Ungkus pengawa beperang amat besai.

•   “Taun ke udah, bala pemerintah ba serata dunya udah ngena $2.2 triliun [dolar Amerika] dalam beberapa iti perang. Penyampau duit tu mayuh agi ari duit ke kala dikena dalam setaun.”—The Washington Post, 13 Februari 2024.

 Ungkus perang ukai semina duit aja. Peda siti chunto: Perang ke nyadi ba Ukraine.

•   Bala soldadu. Bala pemansik ngira nyauka 500,000 iku soldadu dibunuh tauka bakal kenyau ari perang tu berengkah dua taun suba.

•   Rayat biasa. Nitihka riput ari PBB, lebih ari 28,000 iku rayat biasa udah mati tauka balat bakal. Taja pia, siku pegawai tinggi PBB madahka: “Pemalat pemerinsa ke diasaika bala rayat ketegal perang tu kelalu besai nyentukka iya enda ulih diitung.” a

 Ketegal perang enggau penyarut di serata dunya, mayuh orang amat merinsa enggau mayuh macham chara.

•   114 juta iku orang di serata dunya udah terpaksa rari ari rumah sida ketegal perang enggau penganas. (Riput tu dipadahka ba September 2023.)

•   783 juta iku orang enda chukup utai diempa. “Siti kebuah ti pemadu besai mayuh orang enda chukup utai ke diempa, iya nya perang enggau penyarut. Ari semua orang ke enda chukup utai ke diempa, 70 peratus ari sida diau ba menua ke ditinggang perang enggau penganas.”—World Food Programme.

 Kati bisi maya perang deka nadai agi? Kati bisi harapan semua mensia ulih diau bebaik? Kati deka bisi maya asil ari tanah deka dikunsi enggau semua orang ngambika nadai orang suntuk utai? Nama ku Bup Kudus pasal tu?

 Bup Kudus ngena siti sempama pasal siku orang ke nepan kuda kena nerangka pasal mayuh macham perang ke deka nyadi ba serata dunya.

•   “Aku pan meda siku da agi kuda datai. Kuda nya bewarna mirah baka api. Iya ke nepan kuda nya dikemendarka ngerampas pengelikun ari dunya ngambika orang besayatka pangan diri, lalu iya diberi siti pedang ti besai.”—Pemandang 6:4.

 Ba sempama tu, bisi dua iku agi orang ke nitihka iya ke nepan kuda nya tadi, lalu seduai iya ngambarka lapar pungkang sereta penyakit enggau penusah ke bukai ke mai pemati. (Pemandang 6:5-8) Kena nemu mayuh agi pasal jaku benabi tu sereta kebuah kitai ulih pechaya nya benung dikeamatka kemayaharitu, bacha meh artikel “Empat Penunggang Kuda—Siapakah Mereka?” dalam jaku Melayu.

 Enda lama da agi, pengaya dunya tu nadai agi deka dikena ba pengawa beperang. Taja pia, tu ukai deka nyadi ketegal usaha ari mensia. Bup Kudus madahka:

•   Petara deka “ngasuh perang badu agi nyadi di serata dunya.”—Masmur 46:9.

•   Petara deka mutarka utai ke nyadi ketegal perang. “Iya deka ngendas semua ai mata ari mata sida, lalu pemati deka nadai agi. Nadai agi balat tusah ati, nadai agi nyabak, nadai agi pedis. Semua utai ti lama udah nadai agi.”—Pemandang 21:4.

•   Petara deka ngasuh semua mensia diau bebaik enggau pangan diri. “Bala nembiak [Iya] nadai agi pengirau, lalu rumah sida bisi pemaik enggau pengelikun.”—Isaiah 32:18.

 Nitihka jaku benabi dalam Bup Kudus, perang enggau utai bukai ke dipeda kitai kemayaharitu nunjukka timpuh pengelantang tu deka datai enda lama da agi.

 Baka ni chara Petara deka mai pengelantang ke jemah ila? Iya deka ngereja nya nengah Perintah Iya ba serega. (Matthew 6:10) Kena nemu mayuh agi pasal Perintah nya enggau penguntung iya ke nuan, peda meh video pandak ke betajuk Nama Reti Perintah Petara?