Besedia Napi Penguji

“Aku ngaga pemutus deka ngetu nginsap, ketegal deka nyaga pengerai anak kami ke baru ada. Nya alai, aku ngengkahka tanda, ‘Enda Ulih Nginsap’ ba dalam rumah kami. Tang sejam udah nya, pengingin deka nginsap nyau gesak dalam ati aku. Pengujung iya, aku pan alah lalu nginsap.”​—Yoshimitsu, Jepun.

ARI pengalaman Yoshimitsu nunjukka, orang ke deka ngetu nginsap sigi bisi penguji. Pansik mega nunjukka, nyauka 90 peratus orang ke deka ngetu nginsap pulai baru ngagai tebiat sida ke lama. Nya alai, enti nuan deka ngetu, nuan engka ulih mujur enti nuan besedia agi napi sebarang penguji. Nama sekeda penguji ke engka ulih nyadi?

Inginka nikotina: Suah iya, pengingin ke nikotina deka nyadi balat dalam masa tiga hari pengudah insap ke penudi, lalu belubah-lubah surut pengudah dua minggu. Ba timpuh tu, “pengingin nya engka datai udah nya nadai,” ku siku orang ke kala nginsap suba. Indah, taja betaun tebiat tu udah diketuka, iya ulih datai baru barang maya. Enti pia, anang meh ngalahka diri. Anti meh dalam urung lima minit alai pengingin nya lenyau.

Kesan bukai pengudah ngetu nginsap: Keterubah, nuan engka suah ngantuk, tusah fokus, sereta berat tubuh jampat niki. Nuan mega engka berasai sakit, gatal, batuk, enggau jampat bepeluh. Emosi nuan mega enda stabil, enda sabar, senang ringat, enggau senang tusah ati. Mayuh ari kesan tu engka ulih lenyau dalam empat ngagai enam minggu.

Tu meh maya ti amat penting. Titihka meh sekeda lalau ba baruh:

● Tentuka nuan chukup tinduk.

● Irup mayuh ai amat tauka jus, lalu makai pemakai ti manah ke pengerai.

● Gaga meh sesais ti sederhana.

● Tarit seput dalam-dalam, lalu gambarka paru-paru nuan penuh enggau udara ti manah sereta beresi.

Penguji deka nginsap: Bisi sekeda pengawa tauka asai ati ke ulih ngujungka nuan deka nginsap. Chunto iya, nuan engka udah teleba ngirup lalu nginsap. Enti pia, anang kelalu relaks maya ngirup ngambika pengingin nuan deka nginsap nya ulih diseliahka. Dudi hari, enti nuan udah mujur ngelaban tebiat tu, baru meh nuan ulih relaks aja maya ngirup.

Taja pan udah lama, tubuh sereta runding nuan engka agi lekat ngumbai sekeda pengawa nya patut dikereja lalu nginsap. Torben ke disebut tadi madahka, “Taja pan udah 19 taun aku ngetu nginsap, kekadang pengingin deka nginsap ulih tiba-tiba datai maya aku ngetu makai.” Tang, pengingin tu ulih belubah-lubah lenyau.

Enti nuan teleba ngirup alkohol lalu nginsap, nuan engka patut nyeliahka diri ari ngirup alkohol sereta endur orang ngirup alkohol. Laban tu suah nyadi. Mayuh orang enda ulih nagang diri, lalu nginsap baru pengudah sida ngirup alkohol. Nama kebuah?

● Kesan nikotina ulih nyadi balat agi taja pan mimit aja alkohol.

● Suah iya, orang ngirup alkohol enggau nginsap.

● Alkohol ngujungka nuan enda tetagangka diri sereta enda ulih berunding enggau manah. Bup Kudus madahka, “Wain . . . ngasuh nembiak Aku enda nemu berunding!”​—Hosea 4:​11.

Bejimat milih kaban: Bejimat meh milih enggau sapa nuan patut begulai. Seliahka diri begulai enggau orang ke nginsap tauka orang ke engka mai nuan nginsap. Seliahka meh orang ke ngelemika pengeran nuan deka ngetu nginsap.

Jaga emosi diri: Ba siti pansik, nyauka dua pertiga orang berengkah nginsap baru ketegal berasai stress tauka ringat. Enti bisi sekeda asai ati ke ngasuh nuan deka nginsap, limpangka meh runding nuan enggau ngirup ai, ngunyah chewing gum, tauka pansut bejalai. Tepuka runding nuan enggau utai ti positif. Nuan mega ulih besampi tauka macha Bup Kudus.​—Masmur 19:14.

Anang Ngiga Kedalih tauka Alasan

● Sesirut aja.

Iya ke amat: Sesirut aja ulih ngidupka kira-kira 50 peratus ari sekeda reseptor nikotina ba untak pengelama tiga jam. Tu meh ke ngujungka orang nya pulai baru nginsap.

● Kena muai stress.

Iya ke amat: Pengudah nginsap, nuan berasai nyamai sekejap aja, laban runding nuan ulih limpang ketegal benung nyirutka insap nya. Tang iya ke amat, nikotina ulih nikika hormon stress.

● Nadai jaku ulih ngetu.

Iya ke amat: Ulah ti negatif sigi ngelemika semengat. Bup Kudus pan bisi madah, “Enti nuan lemi lebuh nuan dituntung penusah, reti nya nuan endang sigi amat lemi.” (Jaku-Dalam 24:10) Nya kebuah, anang meh jampat nyimpulka diri enda ulih ngetu. Sesapa ke amat-amat deka ngetu, lalu bebendar nitihka chara baka ke dipadah ba artikel tu, tentu mujur!

● Sakit gi enti aku ngetu.

Iya ke amat: Au, tu sigi enda senang. Tang semua kesan nya ulih majak lenyau dalam beberapa minggu aja. Anang meh putus asa! Enti dalam timpuh beberapa bulan tauka betaun-taun pengudah nya, pengingin deka nginsap datai baru, anang meh alah! Pengingin nya ulih lenyau dalam beberapa minit aja.

● Aku bisi penyakit mental.

Iya ke amat: Enti nuan bisi penyakit mental, chunto iya kemurungan tauka skizofrenia, giga meh bantu ari lutur ngambika ulih ngetu nginsap. Nuan engka ulih dibantu. Chunto iya, lutur engka ulih meri nuan ubat ke ulih ngurangka kesan nya.

● Enti aku gagal, balat gi aku ngasaika diri nadai guna.

Iya ke amat: Enti nuan udah ngetu tang udah nya nginsap baru, anang meh lemi semengat. Ukai reti iya, nya jalai mati. Iya ke amat, mayuh orang ke udah nguji ngetu mega napi penanggul ti sama. Enti kali tu gagal, angkat baru lalu terus belaban. Nuan alah enti nuan enda bebendar ngelaban. Terus meh mansang lalu nuan tentu mujur!

Peratika pengalaman Romualdo ke nginsap pengelama 26 taun. Iya udah ngetu nginsap lebih ari 30 taun ke suba. Ku iya nulis, “Mayuh kali aku udah nguji, tang enda mujur. Tiap kali aku gagal, aku berasai amat tusah ati sereta asa. Tang aku terus besampi minta bantu ari Petara Jehovah, laban aku amat-amat ka ngelantangka ati Iya. Pengujung iya, aku mujur!”

Ba artikel ke penudi tu, kitai deka berandauka chara ke ulih dikena nuan ngelepaska diri ari tebiat nginsap.

[Kutak/Gambar]

SEMUA BANSA TEMBAKAU ENDA MANAH KE PENGERAI

Tembakau ulih dikena ba mayuh chara. Sekeda utai ke ngembuan tembakau mega bisi dijual ba farmasi tauka kedai bukai. Nitihka Gerempung Pengerai Entarabansa, “Semua bansa tembakau enda manah ke pengerai kitai.” Nya ulih nabanka nyawa, chunto iya kanser enggau penyakit kardiovaskular. Pia mega, nyawa anak dalam kandung ulih bahaya enti indai nginsap. Kati bisi ari bansa tembakau ke enda bahaya?

Bidis: Sebengkah insap gulung ke suah iya dikena ba Asia. Bidis ngembuan mayuh agi tar, nikotina, enggau karbon monoksida dibandingka enggau insap ke bukai.

Cherut: Insap ke digaga ari mayuh tembakau, ngena daun tembakau tauka keretas ke digaga ari tembakau. Ari insap bukai, tembakau dalam cherut nya alkali. Nyadi, nikotina ulih terus disirut nengah mulut taja pan insap nya enda diidupka.

Insap cengkih tauka keretek: Insap tu ngembuan kira-kira 60 peratus tembakau enggau 40 peratus cengkih. Ari insap ke bukai, insap tu ngembuan mayuh agi tar, nikotina enggau karbon monoksida.

Paip tauka pipa: Nginsap paip mega ulih ngujungka kanser sereta penyakit bukai.

Tembakau ke enda diidupka: Tu nyengkaum tembakau ke dikunyah, snuf/snus, enggau gutkha, iya nya tembakau ke bisi perisa, ti suah dikena ba Asia Tenggara. Nikotina mega disirut ngagai urat darah nengah mulut. Ngena tembakau enggau chara tu amat bahaya.

Paip ai (shisha, hookah, enggau utai bukai): Asap insap nengah ai sebedau disirut. Tang, ai enda ulih napis bahan kimia sereta toksik ke ulih ngenataika kanser.

[Kutak/Gambar]

NULUNG ORANG BUKAI NGETU NGINSAP

● Ngembuan ulah ti positif. Beri meh puji sereta seliahka diri ari kutap-kutap. Ari ke nyebut “Endai, alu bedau ngetu ga nuan pia?” Manah agi kitai nyebut, “Anang putus asa. Uji baru meh nyentukka nuan mujur.”

● Sanggup ngampun. Anang jampat ringat enggau orang ke nguji deka ngetu nginsap, kelebih agi lebuh sida ka nganu tauka gidan meda nuan. Uji meh manah ati enggau sida. Nuan ulih madah, “Tu enda senang ba nuan, tang aku amat gaga meda nuan bebendar ka berubah.” Anang sesekali nyebut, “Ulah nuan majak jai-sejai!”

● Nyadi kaban ti bendar. Dalam Bup Kudus bisi madah, “Pangan endang seruran ngayanka pengerindu sida.” (Jaku-Dalam 17:17) Terus meh sabar enggau iya, lalu seruran ngayanka pengerindu.