APAI INDAI
6: Disiplin
RETI IYA
Leka jaku disiplin nyengkaum ngiring enggau ngajar. Bisi maya, disiplin beguna kena ngerara anak maya sida ngereja salah. Kesuah iya, bala anak patut diajar ngemansangka moral sida ngambika sida ulih ngaga pemutus ti manah.
NAMA KEBUAH TU PENTING
Kemayaharitu, sekeda ruang bilik enda beberatka disiplin, laban apai indai berunding disiplin nya ulih ngemaruhka anak sida. Tang apai indai ke bepenemu-dalam, deka netapka atur ti ngena sereta ngelatih anak sida nitihka nya.
“Anak begunaka atur ngambika ulih nyadi orang ke bepenemu-dalam. Enti nadai disiplin, bala anak baka perau ke nadai kemudi, ti deka tesat sereta karam.”—Pamela.
CHARA-CHARA
Enda berubah. Enti anak nuan ngelanggar atur, tentuka iya nerima disiplin. Tang enti iya nitihka atur, sedia meh muji iya.
“Aku suah muji anak aku laban ulah iya ti ngasi ba dunya ke udu ngelaban. Enggau tu, sida senang agi nerima disiplin ba maya sida begunaka nya.”—Christine.
PRINSIP BUP KUDUS: “Kita deka ngetau utai ti ditanam kita empu.”—Galatia 6:7.
Nemu berunding. Lebuh meri disiplin, berunding meh ke umur, penau, sereta naka ni pemesai penyalah anak nuan. Selalu iya, ukum ti pemadu ngasi bekaul enggau penyalah iya. Chunto iya, anak ke ngena talipun enggau chara ti salah engka enda dikemendar ngena talipun ba sesiti timpuh. Ba maya ti sama, anang meh jampat ringat ketegal utai ti mit ke ngasuh nuan gidan.
“Aku nguji mereti sekalika anak aku enda sengaja tauka endang sengaja ngelaban jaku. Enti iya enda sengaja, iya semina patut ditangkan, tang enti iya suah ngulang penyalah, tu reti iya, ulah iya patut dipebetulka.”—Wendell.
PRINSIP BUP KUDUS: “Kita ke apai, anang ngereja utai ti tau ngasuh anak kita ringat, enggai ke sida alah semengat.”—Kolosi 3:21.
Bepengerindu. Anak deka senang agi nerima sereta nitihka disiplin enti sida nemu disiplin tu diberi ketegal pengerindu.
“Lebuh anak kami ngaga penyalah, kami madahka iya, kami temegahka semua pemutus manah ke digaga iya suba. Kami nerangka penyalah tu enda ngerusak nama iya seagi iya ngemetulka penyalah nya, lalu kami deka nulung iya ngereja nya.”—Daniel.
PRINSIP BUP KUDUS: “Pengerindu nya liat ati, nelap.”—1 Korint 13:4.
