Munyi ku bala pakar, penusah ati orang ulih tebagi ngagai beberapa peringkat, taja pia tiap iku orang bisi chara sida empu napi penusah ati. Kati reti tu, sekeda orang kurang agi tusah ati, tauka benung ngelalaika penusah ati diri? Ukai baka ke diperundingka kitai. Ngaku enggau madahka asai ati ulih nulung seseiku orang ke benung tusah ati. Bisi beberapa chara kena mutarka penusah ati. Tu lebih agi bepanggai ba adat, chara idup seseiku orang, peneleba ba pengidup, sereta chara seseiku orang lebuh iya lenyau orang ke dikesayau.

Orang ke benung tusah ati engka enda nemu, utai ke deka nyadi pengudah orang ke dikesayau sida nadai. Tang, sekeda emosi sereta utai ke nekul udah dijangka. Peratika sekeda chunto tu:

Lemas enggau penusah ati. Nyabak, lelengauka orang ke udah mati, sereta emosi ke enda ulih ditagang engka nyadi. Pengingat tauka mimpi mega ulih ngasuh emosi ke baka tu nyadi. Tang lebuh keterubah napi penusah tu, seseiku orang engka tekenyit lalu enda ulih nerima penguji tu. Timo, laki Tiina, udah nadai enggau ngenyit. Lebuh ngenang penusah tu, ku Tiina madahka, “Keterubah iya, aku tekenyit nyentukka enda ulih nyabak. Aku enda pechaya utai ke nyadi. Kekadang, aku mega berasai sendat seput.”

Dibalut asai ati ti irau, ringat, enggau besalah. Ivan madahka, “Dalam sesiti timpuh pengudah anak kami nadai, iya nya Eric ke beumur 24 taun, aku enggau bini aku Yolanda amat ringat! Kami tekenyit, laban kami ukai orang ke udu ringat. Kami mega berasai besalah laban kami ngumbai diri, enda naka ulih nulung Eric.” Alejandro, ke udah ditinggal bini ketegal penyakit, mega kala berasai besalah. Iya madahka, “Keterubah iya aku berunding, enti Petara ngelakka aku napi penusah tu, aku tentu orang ke jai. Udah nya aku berasai besalah, laban aku baka ke nyalahka Petara.” Kostas iya ke disebut ba artikel sebedau tu madahka, “Aku kala ringat enggau Sophia ketegal iya dulu agi nadai ari aku. Pengudah nya, aku ga ke berasai besalah, laban utai tu ukai penyalah iya.”

Runding ti merampau. Bisi maya runding seseiku orang ke benung tusah ati, engka nadai temu tuju. Chunto iya, iya engka asaika agi ulih ninga, meda, tauka ngasaika kemayang orang ke udah mati. Iya mega engka tusah fokus tauka senang enda ingatka utai. Ku Tiina, “Kekadang, lebuh benung bejaku, runding aku ke bukai, sereta ngenang utai ke nyadi maya Timo mati. Aku tusah ati laban enda ulih fokus.”

Enggai begulai enggau orang. Orang ke tusah ati engka berasai enda nyamai lebuh begulai enggau orang bukai. Ku Kostas, “Lebuh begulai enggau laki-bini ke bukai, aku berasai lain. Tang aku mega berasai baka nya, lebuh begulai enggau sida ke bujang.” Yolanda, bini Ivan madah, “Tusah amat ninga orang ke madah pasal penanggul ke mit agi ari penanggul kami! Maya orang bukai madahka kami, berita anak sida ke manah, aku berasai gaga, tang aku mega berasai tusah deka jenuh ningaka cherita sida. Aku enggau laki aku nemu kami patut neruska idup, tang kami nadai pengeran tauka sabar ningaka randau baka tu.”

Penanggul ba pengerai. Nyawa enggai makai, penanggul ba berat tubuh, sereta enda ulih tinduk enggau manah. Aaron madahka, pengudah setaun apai iya nadai, iya tusah deka tinduk sereta dani tiap malam ba maya ti sama, lalu berundingka pasal apai iya ke udah mati.

 Alejandro mega napi penanggul pengerai ti nyelai. “Beberapa kali lutur meresa aku, madahka aku nadai ngawa. Asai aku, penusah ati meh pun penyakit tu.” Tanda penyakit ke ditapi iya berinsur manah. Tang Alejandro ngaga pemutus ti manah lebuh iya deka betemu enggau lutur. Penusah ati ulih ngelemika pengerai tubuh, ngasuh penyakit nya majak balat, tauka ngujungka penyakit baru ti bukai.

Tusah ngatur utai ti beguna. Ivan ngenang baru, “Pengudah Eric nadai, kami patut madahka ngagai kaban belayan, bala kaban, bos endur iya gawa, tuke rumah, sereta orang bukai. Kami mega patut ngisi mayuh pom sereta nusun barang Eric. Kami patut fokus ngereja semua tu, taja pan kami lelak ba runding, tubuh, enggau emosi.”

Ba sekeda orang, penanggul deka datai nuntung lebuh sida patut neruska pengawa ke suah diaduka orang ke udah mati nya. Tu meh utai ke nyadi ngagai Tiina. Iya madah, “Suba, Timo meh ke ngurus semua pengawa ba bank enggau bisnis kami. Diatu, semua tu nyadi tanggungjawap aku, lalu nambahka stres aku. Kati ulih aku nguruska pengawa tu enggau manah?”

Penanggul ba emosi, runding, enggau tubuh ke disebut tadi engka ngasuh orang ngasaika ditinggalka orang ke udah mati nya amat merinsa. Pemati orang ke dikesayau chukup ngenusahka ati, tang orang ke benung tusah ati tu ulih ditulung, enti sida udah ngadang penanggul ke deka nyadi. Kingatka, ukai semua orang deka napi semua penusah tu lebuh ditinggalka orang ke dikesayau. Kelimpah ari nya, orang ke tusah ati engka berasai nyamai agi pengudah nemu, penusah ati ketegal ditinggalka orang ke dikesayau endang utai ti suah nyadi tauka normal.

Utai ke ulih disadang: Nyau kelama, penusah ati deka majak kurang. Tu ukai reti iya, seseiku orang badu agi tusah ati tauka ulih muai abis lengis pengingat pasal orang ke dikesayau nya. Sempama ai ke pasang surut, penusah ati ulih kurang lalu kekadang ulih teringatka baru pasal orang ke udah nadai. Chunto iya, maya ulang taun kawin, haribulan iya ke mati, tauka utai bukai. Tang mayuh orang ulih natak emosi diri, lalu ngemeratka baru pengawa sida ninting hari, kelebih agi sida ke bulih sukung ari diri sebilik, kaban belayan, sereta napi penusah nya enggau chara ti patut.

Ni pengelama aku patut ngasaika utai tu? Ba sekeda orang, penusah ati nya ulih nyadi dalam beberapa bulan. Bisi ga begunaka setaun dua tauka lebih agi. a Ku Alejandro, “Penusah ati ti balat udah malut aku pengelama kira-kira tiga taun.”

Sabar meh enggau diri empu. Anang kelalu irau pasal utai ke dudi hari, lalu terus meh idup nitihka jalai nuan empu. Kingatka meh, penusah ati enda ngelamun nuan belama iya. Nyadi, nama ulih digaga nuan ngambika telih ba ati berinsur suman?