Tang, enti salah guna teknologi, sekeda laki-bini . . .

• jarang ngiga awak begulai.

• bekereja ba rumah taja pan nya enda beguai.

• ulih ngasuh pangan diri nangi indah bisi ke butang.

AWAK BEGULAI

Seiku laki ke benama Michael madahka, “Kekadang, lebuh aku begulai enggau bini, aku ngasaika kediri aja, laban iya majak meda talipun. Bini aku madah, ‘Diatu baru aku bisi awak meda talipun.’” Seiku laki ke benama Jonathan madah, gaya ke baka tu ulih ngasuh “laki-bini berasai jauh pangan diri taja pan sida ba endur ti sama.”

PIKIRKA: Ni penyuah talipun nuan memunyi ketegal mesej tauka notifikasi, lalu ngachau awak nuan begulai enggau kaling nuan?—EPESUS 5:33.

KEREJA

Ketegal bengkah kereja sida, sekeda orang patut suah sedia nyaut talipun tauka malas email. Tang bisi mega mai kereja sida pulai ke rumah taja pan nya enda ibuh diperumbanka. Seiku laki ke benama Lee ngaku, “Aku udah netapka awak begulai enggau bini aku, tang ba maya ti sama aku berunding deka malas mesej tauka nyaut talipun bekaul enggau kereja.” Seiku bini ke benama Joy madahka, “Aku bekereja ari rumah lalu ulih kereja barang maya. Nyadi aku enda ibuh bebendar magi awak entara kereja enggau diri sebilik.”

PIKIRKA: Kati nuan ninga enggau manah lebuh laki tauka bini nuan bejaku enggau nuan?—LUKE 8:18.

TETAP ATI

Nitihka siti pansik, mayuh laya ba tikah nyadi ketegal pengawa seiku laki tauka bini ba media sosial ti ngasuh pangan diri nangi. Sepuluh peratus ari orang ke ngambi begian ba pansik tu ngaku, sida kala ngepost utai ba Internet tang dilalaika sida ari kaling pengidup.

Nya meh kebuah iya media sosial ulih ngerusak tikah, lalu tu amat bahaya laban ulih ngujungka butang. Mayuh luyar ke ngatur adat sarak madahka, mayuh orang sarak ketegal media sosial.

PIKIRKA: Enti nuan berandau enggau seseiku orang ke ukai kaling pengidup nuan, kati nuan ngelalaika randau tu ari laki tauka bini nuan?—JAKU DALAM 4:23.

UTAI TI DIKEMERATKA NUAN

Orang ke enda makai, enda ulih nyaga tubuh enggau manah. Baka nya mega, orang ke enda ngena awak begulai enggau kaling pengidup iya, enda ulih nyaga tikah enggau manah.—Epesus 5:28, 29.

Kerandauka enggau kaling pengidup chara ke deka dikena nuan, tauka tuliska idea nuan empu kena nagang teknologi ari ngerusak tikah nuan.

• Makai begulai abis nadai sekali sehari

• Tetapka jam enda ngena perengka elektronik

• Gaga jadual alai seduai dating

• Padamka perengka elektronik lalu engkah ba endur ti jauh ari peninduk nuan

• Tetapka 15 minit ninting hari enda ngena perengka elektronik ngambika seduai ulih berandau enggau pangan diri

• Tutup line Internet ninting hari ba maya ti ditetapka