Keterubah, peratika pemendar ti ngelantangka ati tu: Petara nemu pemerinsa kemaya hari tu, lalu Iya deka mutarka pemerinsa nya. (Masmur 72:13, 14)Ba Bup Kudus, Petara besemaya deka “meri pemaik ngagai kita ke kena perinsa.” Kemaya? ‘Lebuh Tuan Jesus nurun ari serega enggau bala melikat iya ti bekuasa, . . . ngukum orang ke enda ngelala Petara, enggau orang ke enda ngasika Berita Manah Jesus Kristus Tuan kitai.’ (2 Tesalonika 1:7, 8) Utai tu deka nyadi jemah ila. Bup Kudus ngumbai iya perang ‘Hari Besai Petara ti Pemadu Bekuasa.’ Perang tu mega dikumbai Armagedon.—Pemandang 16:14, 16.

Ba perang nya, Petara ukai ngena mensia. Tang Iya deka ngena Anak Iya, Jesus Kristus enggau bala melikat Iya ti bekuasa, beperang ngelaban orang ke jai. Bala soldadu serega deka ngujungka semua pemerinsa.—Isaiah 11:4; Pemandang 19:11-16.

Nyentuk ke diatu, penemu Petara pasal perang mengkang enda berubah. Iya agi ngumbai perang dikemendarka kena ngujungka penyai enggau pengawa nekan. Tang baka ke ulih dipeda ari sejarah, Petara Empu ke bisi hak netapka kemaya perang nya deka nyadi sereta sapa ke patut enggau beperang. Baka ke udah ditemu kitai, Petara udah netapka perang ke dikena ngujungka penyai sereta dikena nulung orang ke ditekan, lalu perang tu deka diuluka Anak Iya, Jesus Kristus, jemah ila. Reti  iya, perang ke nyadi ba dunya kemaya hari tu enda dikemendarka Petara, enda ngira ni pemanah asil iya.

Ke sempama: Uji gambarka dua iku diri menyadi belaya enggau pangan diri, lebuh apai seduai iya nadai ba rumah. Seduai iya ngetu belaya enda lama, lalu betalipaun ngagai apai seduai iya. Seiku ngumbai seiku ngepunka laya nya, lalu seiku da agi ngumbai iya dipediska seiku nya. Seduai iya sama besebana ngagai apai seduai iya, lalu ngarapka diri disukung. Taja pia, pengudah ninga ari kedua-dua piak, apai ngasuh seduai iya ngetu belaya, lalu nganti iya pulai mutarka laya nya. Seduai iya ngetu belaya enda lama. Tang, udah nya seduai iya belaya baru. Lebuh apai seduai iya datai ba rumah, iya pedis ati ngagai kedua-dua anak iya, lalu ngukum seduai iya laban enda ningaka jaku iya.

Kemaya hari tu, orang ke beperang suah minta sukung ari Petara. Tang, Petara enda nyukung orang ke beperang kemaya hari tu. Ba Bup Kudus, Iya enggau terang madahka: “Anang malas penyai ngena penyai,” lalu “anang malas.” (Rome 12:17, 19) Iya mega madahka, mensia patut ‘nganti Iya enggau ati ti liat’ kena mutarka laya nya ba Armagedon. (Masmur 37:7) Enti orang ke beperang enggai nganti Petara, lalu mansang beperang, Iya ngumbai perang nya pengawa jai ke enda ulih ditagang sereta enda ngerinduka ati Iya. Nya alai ba Armagedon, Petara deka ngayanka pengeringat Iya, lalu mutarka laya ba dunya tu belama iya enggau “ngasuh perang badu agi nyadi di serata dunya.” (Masmur 46:9; Isaiah 34:2) Endang amat, Armagedon nya perang ke deka ngujungka semua perang.

Siti ari mayuh berekat ke dibai Perintah Petara, iya nya nadai agi perang. Jesus nyebut pasal perintah nya ba sampi ke tebilang tu: “Datai meh Perintah Nuan. Nyadi meh peneka Nuan di dunya enggau di serega.” (Matthew 6:10) Perintah Petara ukai semina muai semua perang, tang iya mega muai penyai ke ngasuh perang nyadi. * (Masmur 37:9, 10, 14, 15) Nya kebuah, bala murid Jesus enda sabar nganti berekat ke dibai Perintah Petara.—2 Peter 3:13.

Taja pia, ni pengelama kitai patut nganti Perintah Petara ngujungka semua pemerinsa, pengawa nekan sereta penyai? Jaku ari Bup Kudus ke udah dikeamatka nunjukka kitai benung diau ba “hari ti penudi.” (2 Timoti 3:1-5) * Enda lama da agi, Perintah Petara deka ngujungka hari ti penudi tu ngena perang Armagedon.

Baka ke udah dipadah ba pun tadi, orang ke dipunaska ba perang ti penudi tu, iya nya orang ‘ke enda ngasika Berita Manah Jesus Kristus Tuan kitai.’ (2 Tesalonika 1:8) Tang kingatka, Petara enggai meda orang mati, nyengkaum orang ke jai. (Esekiel 33:11) Laban “Iya enggai nejuka indah siku kita dirusak” ba perang ti penudi tu, nya alai Iya diatu nentuka berita manah pasal Tuan kitai Jesus “ditusui di serata dunya, nyadika saksi ngagai semua bansa” sebedau pengujung nya datai. (2 Peter 3:8, 9; Matthew 24:14; 1 Timoti 2:3, 4) Amat, ketegal pengawa nginjil ke dipejalaika Saksi-Saksi Jehovah di serata dunya, orang kemaya hari tu bisi peluang ngelala Petara, ngasika berita manah pasal Jesus, sereta ulih meda dunya ke nadai agi perang.