•  Milih pemakai ke diempa nuan amat beguna

•  Empat chara kena nyaga pemeresi ba pemakai

•  Tiga chara diet ti manah

•  Runding ti salah

 Siti ari utai kena nyaga pengerai diri ke patut dikemeratka, milih pemakai ke diempa nuan. Enti nuan nyaga pemeresi pemakai sereta diet ti manah, nuan ulih gerai agi. Enti enda, tu ulih ngachau pengerai nuan, sempama minyak kerita ke luya lalu ngachau enjin kerita. Keterubah, nuan engka nadai ngasaika penanggul tu, tang seraya umur mansang tuai, nuan ulih ngasaika pengerai diri majak jai.—Galatia 6:7.

 Gerempung Pengerai Entarabansa (WHO) madahka, “ba tiap iti menua di serata dunya, endang bisi penanggul milih pemakai ti manah ke pengerai.” Tu ukai semina ketegal kurang zat ba pemakai, tang pia mega penanggul ba berat tubuh ti ngelui ari ke patut tauka obesiti. Enti nuan suah makai pemakai ti enda manah, nuan senang agi bulih penyakit jantung, strok, diabetes, enggau kanser. Nitihka pansik, baru-baru tu abis nadai 11 juta pemati nyadi, ketegal milih pemakai ti enda manah ke pengerai. WHO nyangka, lebih ari seribu iku orang ke mati ninting hari, lalu beratus juta orang ke bisi penanggul ba pengerai ketegal pemakai ti enda beresi.

 Bup Kudus meransang kitai, anang kelalu enda betatika lalau tu. Indah Bup Kudus ngajar, Petara nya “pun pengidup.” (Masmur 36:9) Reti iya, pengidup kitai tu pemeri ari Petara. Enti kitai nyaga pengerai diri sereta diri sebilik, tu nunjukka kitai beterima kasih ke pemeri tu. Peratika chara ke ulih digaga nuan.

 1. Sediaka pemakai nuan enggau chara ti likun.

 Nama kebuah? Utai empa enggau utai irup ke kamah, ngembuan kuman ti ulih ngachau pengerai. Lebuh kuman tu tama tubuh nuan, nya ngujungka nuan sakit. a

 Lalau ari pakar pengerai:

•   Sebedau nuan mela pemakai, tuchi meh jari nuan enggau sabun sereta ai. b Tuchi jari nuan abis nadai 20 sikin. Kusuk belakang jari, selepak jari sereta kukut nuan. Udah nya, kendas jari nuan nyentukka rangkai.

•   Kena meh sabun enggau ai lebuh nuchi sengkalan, pinggai mangkuk, sereta semua perengka ke dikena ngelempan lauk nya. Kelimpah ari nya, uji anang ngena sengkalan ti sama ngelempan lauk ke ulih diempa matak enggau lauk ke patut dipanduk.

•   Semua buah enggau sayur patut dituchi. Tentuka nuan meresi nya enggau manah, kelebih agi enti kebun alai nanam buah sereta sayur nya ngena ai ti kamah.

 2. Anang nyengulaika pemakai ti matak enggau pemakai ti udah dipanduk.

 Nama kebuah? Kuman ari pemakai ti matak, ke datai ari dagin ke bedau dipanduk, ulih ngamahka pemakai bukai.

 Lalau ari pakar pengerai:

•   Lebuh meli pemakai ari pasar lalu nyimpan nya ba rumah, pemakai ke matak kelebih agi dagin, enda patut disengulaika enggau pemakai ti udah mansau.

•   Pengudah nuan netak dagin ke agi matak, tentuka diri nuchi jari, lunga tauka duku ke dikena, sereta sengkalan sebedau netak pemakai bukai.

 3. Tentuka pemakai nya dipanduk enggau chara ti betul.

 Nama kebuah? Kuman ke ulih ngachau pengerai, ulih mati enti pemakai nya dipanduk enggau pengangat ti tinggi.

 Lalau ari pakar pengerai:

•   Panduk meh pemakai nya nyentukka iya amat-amat angat. Pemakai, kelebih agi begian dagin, pengangat iya patut ngagai 70 darjah Celsius, lalu abis nadai dalam 30 sikin.

•   Tentuka sup tauka pemakai ke bisi kuah dipanduk nyentukka ai iya gesak.

•   Enti deka nanak baru pemakai ke udah mansau, tentuka nya ditanak enggau amat-amat angat, nyentukka iya mansutka wap.

 4. Simpan pemakai ba suhu ti betul.

 Nama kebuah? Enti pemakai disimpan ba suhu entara 5 ngagai 60 darjah Celsius dalam 20 minit aja, tu ngujungka bakteria ba pemakai nya nambah ngagai dua kali lipat. Kelimpah ari nya, enti dagin matak enda disimpan ba suhu ke betul, sekeda bakteria nya ngasilka toksin ti enda ulih dibunuh taja pan udah dipanduk.

 Lalau ari pakar pengerai:

•   Tentuka pemakai disimpan ba suhu ti angat enggau chelap ngambika kuman enda ulih idup.

•   Anang nejuka pemakai ba suhu bilik lebih ari dua jam, tauka lebih sejam enti suhu bilik nya manggai ngagai 32 darjah Celsius ke atas.

•   Pengudah dipanduk, tentuka pemakai nya agi angat sebedau ngenahka pemakai.

 1. Makai beberapa bengkah buah enggau sayur ninting hari.

 Buah enggau sayur ngembuan vitamin, mineral enggau mayuh zat ke diguna kena nyaga pengerai. Nitihka WHO, tubuh kitai begunaka abis nadai 400 gram buah enggau sayur ninting hari. Tu bedau nyengkaum pemakai ke bisi kanji baka ubi kentang tauka ubi kayu.

 2. Makai pemakai ti belemak enggau minyak ba penyampau ti chukup.

 WHO meri tip, kurangka pemakai ti beguring tauka pemakai ke diproses baka hot dog enggau nuget. Laban pemakai baka tu ngembuan mayuh lemak ti enda manah ke pengerai. Enti ulih, kena meh minyak sayur. Minyak tu jauh manah agi ari minyak ke datai ari jelu. c

 3. Kurangka gula enggau garam.

 WHO mega meri lalau, orang ke besai tuai ulih makai garam kurang ari sesudu teh ninting hari. Pia mega, WHO meri penemu, penyampau gula ke ditambahka ngagai pemakai enda ulih lebih ari 60 mililiter (12 sudu teh) ninting hari. d Ba pemakai enggau ai irup ke diproses, endang sigi udah ngembuan mayuh gula. Chunto iya, ai manis ke bepenyampau 355 mililiter ngembuan 50 mililiter (10 sudu teh). Nambahka nya, ai manis ngembuan mayuh kalori, lalu tu endang enda manah ke pengerai.

 Bup Kudus madah, “Orang ke nemu berunding deka meda penusah datai, lalu belalai.” (Jaku Dalam 22:3) Enti nuan milih pemakai enggau bejimat, lalu ngaga ubah ke patut, nuan nunjukka diri beterima kasihka pemeri Petara sereta pengerai diri.

 Runding ti salah: “Endang ari suba aku makai pemakai ti enda manah. Nadai bida sekalika tebiat makai aku nya berubah tauka enda.”

 Iya ke amat: Nitihka pemansik, tebiat makai pemakai ti manah ulih ngurangka pemati. Nuan deka bulih mayuh penguntung, lebuh nyaga diet diri enggau manah.