Nya meh utai ke disebut seraban pakar pansik entara bansa pasal perubahan iklim. Enti nuan amat pechaya bisi Penempa ke ibuhka mensia, utai ke disebut bala saintis tu tentu ngingatka nuan pasal proses semula jadi ke digaga Petara ngambika gaya bumi ulih terus manah.

Tang, ketegal bumi tu udah balat dirusakka mensia, bumi kitai enda ulih pulai baka selama enti nadai bantu ari Petara. Nama kebuah kitai ulih andal, Petara tentu nulung ba senentang pekara tu?

Ba kutak tu, peratika sekeda ayat ke ulih ngasuh kitai andal, bumi ulih terus nyukung utai idup sereta mengkang belama iya.

• Bumi ditempa Petara. “Ba pun iya kelia, Petara ngaga langit enggau dunya.”​—Pemungkal 1:1

• Bumi tu enggi Petara. ‘Dunya enggau semua utai ti dalam dunya endang enggi Yehuwa.’ a​—Masmur 24:1.

• Petara nempa bumi tu ngambika bisi belama iya. ‘[Petara] udah ngengkahka dunya tegap ba pugu iya, lalu iya enda dikinsitka.’​—Masmur 104:5.

• Petara besemaya utai idup ba bumi deka mengkang belama iya. ‘Petara nempa lalu ngaga dunya. Iya nadai ngaga dunya nyadi endur ti sunyi nadai mensia, tang nyadi endur alai mensia diau.’​—Isaiah 45:18.

• Petara besemaya mensia deka diau ba bumi belama iya. “Orang ke lurus deka bempu menua tu lalu diau ditu belama iya.”​—Masmur 37:29.

Petara endang ngaga bumi ngambika mensia ulih diau dia lalu enda ngerusak bumi. Bup Kudus madahka, ba maya ti udah ditetapka Iya, Jehovah munaska orang ke nganchurka bumi.​—Pemandang 11:18.

Bup Kudus madahka, Petara besemaya deka ngubah bumi kitai nyadi paradais ti manah sereta lawa. Iya deka “meri sida chukup utai datai ke semua utai ti idup nadai suntuk utai.”​—Masmur 145:16.