Petara meri kitai siti pemeri iya nya, penau bejaku ngagai Iya sereta mansutka asai ati kitai nengah sampi. Nabi David madahka Petara nya ningaka sampi, lalu deka semua bansa datai semak Iya. (Masmur 65:2) Tang baka ni chara kitai besampi ngambika didinga sereta diberekat Petara?

Sampi nya chara nuan, ‘Madahka ngagai [Petara] semua penusah.’ (Masmur 62:8) Reti nya, mansutka asai ati nuan ti dalam. Petara ti Pemadu Bekuasa rinduka sampi nuan ti datai ari ati.

Taja pan Petara bisi mayuh nama kangau, tang Iya bisi nama Iya empu. ‘Aku Jehovah . . . Tu nama Aku.’ (Pemansut 3:15) a Nama Jehovah udah ayan 7,000 kali ba Bup Kudus. Mayuh bala nabi ngena nama Petara empu lebuh sida bejaku ngagai Iya. Ngambika chunto, Abraham madah: ‘Jehovah . . . aku enda tau enda bejaku baru [enggau Nuan].’ (Pemungkal 18:30) Kitai mega patut ngena nama Petara, iya nya Jehovah, lebuh kitai besampi.

Enda ngira nama bansa jaku ke dikena kitai, Petara endang meretika asai ati sereta runding kitai. Bup Kudus madahka kitai: ‘Petara endang amat enda bepilih mata, tang dalam semua bansa, barang sapa nangika Iya, lalu ngereja utai ti ngena sigi dikerinduka Iya.’—Kereja Rasul 10:34, 35.

Tang, ngambika diberekat Petara, kitai ukai semina besampi aja. Ba artikel ke nangkanka tu, kitai deka meda utai ti patut digaga kitai.