KENA 17 Disember 2010, Mohamed Bouazizi enda sabar agi. Lelaki ke beumur 26 taun tu, bejual buah ba Tunisia. Iya stres laban nadai bulih kereja ti manah agi. Iya mega nemu, orang ke gawa ba opis rindu makai suap. Pagi nya, bala polis ngerampas buah pir, pisang enggau ipul ke dijual Mohamed. Lebuh sida ngambi penimbang iya, Mohamed ngelaban. Lalu sekeda orang meda utai ke nyadi madah, seiku indu polis nampar iya.

Ketegal berasai dikemaruhka sereta ringat, Mohamed komplain ngagai opis perintah ke semak. Tang nadai orang deka ninga utai ke disebut iya. Ba mua opis nya, ku iya merak, ‘Baka ni kami deka bulih duit?’ Pengudah nanjah diri ngena minyak api, iya lalu nuchul mancis. Kurang ari tiga minggu udah nya, iya mati ketegal betu.

Pengawa ke digaga Mohamed Bouazizi ditemu mayuh orang ba Tunisia sereta endur ke semak nya. Mayuh orang ngumbai, utai ke nyadi tu ngepunka pengawa ngelaban perintah menua nya. Pia mega, enda lama udah nya, cherita tu ngelekai ngagai menua Arab ke bukai. Parlimen Eropah meri Mohamed enggau empat iku da agi anugerah Sakharov 2011 ketegal Bibas Mantaika Penemu, lalu The Times of London ngumbai iya tokoh ke 2011 ketegal pemerani iya.

Chunto ba atas nunjukka, pengawa ngelaban ulih nyadi balat. Tang baru-baru tu, nama kebuah pengawa ngelaban nyadi? Kelimpah ari ngelaban, kati bisi chara bukai?

Mayuh ari pengawa ngelaban nyadi ketegal:

• Mayuh orang enda puas ati enggau sistem sosial. Enti orang pechaya perintah ba menua sida sereta sistem ekonomi ulih nyediaka utai ke diguna sida, kurang agi sida deka ngelaban. Laban orang senang agi nitihka sistem ke udah bisi kena mutarka penanggul sida. Tang enti orang ngasaika sistem nya makai suap enggau enda lurus, sereta diatur kena nguntungka sekeda piak, nya tentu deka ngasuh orang ngelaban.

• Bisi orang ke ngepun. Kesuah iya, sesiti utai ke nyadi nyungkak orang ngereja sesiti pengawa. Ngambika chunto, kes Mohamed Bouazizi nyungkak pengawa ngelaban ba Tunisia. Pia mega ba India, pengawa muguk enda makai ke diatur Anna Hazare, kena ngelaban penanggul makai suap udah nyungkak bala penyukung iya ngelaban ba 450 bandar mit enggau bandar besai.

Baka ke disebut Bup Kudus betaun-taun suba, kitai idup ba “dunya alai sekeda orang ke bisi kuasa diau, alai orang bukai ke natka diri merinsa dipegai sida.” (Pengajar 8:9) Pengawa makai suap enggau utai ke enda lurus majak balat kemayaharitu. Indah, dibandingka suba, kemayaharitu mayuh agi orang nemu sistem politik enggau ekonomi ngasaka ati sida. Ketegal kitai idup ba pemansang teknologi, semua utai ke enda lurus ti nyadi senang ditemu ba serata endur.

Orang ke nyukung pengawa ngelaban madahka sekeda utai ke udah dijapai sida:

• Nyediaka pengelantang ngagai sida ke seranta. Kena taun 1930-an, the Great Depression nyadi ba mayuh menua. Siti ari menua nya ba Chicago, Illinois, Amerika Serikat. Ketegal nya, mayuh orang pan lenyau kereja sereta enda ulih mayar siwa. Nya ngujungka sida tu ngelaban enggau chara ti ganas. Kena mutarka penanggul tu, pegawai perintah ngetu muru sida ke enda tebayarka siwa, lalu ngatur ngambika sekeda ari sida bulih kereja. Pengawa ngelaban tu pan digaga ba New York. Asil iya, 77,000 ruang bilik ulih pulai baru ngagai rumah sida.

• Utai ke enda lurus diputarka. Kena taun 1955/1956, bisi orang ngelaban atur bas ba Montgomery, Alabama, Amerika Serikat. Tu ngujungka undang-undang “segregated” (nyerara orang kulit chelum enggau orang kulit putih) penuduk bas badu agi dipejalaika.

• Projek nirika bengunan diketuka. Kena Disember 2011, bepuluh ribu orang ngelaban nirika bengunan elektrik ngena arang batu ke semak Hong Kong. Alasan sida ngelaban, ketegal sida takutka pencemaran nyadi, nya alai projek nya pan dikinsil.

Taja pia, orang ke ngelaban enda selalu bulih utai ke dikinginka sida. Chunto iya, bala pemerintah ulih ngukum sida ari ke meri utai ke dipinta sida. Empai lama tu, presiden ba Timur Tengah madahka pasal pengawa ngelaban ke nyadi dia. “Sida mesti ditumbuk ngena besi,” lalu tu ngujungka beribu iku orang mati.

Taja pan orang ke ngelaban bulih utai ke dipinta sida, tang tetap bisi kesan ke bukai. Seiku lelaki ke enggau ngelabuhka seiku pemerintah ba siti ari menua di Afrika madah ngagai majalah Time pasal perintah ke baru. Ku iya, ‘Utai ke nyauka sempurna nyadi penyarut.’

Mayuh orang ti tebilang ngasaika pengawa ngelaban nya utai ke patut dikereja. Chunto iya niang Václav Havel, bekas presiden Czech ke dijil betaun-taun ketegal pengawa hak asasi iya, nulis ba taun 1985: ‘Orang ke ngelaban patut sanggup berambunka nyawa diri kena ngetanka utai ke dipechaya iya nya endang betul.’

Utai ke disebut Havel ulih dipeda ari pemerani ke digaga Mohamed Bouazizi enggau iya ke bukai. Ba siti menua Asia, mayuh orang sanggup nunu diri kena ngelaban agama enggau politik. Lebuh ngambarka asai ati pengawa ti ngenakutka nya, seiku lelaki madah ngagai majalah Newsweek: “Kami nadai senyata. Kami enggai ngemediska pangan diri. Tang nama agi utai ke ulih digaga kami?”

Bup Kudus bisi madahka chara mutarka utai ti enda lurus sereta makai suap. Bup Kudus bisi nerangka siti perintah ke ditumbuhka Petara ba serega kena nganti sistem politik enggau ekonomi ke ngujungka pengawa ngelaban. Pemerintah ba perintah tu madahka, “Iya ngelepaska orang ke seranta, ke ngangauka iya, enggau sida ke suntuk sereta enda dikibuhka orang. Iya ngelepaska sida ari orang ke nekanka pengidup sida, enggau ari orang ke mangah.”—Masmur 72:12, 14.

Saksi-Saksi Jehovah pechaya, semina Perintah Petara nyadi pengadang ke semua mensia idup penuh enggau pemaik. (Matthew 6:9, 10) Nyadi, Saksi-Saksi Jehovah enda enggau pengawa ngelaban. Tang, kati amat Perintah Petara ulih muai semua kebuah orang deka ngelaban? Engka saut iya au. Taja pia, mayuh orang udah ngemansangka pengandal sida ngagai Perintah Petara. Uji giga mayuh agi penerang pasal tu.