat ari gaji aku ke diatu. Tang aku besampi pasal utai tu, lalu mutuska badu aripengawa nya. Udah nya, aku diau enggau indai, lalu muka siti bisnis ke mit, iya nya laminate menu ari restoran.

 Taja pan ajar Bup Kudus udah negu ati aku, lalu ngasuh aku ngemeratka utai ti beguna agi ba pengidup, tang aku agi enggai datai begempuru. Nyadi, madi tuai aku ke saksi nanya, kati bisi utai ke ngasuh aku tusah deka nerima saksi. Aku madah: “Petara kita ngasuh ruang bilik bepechah-belah. Aku semina ulih begulai enggau diri sebilik maya Krismas tauka ngintu hari pengada. Tang kita enda nyambut nya.” Udah nya, seiku ari madi tuai aku nya nyabak lalu nanya aku, “Baka ni enggau hari bukai deh? Kami seruran ngelaluka penatai nuan. Tang nuan empu ke deka agi datai maya bisi pengerami.” Jaku iya amat negu ati aku, lalu ngasuh aku nyabak.

 Lebuh aku sedar, Saksi-Saksi Jehovah amat sayauka diri sebilik sereta kaban belayan, aku enggau naka ulih terus datai begempuru. Ba din, aku bekelala enggau Kevin, seiku pengajar Bup Kudus ke bepeneleba. Iya meh orang keterubah ngajar aku Bup Kudus.

 Kevin enggau bini iya idup enggau penumbas iya. Sida ngena mayuh awak ngajar orang bukai Bup Kudus. Duit ke dikembuan sida, chukup melanja pejalai sida ngagai Afrika enggau Amerika Tengah. Din, sida nulung ba pengawa nirika bengunan pampang opis Saksi Jehovah. Sida berupai gaga sereta rinduka pangan diri. Tu ngasuh aku berunding: “Aku pan dekaka pengidup ti lantang baka sida.”

 Pengudah Kevin nunjukka video pasal pengidup pengerintis seberai tasik, aku pan bisi ati ba pengawa nya. Kena taun 1995, pengudah belajarka Bup Kudus pengelama enam bulan, aku pan dibaptisa. Diatu, sampi aku ukai minta pengaya. Tang aku besampi, “Anang meh meri aku penyeranta tauka pengaya.”—Jaku Dalam 30:8.

 Diatu, baru meh aku kaya. Ukai kaya ba duit, tang kaya ba pengarap. Aku betemu enggau Nuria ba Honduras. Kami jadi, lalu nyadi pengerintis seberai tasik ba Panama sereta Mexico. Jaku Bup Kudus tu endang amat: ‘Berekat ti diberi Jehovah, ngasuh kaya, lalu Iya nadai nambahka ati ti tusah enggau pengaya nya.’—Jaku Dalam 10:22.