Enti kitai majak nyeliahka diri ari orang ke enda dikerinduka kitai, nya ngujungka kitai balat agi bepilih mata. Ngambika chunto, enti kitai semina bekaban enggau orang ke sama baka kitai ba runding, asai ati, sereta ulah, kitai engka ngumbai chara kitai berunding nya betul.

“Tukangka ati kita.”—2 KORINT 6:13.

Nama dipelajar kitai ari ayat tu? Ati kitai ngambarka pengerindu enggau asai ati. Enti kitai semina rindu begulai enggau orang ke sebaka enggau kitai, nya nyekat ati kitai nerima orang bukai. Kena nyeliahka asai ati ti enda manah tu, kitai patut deka bekaban enggau orang ke enda sebaka enggau kitai.

Lebuh kitai ngelala orang bukai, kitai deka mereti agi kebuah sida ngembuan sesiti ulah. Seraya kitai ngemansangka pengerindu ngagai sida, kitai nyau enda ingat agi bida entara kitai. Kitai bisi penyinu ngagai sida. Pengaga ati sereta penusah ati sida mega diasaika kitai.

Peratika chunto Nazaré. Iya kala bepilih mata ngagai orang ke datai ari menua bukai. Iya nerangka chara mutarka nya: “Aku begulai sereta bekereja enggau sida. Mayuh orang ba komuniti aku madahka mayuh utai ti enda manah pasal orang ari menua bukai. Tang, aku ngasaika sida enda baka nya. Enti nuan bekaban enggau orang ke enda sebaka adat, nuan deka nemu ukai semua sida nya baka ke disebut orang.”

Ngiga peluang berandau enggau orang ke ari menua bukai, bansa, tauka bansa jaku bukai. Nuan ulih:

• Nanya pasal penelaba sida.

• Mai sida makai begulai.

• Mendingka cherita pengidup sida sereta beratika utai ti dikemeratka sida.

Enti nuan nguji meretika utai ke kala nyadi ba sida, nuan deka ngelala sapa sida ti bendar. Tu nulung nuan rindu agi ke sida enggau raban sida.