Apin lama sebedau pemati iya, Jesus madahka: ‘Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’ (Matthew 24:14) Tang, baka ni pengawa nginjil tu ulih dipejalaika ba serata dunya? Enggau neladan utai ke digaga Jesus lebuh iya ba dunya.—Luke 8:1.

Kami nguji betemu enggau orang ba rumah sida. Jesus ngelatih bala murid iya ngerembaika berita manah ari rumah ke rumah. (Matthew 10:11-13; Kereja Rasul 5:42; 20:20) Bala penginjil maya abad ti keterubah tu diasuh nginjil ba endur ke udah dipadahka ngagai sida. (Matthew 10:5, 6; 2 Korint 10:13) Baka nya mega kemaya hari tu, pengawa nginjil kami diatur enggau manah, lalu tiap iti eklisia diberi endur nginjil kediri empu. Tu nulung kami ngamatka pesan Jesus ke ngasuh “ngajar orang mayuh, lalu besaksi” enggau silik.—Kereja Rasul 10:42.

Kami nginjil ba dini-dini endur ke bisi orang. Jesus mega netapka teladan nginjil ba endur orang mayuh, baka ba tebing tasik tauka ba tisi telaga. (Mark 4:1; John 4:5-15) Kami mega berandau enggau orang pasal Bup Kudus ba dini-dini endur—ba jalai, ba endur bedagang, ba taman tauka ngena talipaun. Pia mega, lebuh bisi peluang ti manah kami nginjil ngagai orang ke diau semak kami, orang ke sama endur kereja, sama sekula, sereta bala kaban belayan. Ketegal pengeransing tu, bejuta iku orang ba serata dunya udah ninga “berita manah pasal Iya ti udah ngelepaska kitai.”—Masmur 96:2.

Kati nuan deka bekunsika berita manah pasal Perintah Petara enggau berekat iya ngagai diri sebilik tauka orang ke dikelala nuan? Bekunsi meh berita manah tu enggau naka penyampat ngagai sida.

• Nama “berita manah” ke enda tau enda dikerembaika?

• Baka ni Saksi-Saksi Jehovah nitihka teladan Jesus ba pengawa nginjil?