Sekeda orang madahka muji anak nya manah. Iya ke bukai ngumbai seruran muji anak deka ngasuh anak sumbung sereta temegah, lalu iya ngumbai diri ulih ngereja semua utai.

Utai ke patut diperundingka ukai pemayuh puji ke diberi ngagai anak nuan, tang bansa puji ke diberi ngagai iya. Puji ke bansa ni manah? Puji ke bansa ni patut diseliahka? Ni bansa puji ti pemadu manah ke anak nuan?

Ukai semua puji nya sama. Peratika pekara tu.

Kelalu muji enda manah. Sekeda apai indai meri puji ke enda patut ngambika anak sida arap agi ke diri empu. Tang nitih ku Dr. David Walsh, bala anak “ulih meda sekalika apai indai kelalu muji tauka enda muji ari ati. Sida nemu sida enda patut dipuji, lalu tu ngasuh sida enda pechayaka nuan.” *

Muji pengelandik manah. Chunto, anak indu nuan landik ngelukis. Nuan tentu deka muji iya ngambika iya ngemansangka agi pengelandik iya ngelukis. Tang enti semina muji pengelandik aja, tu ulih ngasuh anak nuan ngumbai pengelandik nya utai ke patut dikemeratka. Indah iya engka enggai nguji utai ti baru laban takut enda mujur. Iya engka berunding, ‘Enti aku bebendar ngereja utai nya, reti nya aku nadai pengelandik. Kapa aku bebendar ngereja iya?’

Muji pemendar ngereja utai manah agi. Ari ke muji pengelandik iya, puji meh pemendar enggau pengeransing iya ngereja utai. Tu deka ngasuh anak nuan nemu iya patut sabar sereta bebendar ngambika landik agi ngereja utai bukai. Bup Letting Go With Love and Confidence madahka, enti bala anak nemu pasal utai tu,  “Sida deka bebendar ngereja utai ngambika bulih asil ke manah. Indah lebuh sida enda mujur, sida enda ngumbai diri enda beguna. Tang sida deka terus belajar.”

Muji pemendar ngereja utai, ukai semina muji pengelandik. Ari ke nyebut, “Nuan landik amat ngelukis,” manah agi nuan nyebut, “Nuan udah bebendar ngelukis. Manah amat gambar nya.” Kedua-dua iti jaku nya sama muji. Tang jaku puji keterubah nunjukka, anak nuan semina ulih ngereja utai ke landik dikereja iya.

Lebuh nuan muji pemendar anak nuan ngereja utai, nuan ulih nulung iya nemu, iya ulih ngemansangka pengelandik iya enti iya bebendar ngereja utai nya. Anak nuan engka deka arap agi ke diri empu lebuh ngereja utai ke baru.—Prinsip Bup Kudus: Jaku-Dalam 14:23.

Nulung anak enti iya enda mujur. Indah orang ke landik pan suah ngaga penyalah. (Jaku-Dalam 24:16) Tang pengudah ngaga tiap iti penyalah, sida enggai alah, belajar ari penyilap nya, lalu terus mansang. Baka ni nuan ulih nulung anak nuan mujur?

Kingatka, peratika pemendar iya ngereja utai. Peratika siti chunto: Nuan suah madah ngagai anak indu nuan, “Nuan landik ba matematik,” tang udah nya iya enda mujur ba peresa matematik. Iya engka ngumbai diri enda landik agi, lalu iya enggai ngemansangka diri empu.

Taja pia, lebuh nuan beratika pemendar anak nuan ngereja utai, nuan nulung iya nemu, pengawa iya ke enda mujur ukai utai ti ngelemika semengat. Nya alai, ari ke lemi semengat, iya deka nguji chara bukai tauka bebendar agi ngereja utai.—Prinsip Bup Kudus: James 3:2.

Jaku ajar ke ulih ngemansang. Lebuh jaku ajar diberi enggau chara ti betul, tu deka nulung ngeringka semengat anak nuan. Pia mega, enti nuan seruran meri puji ke patut, anak nuan deka nerima jaku ajar ke ulih nulung iya mansang agi. Udah nya, pemujur ke diulih iya ngasuh seduai puas ati.—Prinsip Bup Kudus: Jaku-Dalam 13:4.