Ninting hari tubuh nuan belaban enggau munsuh ke enda dipeda tang ulih ngachau nyawa. Ngambika chunto, bakteria, virus, enggau parasit ulih ngachau pengerai. a Nuan engka enda sedar virus tu udah bisi dalam tubuh, laban sistem imun tubuh nuan ulih ngelaban nya. Tang kekadang, kuman ke dalam tubuh ulih mansang mayuh sereta besai. Nya kebuah nuan begunaka ubat kena nyaga diri.

Pengelama beribu taun, orang enda nemu baka ni virus enggau bakteria ulih ngachau pengerai. Tang kena abad 19, bala pakar nemu pasal kuman sereta bakteria ke ulih mai penyakit. Ketegal tu, kitai nemu agi chara nyaga diri. Ari pansik bala pakar, mensia ulih ngurangka tauka mutarka penyakit ti berampit, baka tampok buah enggau polio. Tang ke diatu, penyakit bukai baka demam kuning enggau denggi nyadi baru. Nama kebuah? Peratika saut iya:

• Ninting taun, bejuta iku orang ke raun di serata dunya ulih mai bakteria tauka virus. Tang sida engka enda nemu diri udah mai penyakit ari siti menua ngagai menua bukai.

• Sekeda bakteria nemu berubah. Ku Pertubuhan Kesihatan Sedunia (WHO), “Antibiotik udah enda ulih ngubat sekeda penyakit ke datai ari sesebengkah bakteria.”

• Penyarut ba menua enggau penyeranta ngujungka pemerintah tusah deka nagang penyakit berampit ari ngelekai.

• Mayuh orang enda nemu chara nyeliahka penyakit.

Taja pan utai tu ngasuh kitai irau, tang nuan agi ulih nyaga diri sereta diri sebilik. Indah enti nuan diau ba endur ke benung mansang, nuan agi ulih nyaga diri ari penyakit. Artikel ke nangkanka tu deka nerangka chara iya.