BAKA kulat tasik, kerang tasik mega lekat ba batu, kayu tauka ba baruh kapal. Taja pia, kulat tasik lekat enggau terit ba sesiti endur. Kerang tasik lekat ngena utai ke baka ubung nipis ke dikumbai bisus. Bisus tu ngasuh kerang tasik senang ngiga pemakai lalu mindah ngagai endur bukai. Tang, bisus tu baka ke enda tan enti iya kena laban gelumbang. Baka ni bisus tu ulih ngasuh kerang tasik tan lekat ba siti-siti utai, lebuh iya dipangka gelumbang tasik?

Perundingka: Bisus ngembuan dua iti begian. Siti begian liat, lalu siti begian da agi lembut. Bala pemansik madahka, begian ke liat 80 peratus lalu begian ke lembut 20 peratus. Nisbah pengeliat enggau nisbah pengelembut tu, ngena amat ngambika bisus nya tan. Nya kebuah, bisus kerang tasik tan lebuh dipangka lalu ditarit gelumbang tasik.

Profesor Guy Genin ngumbai utai tu amat “ngalitka ati.” Ku iya: “Utai ti ngalitka ati ba bisus kerang tasik, iya nya lebuh begian ke liat bekerejasama enggau begian ke lembut.” Ari chara bisus tu ditempa, bala saintis nemu baka ni deka ngelekatka utai ba bengunan, mesin tauka perengka ba baruh ai, nyambung urat enggau tulang, sereta nutup abi putung. J. Herbert Waite, profesor ba University of California, Santa Barbara, Amerika Serikat madahka: “Dunya kitai sempama gudang reta ti nadai tatak, tang kitai bedau nemu semua utai pasal utai ke lekat tu.”

Nama runding nuan? Kati bisus kerang tasik nyadi pia aja, tauka ditempa?