Enda ngutuk enti kitai ringat lebih agi enti kitai dilayan enggau jai. Tang, Petara enggai kitai malas dendam. Indah, Iya meransang kitai sabar laban Iya udah besemaya deka mai pengelurus enda lama da agi.—Masmur 37:7, 10.

Lebuh mensia ke enda sempurna nguji malas dendam, tu semina ngemau ke agi api pemenchi. Nyadi, enti seseiku orang ngemediska ati nuan tauka ngelayan nuan enggau jai, anang meh bebalas. Uji meh tenang, lalu nagang pengeringat diri. Dalam sekeda situasi, manah agi nuan enda ibuh ingatka utai ke kala nyadi. (Jaku-Dalam 19:11) Ba situasi bukai, manah agi enti nuan ngereja sesiti utai. Chunto, enti nuan nyadi mansa jenayah, nuan ulih ngeriput pekara tu ngagai piak ti bekuasa, chunto iya polis.

Tang, baka ni enti sesiti penanggul engka enda ulih diputarka enggau chara ti manah? Tauka, nuan udah naka ulih mutarka penanggul tu tang agi enda mujur? Enti tu nyadi, anang meh berunding deka malas dendam, laban pengawa tu baka ke nuang minyak ngagai api. Tang, ketuka meh ati ti begedi. Andal meh, Petara nemu chara ti pemadu manah ngetuka penanggul tu. Bup Kudus ngelalau kitai, “Panggaika pengarap nuan ba Iya, lalu Iya deka nulung nuan.”—Masmur 37:3-5.