Bala pemerintah dunya sereta gerempung entarabansa enda mujur mutarka laya. Kenyau ari Perang Dunya Kedua, perang majak nyadi diatu ari ke suba. Kira-kira dua biliun iku orang—iya nya 25% ari semua mensia ba dunya—diau ba endur ke bisi perang enggau penyarut nyadi.

 Nama kebuah mensia enda ulih mutarka laya sereta bebaik? Nama dipadah Bup Kudus?

1.  1. Mayuh orang ngembuan runding enggau ulah ke ngasuh sida tusah bebaik. Bup Kudus udah madahka, maya jeman kitai “orang deka rinduka diri empu, rinduka duit, bejaku begah, ngeninggika diri, . . . enda tetap ati, . . . enggai sepenemu enggau orang bukai, . . . enda nemu nagang diri, mangah, . . . kieh [sereta] sumbung.”​—2 Timoti 3:2-4.

2.  2. Enda ngira mensia kediri tauka bekerejasama enggau pangan diri, sida nadai kuasa mutarka penanggul enti nadai tulung ari Penempa sida, iya nya Petara Jehovah. a Bup Kudus madahka, “nadai siku [mensia] bisi kuasa ngatur pengidup diri.”—Jeremiah 10:23.

3.  3. Dunya tu di baruh kuasa Sitan, “ke nesatka serata dunya.” (Pemandang 12:9) Seagi-agi “serata dunya di baruh kuasa Sitan,” deka bisi perang enggau penyarut nyadi.​—1 John 5:19.

 Bup Kudus madahka mensia enda ulih mutarka laya tang Petara ulih.

•   “Aku nemu pelan Aku ke kita, pelan kena meri kita pemaik ukai kena ngemediska kita, pelan kena meri kita pengidup enggau pengadang ke jemah ila.”​—Jeremiah 29:11.

 Baka ni Petara deka ngamatka semaya nya? “Petara ke meri pengelantang deka ngeredakka Sitan.” (Rome 16:20) Petara deka ngena siti perintah ba serega ke dikumbai “Perintah Petara” ba dalam Bup Kudus, kena mai pengelantang ngagai semua mensia ba serata dunya. (Luke 4:43) Lebuh Jesus merintah ba Perintah nya, iya deka ngajar mensia idup bebaik.​—Isaiah 9:6, 7.

•   Kena nemu mayuh agi, bacha artikel “Nama Utai ke Nyadi Lebuh Perintah Petara Merintah?”