1. Nama peluang manah ti disediaka tebus ngagai kitai?

GENSELAN tebus Jesus Kristus ngenataika mayuh berekat. Ngambika chunto, tebus ti disediaka muka peluang ngagai semua peturun Adam ke rinduka utai ti lurus nyadi sebegian ari ruang bilik Petara dudi hari ila. Siti agi berekat, iya nya kitai ulih idup lantang belama iya. Lebih agi ari nya, tebus bekaul enggau pekara ti beguna bendar ngagai semua ke di serega sereta ke ba dunya.—Heb. 1:9.

2. (a) Nama pekara ti beguna bendar ke di serega enggau ke ba dunya ti disengkaum Jesus dalam sampi iya? (Peda gambar ba pun artikel.) (b) Nama deka dikerandauka kitai ba artikel tu?

² Kira-kira dua taun sebedau Jesus mati, iya ngajar bala murid iya besampi: “Apai kami ti di serega: Kudus meh nama Nuan. Datai meh Perintah Nuan. Nyadi meh peneka Nuan di dunya enggau di serega.” (Mat. 6:9, 10) Aram kitai mansik baka ni tebus bekaul enggau pengawa nguduska nama Jehovah, chara Perintah Petara merintah, sereta ngamatka peneka Petara.

3. Nama Jehovah ngambarka nama? Baka ni Sitan bejai nama Jehovah?

³ Keterubah, Jesus besampi ngambika nama Jehovah dikuduska. Nama Jehovah ngambarka Jehovah Empu, sapa Iya nya. Iya endang ti pemadu bekuasa sereta lurus ba dunya raya. Jesus mega ngumbai Iya “Apai ti Kudus.” (Jhn. 17:11) Laban Jehovah nya kudus, semua utai ti dikereja Iya sereta sebarang atur ke digaga Iya endang kudus. Tang ba Kebun Eden, Sitan ngena akal ti jai nanya sekalika Petara bisi hak netapka standard ke mensia. Sitan bebula pasal Jehovah sereta ngenyaika nama Iya.—P-kal. 3:1-5.

4. Baka ni Jesus nguduska nama Petara?

⁴ Tang Jesus, rindu amat ke nama Jehovah, lalu enggau naka ulih nguduska nama Iya. (Jhn. 17:25, 26) Baka ni? Ari ulah enggau utai ke diajar, Jesus nulung orang bukai nemu, standard ari Jehovah endang betul lalu semua utai ti dikedekaka Jehovah ari kitai endang pulaika pemanah kitai. (Bacha Masmur 40:8-10.) Jesus mengkang taluk, indah lebuh Sitan ngenataika pemerinsa sereta pemati ba iya. Jesus nunjukka, mensia ti sempurna ulih ngasika Jehovah enggau pengabis ati.

5. Baka ni kitai ulih nguduska nama Jehovah?

⁵ Baka ni kitai ulih nunjukka diri rinduka nama Jehovah? Ari ulah kitai. Jehovah dekaka kitai kudus. (Bacha 1 Peter 1:15, 16.) Reti nya, kitai semina nyembah Iya aja sereta ngasika Iya enggau pengabis ati kitai. Indah lebuh kitai diperinsa, kitai enggau naka ulih deka idup sejalai enggau ajar ari Jehovah. Enggau idup nitihka standard ari Jehovah, kitai ngenataika mulia ngagai nama Iya. (Mat. 5:14-16) Kitai nunjukka atur ari Jehovah nya manah, lalu Sitan nya pemula. Kitai enda sempurna, nya alai kitai ngereja penyalah. Tang lebuh ngereja penyalah, kitai nesal ati, lalu enggau naka ulih badu ngereja utai ke enda ngemuliaka nama Jehovah.—Mas. 79:9.

6. Nama kebuah Jehovah ulih ngumbai kitai lurus taja pan kitai enda sempurna?

⁶ Sekalika kitai orang ke diiri ngena roh kudus tauka “bedus ti bukai,” Jehovah ngampun dosa kitai enti kitai arapka tebus. Jehovah nerima orang ke nyerahka diri ngagai Iya nyadi penyembah Iya. Iya ngumbai orang Kristian ti diiri ngena roh kudus ke lurus nya, anak Iya, lalu ngumbai “bedus ti bukai” ke lurus, pangan Iya. (Jhn. 10:16; Rom. 5:1, 2; Jas. 2:21-25) Nya alai indah diatu, tebus muka peluang ngagai kitai ngambika bisi kaul ti manah enggau Apai kitai sereta ulih nguduska nama Iya.

7. Nama berekat ti dikenataika tebus?

⁷ Dalam chunto sampi, Jesus madahka: “Datai meh Perintah Nuan.” Baka ni tebus bisi kaul enggau Perintah Petara? Perintah Petara diperintah Jesus enggau 144,000 iku orang ke dipilih ari semua mensia. Tebus muka peluang ngagai 144,000 iku orang nya diangkatka idup baru ngambika ulih ke serega. (Pem. 5:9, 10; 14:1) Sida deka nyadi raja enggau imam, lalu deka merintah atas dunya enggau Jesus pengelama seribu taun. Maya nya, Jehovah deka ngena Perintah Iya ngaga dunya nyadi paradais, lalu nulung  semua mensia nyadi sempurna. Pengujung iya, nembiak Jehovah ti di serega sereta ba dunya deka nyadi siti ruang bilik. (Pem. 5:13; 20:6) Jesus deka ngemunaska Sitan, lalu muai semua penusah ke datai ari iya.—P-kal. 3:15.

8. (a) Baka ni Jesus nulung bala murid iya nemu kebuah Perintah Petara nya beguna? (b) Baka ni kitai nyukung Perintah Petara kemaya hari tu?

⁸ Jesus nulung bala murid iya meretika kebuah Perintah Petara nya beguna. Baka ni? Pengudah dibaptisa, Jesus berengkah nusui ‘Berita Manah pasal Perintah Petara’ ba dini-dini endur. (Luk. 4:43) Iya mega ngasuh bala murid nyadi saksi iya nyentuk “ngagai ujung dunya.” (SKR. 1:6-8) Kemaya hari tu, nengah pengawa nusui pasal Perintah Petara, orang bisi peluang belajar pasal tebus sereta nyadi rayat Perintah Petara. Kitai mandangka diri rayat Perintah Petara ti taluk enti nulung sida ke diiri ngena roh kudus nusui berita manah di serata dunya.—Mat. 24:14; 25:40.

9. Nama kebuah kitai ulih pechaya Jehovah deka ngamatka tuju Iya bekaul enggau mensia?

⁹ Nama reti utai ku Jesus lebuh iya nyebut: “Nyadi meh peneka Nuan”? Lebuh Jehovah madahka siti-siti utai deka nyadi, utai nya amat deka nyadi. (Isa. 55:11) Pengawa Sitan ke ngelaban enda ulih nagang Jehovah. Nama peneka Jehovah bekaul enggau dunya? Iya deka dunya penuh enggau bala anak ti sempurna ke datai ari Adam seduai Hawa. (P-kal. 1:28) Enti Adam seduai Hawa mati sebedau ngembuan anak, tuju Petara ke deka ngemenuhka dunya enggau bala anak seduai iya enda ulih dikeamatka. Nya alai, Jehovah ngemendarka seduai iya ngembuan anak. Tebus meri peluang ngagai semua orang ke arapka tebus nyadi sempurna sereta idup belama iya. Jehovah rinduka orang, lalu deka kitai ngembuan pengidup ti ngerinduka ati baka ke dikedekaka Iya ti kitai.

10. Baka ni tebus ngenataika berekat ngagai orang ke udah mati?

¹⁰ Baka ni enggau bebiliun iku orang ke udah mati tang nadai peluang ngelala Jehovah? Jehovah deka orang idup, ukai mati. Nya alai, Iya deka ngidupka baru orang ke udah mati. Tebus muka peluang ngambika sida ulih idup baru. Udah nya, sida ulih belajar pasal Jehovah sereta idup belama iya. (SKR. 24:15) Jehovah endang Pun pengidup. Lebuh Jehovah meri pengidup ngagai orang ke udah mati, Iya nyadi Apai sida. (Mas. 36:9) Dalam chunto sampi, Jesus madahka Jehovah nya “Apai kami ti di serega.” (Mat. 6:9) Jehovah udah meri Jesus siti pengawa ti besai amat, iya nya ngangkatka orang mati idup baru. Jesus madahka: “Aku tu meh pengangkat enggau pengidup.”—Jhn. 6:40, 44; 11:25.

11. Nama peneka Petara bekaul enggau “mayuh amat orang”?

¹¹ Jesus mega madahka: ‘Barang sapa ngereja peneka Petara, nya meh menyadi lelaki, menyadi indu, enggau indai aku.’ (Mrk. 3:35) Endang peneka Petara, orang ari genap bengkah bansa, raban bansa sereta jaku nyadi penyembah Iya. Sida dikumbai “mayuh amat orang, datai ke sida nyau enda ulih diitung.” Sida arapka tebus sereta deka ngasika Petara. Sida muji Iya, lalu nyebut: ‘Pengelepas  endang datai ari Petara kitai ke duduk ba kerusi diraja, enggau ari Anak Domba!’—Pem. 7:9, 10.

12. Ari sampi Jesus, nama dipelajarka kitai pasal tuju Jehovah bekaul enggau mensia?

¹² Kitai udah belajar mayuh pasal Jehovah sereta tuju Iya bekaul enggau mensia ari chunto sampi Jesus. Kesatu, kitai enda tau enda enggau naka ulih nguduska nama Jehovah sereta ngemuliaka Iya. (Isa. 8:13) Genselan tebus Jesus, ke ulih ngelepaska kitai mega ngemuliaka nama Petara. Amat, nama Jesus reti iya “Jehovah endang Pengelepas.” Kedua, Jehovah deka ngena Perintah Iya ngenataika semua berekat ari tebus ke mensia ti ngasi. Lalu ketiga, kitai tau andal, nadai utai ke ulih nagang peneka Jehovah ari dikeamatka.—Mas. 135:6; Isa. 46:9, 10.

13. Nama kebuah kitai deka dibaptisa?

¹³ Siti chara kitai ulih mandangka diri beterima kasih ke tebus, iya nya nyerahka pengidup kitai ngagai Jehovah lalu dibaptisa. Enggau chara tu, kitai nunjukka diri arapka tebus, lalu ‘kitai endang enggi Jehovah.’ (Rom. 14:8) Lebuh kitai dibaptisa, kitai minta Jehovah meri kitai “ati ti beresi.” (1 Pet. 3:21) Jehovah meri kitai ati ti beresi enggau ngenataika berekat ari tebus ngagai kitai. Lalu kitai amat pechaya, Iya deka meri kitai semua utai ti udah disemaya Iya.—Rom. 8:32.

14. Nama kebuah Jehovah ngasuh kitai rinduka orang bukai?

¹⁴ Semua utai ke dikereja Jehovah datai ari pengerindu Iya. Iya deka semua penyembah Iya neladan Iya sereta rinduka pangan diri. (1 Jhn. 4:8-11) Lebuh kitai rinduka orang, kitai enggau terang nunjukka diri deka nyadi “anak Apai [kitai] ti di serega.” (Mat. 5:43-48) Dua iti pesan ti pemadu besai iya nya kesatu, rinduka Jehovah, lalu kedua, rinduka orang bukai. (Mat. 22:37-40) Siti chara kitai mandangka pengerindu ngagai orang, iya nya ngajar sida berita manah pasal Perintah Petara. Enti kitai ngasika pesan Jehovah ke ngasuh kitai rinduka orang bukai, kelebih agi bala menyadi  Kristian kitai, pengerindu kitai ke Iya deka “nyadi pemadu badas.”—1 Jhn. 4:12, 20.

15. (a) Nama berekat ke diterima kitai ari Jehovah diatu? (b) Nama berekat ke deka diterima kitai jemah ila?

¹⁵ Jehovah deka kitai pechaya, enti kitai arapka tebus, dosa kitai deka dibuai. Iya ulih ngampun dosa kitai. (Bacha Kereja Rasul 3:19-21.) Baka ke udah dikerandauka kitai tadi, tebus muka peluang ngagai Jehovah ngambika ulih ngiru sekeda mensia nyadi anak Iya di serega. Sida tu orang ke diiri ngena roh kudus. (Rom. 8:15-17) Iya ngelaluka sida ke dikumbai “bedus ti bukai” nyadi sebegian ari ruang bilik Iya ti ba dunya. Pengudah sida nyadi sempurna, sida deka napi penguji ti penudi. Enti sida taluk ngagai Jehovah, Iya deka ngiru sida nyadi anak Iya mega. (Rom. 8:20, 21; Pem. 20:7-9) Jehovah seruran deka rinduka semua bala anak Iya. Tebus deka terus ngenataika berekat belama iya. (Heb. 9:12) Jehovah udah meri kitai pemeri ti berega tu, lalu nadai orang ke ulih ngambi pemeri nya ari kitai.

16. Baka ni tebus ulih ngelepaska kitai?

¹⁶ Enti kitai nesal ati ke dosa diri, nadai utai ke ulih digaga Sitan kena nagang kitai nyadi sebegian ari ruang bilik Jehovah. Jesus mati “sekali aja ke belama-lama iya.” Nya alai, tebus enda ibuh agi dibayar. (Heb. 9:24-26; 10:10) Adam mai pemati ke kitai, tang genselan Jesus deka mai pengidup ti meruan belama iya ke kitai. Tebus ulih ngelepaska kitai ari dunya Sitan sereta ari takutka pemati.—Heb. 2:14, 15.

17. Baka ni asai ati nuan pasal pengerindu Jehovah?

¹⁷ Semaya Petara seruran deka dikeamatka. Sama baka atur ke bekaul enggau alam ti digaga Jehovah enda berubah, Jehovah mega enda berubah. Iya enda kala ngelebuka kitai. (Mal. 3:6) Jehovah ukai semina meri kitai pengidup nyadika pemeri. Iya meri kitai pengerindu Iya. ‘Kitai nemu sereta arapka Petara rinduka kitai. Petara nya pengerindu.’ (1 Jhn. 4:16) Semaya Iya seruran deka nyadi. Enda lama da agi, dunya deka nyadi paradais ti manah. Semua orang ke idup deka neladan Jehovah, lalu rinduka pangan diri. Udah nya, semua nembiak Iya ti di serega enggau ke ba dunya deka nyebut: ‘Beri meh puji, mulia, penemu-dalam, terima kasih, basa, kuasa enggau pengering ngagai Petara kitai belama-lama iya! Amin!’—Pem. 7:12.