1. Nama asai ati Jehovah pasal bala nembiak Iya?

 JEHOVAH beratika tiap iti utai ke ditapi bala nembiak Iya. Iya nemu lebuh kitai gaga ati sereta lebuh kitai tusah ati. (Mas. 37:18) Iya amat temegahka kitai lebuh meda kitai bebendar deka nyembah Iya taja pan napi utai ti ngenusahka ati. Nambahka nya, Iya mega keran deka nulung sereta ngelantangka ati kitai.

2. Baka ni Jehovah nulung sida ke tusah ati? Nama patut digaga kitai ngambika bulih tulung ari Iya?

² Masmur 147:3 madahka, Jehovah “malut telih” sida ke tusah ati. Ayat tu ngambarka chara Jehovah nulung sida ke berasai tusah ati. Tang nama patut digaga kitai ngambika bulih tulung ari Jehovah? Peratika siti sempama. Siku lutur ti landik ulih nyumanka orang ke bisi telih. Taja pia, orang ke bisi telih nya mesti nitihka arahan lutur nya ngambika ulih suman. Dalam artikel tu, kitai deka beratika utai ti dipadah Jehovah dalam Jaku Iya ngagai sida ke balat tusah ati. Lalu, kitai mega deka meda baka ni kitai ulih nitihka nasihat Iya.

JEHOVAH NGINGATKA KITAI, KITAI BEREGA BA IYA

3. Nama kebuah sekeda orang ngasaika diri enda berega?

³ Kemayaharitu, mayuh orang nadai pengerindu ke pangan diri. Ketegal nya, sida engka ngintu orang bukai enggau jai, lalu ngasuh orang berasai enda berega. Siku menyadi indu ke benama Helen a madahka: “Apai indai aku ukai orang ke bepengerindu.  Apai aku amat mangah. Lalu tiap hari, iya madah ngagai aku, aku nadai guna.” Baka Helen, nuan mega engka dikelingi orang ke ngasuh nuan berasai enda berega. Nuan engka suah dikemaluka sereta diintu enggau jai. Ketegal nya, nuan engka ngasaika nya tusah deka pechaya bisi orang amat ibuhka nuan.

4. Nitihka Masmur 34:​18, nama semaya ke diberi Jehovah ngagai kitai?

⁴ Taja pan orang bukai ngintu nuan enggau jai, nuan ulih yakin, Jehovah rinduka nuan sereta ngumbai nuan berega. Iya “diau semak orang ke tusah ati.” (Bacha Masmur 34:18.) Enti nuan ngasaika diri nadai guna, kingatka meh, Jehovah meda sifat nuan ti manah, lalu mai nuan semak enggau Iya. (Jhn. 6:44) Jehovah seruran sedia deka nulung nuan laban nuan amat berega ba Iya.

5. Nama ulih dipelajarka kitai ari chara Jesus ngintu orang ke ngasaika diri nadai guna?

⁵ Kitai ulih belajar pasal asai ati Jehovah lebuh kitai beratika teladan Jesus. Lebuh Jesus ba dunya, iya ngayanka pemanah ati ngagai sida ke ngasaika diri nadai guna. Sida engka ngasaika baka nya ketegal chara sida diintu maya nya. (Mat. 9:​9-12) Ambika chunto, bisi siku indu ke balat sakit negu gari luar Jesus laban iya ngumbai enti iya ngereja nya, iya ulih digeraika. Ari ke nganu iya, Jesus ngelantangka ati iya, lalu muji pengarap iya. (Mrk. 5:​25-34) Ketegal Jesus neladan sifat Apai iya enggau sempurna, nuan ulih yakin Jehovah deka ngintu nuan sama baka chara Jesus ngintu indu nya. (Jhn. 14:9) Jehovah beratika sifat nuan ti manah, ke nyengkaum pengarap enggau pengerindu nuan ke Iya.

6. Nama ulih digaga nuan enti nuan ngasaika diri nadai guna?

⁶ Nama ulih digaga nuan enti nuan ngasaika diri nadai guna? Bacha enggau belematika ayat-ayat Bup Kudus ke nulung nuan yakin,  nuan amat berega ba Jehovah. b (Mas. 94:19) Anang mandingka diri empu enggau orang bukai, lalu anang kelalu berunding pasal utai ke enda ulih digaga nuan. Jehovah enda ngarapka nuan ngereja utai ke lebih agi ari ke ulih dikereja nuan. (Mas. 103:​13, 14) Enti nuan kala diintu enggau jai, anang nyalahka diri empu. Kingatka meh, nya ukai salah nuan. Jehovah deka ngukum sida ke ngintu orang bukai enggau jai, tang Iya deka nulung sida ke nyadi mansa. (1 Pet. 3:12) Sandra, ke kala didera lebuh iya agi mit madahka: “Aku seruran minta Jehovah nulung aku meda sifat ti manah ke dipeda Iya ba aku.”

7. Baka ni utai ke ditapi kitai ulih nulung ba pengawa kitai ke Jehovah?

⁷ Andal meh, Jehovah ulih ngena nuan nulung orang bukai. Iya udah meri nuan basa ti besai gawa begulai enggau Iya ba pengawa nginjil. (1 Kor. 3:9) Ketegal utai ke ditapi nuan suba, nuan engka senang agi meretika asai ati orang ke merinsa. Nuan ulih nulung sida. Helen, ke dipadah tadi, nerima tulung ari Jehovah enggau bala menyadi ke bukai. Lalu diatu, iya ulih nulung orang bukai. Ku iya madahka: “Aku kala ngasaika diri nadai guna. Tang Jehovah nulung aku ngasaika diri dikerindu sereta ngena aku nulung orang bukai.” Helen diatu gaga ati nyadi pengerintis biasa.

TERIMA MEH PENGAMPUN ARI JEHOVAH

8. Nama dipadah Jehovah ngagai kitai ba Isaiah 1:18?

⁸ Sekeda nembiak Jehovah agi berasai tusah ati ketegal penyalah ke digaga sida suba, enda ngira sebedau tauka pengudah sida dibaptisa. Tang kingatka meh, Jehovah amat rinduka kitai, lalu Iya udah meri tebus kena ngampunka dosa kitai. Nya alai, kitai ulih yakin, Jehovah tentu deka kitai nerima pemeri tu. Jehovah besemaya, pengudah kitai “ngatur pekara tu” c enggau Iya, Iya deka ngampunka kitai enggau pengabis iya. (Bacha Isaiah 1:18.) Kitai amat beterima kasih laban Apai kitai ti bepengerindu, Jehovah, enda agi ingatka dosa ti dikereja kitai suba. Tang ba maya ti sama, Iya deka seruran ingatka utai ti manah ke udah dikereja kitai.—Mas. 103:​9, 12; Heb. 6:10.

9. Nama kebuah kitai enda patut terus berundingka penyalah ti digaga kitai suba?

⁹ Nama ulih digaga nuan enti nuan berasai tusah ati ketegal penyalah ti digaga nuan suba? Bebendar meh berundingka utai ti benung digaga nuan diatu sereta utai ti ulih digaga nuan jemah ila. Peratika chunto Rasul Paul. Iya kala balat merinsaka orang Kristian. Iya amat nesal ati ke utai ti udah digaga iya. Iya mega nemu, Jehovah udah ngampunka iya. (1 Tim. 1:​12-15) Kati iya terus berundingka penyalah ti digaga iya suba? Iya tentu enda ngereja nya, sama baka iya ke enda berundingka utai ti dikereja iya ngambika ulih nyadi orang Parisi ti dipebasa. (Plp. 3:​4-8, 13-15) Tang Paul enggau ransing ngereja pengawa nginjil sereta betumpu ba utai ti deka diulih iya jemah ila. Baka Paul, nuan enda ulih ngubah utai ti udah nyadi suba. Tang nuan ulih muji Jehovah sereta ngelantangka ati Iya diatu. Lalu nuan ulih berundingka harapan ti manah ke disemayaka Jehovah ke nuan jemah ila.

10. Nama ulih digaga kitai enti utai ti dikereja kitai suba ngemediska orang bukai?

¹⁰ Nuan engka berasai tusah ati ketegal sekeda utai ti digaga nuan suba udah ngemediska orang bukai. Nama ulih digaga nuan? Gaga  meh utai ke ulih nuan kena ngemanahka situasi nya. Pia mega, nuan ulih minta ampun ari sida sereta nunjukka nuan amat nesal ati. (2 Kor. 7:11) Pinta meh Jehovah nulung sida ke udah dikemediska nuan. Iya ulih nulung nuan enggau sida ke udah dikemediska nuan ngambika terus nyembah Iya sereta ngembuan pengelantang ba runding.

11. Nama ulih dipelajarka kitai ari chunto Nabi Jonah? (Peda mega gambar.)

¹¹ Belajar meh ari penyalah ke digaga nuan suba, lalu awakka Jehovah terus ngena nuan nitihka chara ti dikedekaka Iya. Peratika chunto Nabi Jonah. Ari ke mupuk tunga ke timur nuju ngagai Nineweh, baka ke diasuh Petara, Jonah ngerarika diri tunga ke barat nuju ngagai Tarsis. Jehovah disiplin Jonah, lalu Jonah belajar ari penyalah iya. (Jon. 1:​1-4, 15-17; 2:​7-10) Taja pia, Jehovah agi ngena Jonah nyadi nabi Iya. Iya meri Jonah peluang sekali agi ngagai Nineweh, lalu kali tu Jonah ngasika pesan nya enggau lengkas. Amat, Jonah nesal ati ke penyalah ke udah digaga iya. Tang tu enda nagang iya ari ngereja utai ke diasuh Jehovah.—Jon. 3:​1-3.

JEHOVAH NGENA KUASA KUDUS IYA NGELANTANGKA ATI KITAI

12. Baka ni Jehovah meri kitai pengelantang lebuh kitai napi utai ti balat ngenusahka ati? (Pilipi 4:​6, 7)

¹² Lebuh kitai napi utai ti balat ngenusahka ati, Jehovah ngena kuasa kudus Iya ngelantangka ati kitai. Peratika utai ke nyadi ngagai Ron enggau Carol. Anak lelaki seduai iya munuh diri. Ku seduai iya madahka: “Kami udah napi mayuh penusah, tang tu penusah ti pemadu balat. Maya kami enda ulih tinduk, kami suah besampi ngagai Jehovah. Lalu kami ulih ngasaika pengelantang ke dipadah ba Pilipi 4:​6, 7.” (Bacha.) Enti nuan benung tusah ati ketegal penusah ke nyadi ba nuan, bantaika meh asai ati nuan ngagai Jehovah. Nuan ulih besampi ngagai Iya, enda ngira ni penyuah tauka ni pemanjai sampi nuan. (Mas. 86:3; 88:1) Anang meh ngetu minta Jehovah meri nuan kuasa kudus Iya. Iya tentu deka nulung nuan.—Luk. 11:​9-13.

13. Baka ni kuasa kudus ulih nulung kitai terus nyembah Jehovah enggau tetap ati? (Epesus 3:16)

¹³ Kati nuan benung napi penusah, lalu nuan diatu berasai amat lemi? Kuasa kudus ulih meri nuan pengering ke diguna nuan ngambika nuan ulih terus nyembah Jehovah enggau tetap ati. (Bacha Epesus 3:16.) Peratika utai ti nyadi ngagai siku menyadi indu ke benama Flora. Iya enggau laki iya gawa nyadi pengerintis ke dianjung ngagai menua bukai. Maya nya, laki iya butang lalu seduai iya pan sarak. Ku Flora madah: “Aku amat tusah ati laban iya enda setia enggau aku, lalu aku semina berundingka utai nya aja. Aku besampi minta kuasa kudus ari Jehovah kena nulung aku tan napi penusah tu. Taja pan terubah iya aku ngasaika diri enda ulih tan napi semua penusah tu, tang Jehovah ngelantangka ati aku. Enggau tulung ari Iya, aku nyadi kering agi lalu ulih tan.” Ketegal Petara udah nulung iya, Flora andal agi Petara deka terus nulung iya enda ngira nama penguji ke ditapi iya. Iya madahka: “Jaku ba Masmur 119:32 nunjukka chara Jehovah udah nulung aku. Ayat nya madahka: ‘Aku deka nitihka pesan Nuan lebuh Nuan ngasuh aku lebih agi mereti.’”

14. Baka ni kitai ulih ngelakka kuasa kudus Petara nulung kitai?

¹⁴ Pengudah nuan besampi minta kuasa kudus ari Jehovah, nama patut digaga nuan? Kereja meh utai ke deka nulung nuan nerima mayuh agi kuasa kudus Petara. Tu nyengkaum datai begempuru enggau nginjil. Bacha Jaku Petara ninting hari. Tu deka nulung nuan belematika runding Iya. (Plp. 4:​8, 9)  Seraya nuan macha, peratika watak Bup Kudus ke udah napi penusah, lalu belematika meh chara Jehovah nulung sida tan. Sandra, ke dipadah tadi, amat merinsa laban iya napi mayuh penusah ba pengidup iya. Ku iya madahka: “Cherita Josep amat meransang aku. Iya enda nejuka penguji enggau utai ti enda adil ke ditapi iya ngelemika kaul iya enggau Jehovah.”—P-kal. 39:​21-23.

JEHOVAH NGENA BALA MENYADI NGELANTANGKA ATI KITAI

15. Ari sapa kitai tau bulih pengelantang, lalu baka ni sida ulih nulung kitai? (Peda mega gambar.)

¹⁵ Bala menyadi Kristian ulih “ngelantangka ati” kitai lebuh kitai benung merinsa. (Kol. 4:11) Tu meh siti chara Jehovah ngayanka pengerindu ke kitai. Bala menyadi ulih ngelantangka ati kitai lebuh sida meri awak begulai enggau kitai sereta mending enggau manah lebuh kitai madahka asai ati diri. Sida engka meransang kitai nengah ayat Bup Kudus tauka besampi enggau kitai. d (Rom. 15:4) Kekadang, bala menyadi engka ngingatka kitai pasal runding Jehovah, lalu nya ulih nulung kitai berasai lantang agi. Bala menyadi mega ulih meri tulung ti praktikal, baka nyediaka pemakai lebuh kitai benung napi penusah.

16. Nama patut digaga kitai kena ngulihka tulung ari orang bukai?

¹⁶ Kekadang, kitai engka patut minta tulung  ari orang bukai. Bala menyadi Kristian rinduka kitai, lalu sida deka nulung kitai. (J-lam. 17:17) Tang sida engka enda nemu asai ati kitai tauka utai ke diguna kitai. (J-lam. 14:10) Enti nuan benung tusah ati, nuan ulih madahka asai ati diri ngagai bala kaban ke matang. Padahka utai ke ulih ditulung sida. Nuan engka ulih bejaku enggau siku tauka dua iku tuai gempuru ke nyamai enggau nuan berandau. Sekeda menyadi indu berasai nyamai agi berandau enggau menyadi indu ke matang.

17. Nama sekeda utai ke ulih nagang kitai ari nerima peransang, lalu baka ni kitai ulih mutarka nya?

¹⁷ Kekadang, nuan engka berasai amat tusah ati nyentukka nuan enggai begulai enggau orang bukai. Taja pia, seliahka meh ari ngena kelalu mayuh awak kediri aja. Kekadang, bala menyadi engka enda entu meretika asai ati nuan, tauka nyebut utai ti salah. (Jas. 3:2) Tang, anang meh nejuka penanggul tu nagang nuan ari nerima peransang ke diguna nuan. Gavin, siku tuai gempuru ke bisi depression (kemurungan), madahka: “Kesuah iya, aku enggai bejaku tauka begulai enggau bala kaban aku.” Tang Gavin ngelaban asai ati nya lalu berusaha begulai enggau bala menyadi iya. Lalu kesuah iya, tu nulung iya berasai nyamai agi. Siku menyadi indu ke benama Amy madahka: “Ketegal utai ke kala nyadi ba aku, aku tusah deka pechayaka orang. Tang aku benung belajar rindu sereta arapka bala menyadi, baka Jehovah ke rindu sereta arapka sida. Aku nemu tu ngagaka ati Jehovah, lalu aku pan gaga ati.”

SEMAYA JEHOVAH KE JEMAH ILA ULIH NGELANTANGKA ATI KITAI

18. Nama harapan ke dianti kitai, lalu nama ulih digaga kitai diatu?

¹⁸ Enda lama da agi, Jehovah deka muai semua utai ke ngasuh kitai tusah ati tauka pedis. (Pem. 21:​3, 4) Maya nya, utai ke ngenusahka ati kitai “enda agi dikingatka.” (Isa. 65:17) Taja pia, baka ke udah dipelajarka kitai, indah diatu Jehovah benung “malut telih” kitai, tauka nyaga kitai lebuh kitai merinsa. Jehovah udah nyediaka mayuh utai kena ngelantangka ati kitai sereta nulung kitai. Nyadi, terima meh tulung ari Iya. Andal meh, “Iya ibuhka [nuan].”—1 Pet. 5:7.