Jesus Kristus madah ngagai bala murid iya: “Awakka penampak kita manchar ngagai orang, ngambika sida meda pemadas pengawa kita lalu ngemuliaka Apai kita ti di serega.” (Matthew 5:16) Ketegal nya, kami ngena teknoloji kemaya hari tu enggau naka ulih, nyengkaum Internet. Laman web rasmi kami, iya nya jw.org, dikena ngenataika penerang pasal pengawa enggau utai ti dipechaya Saksi-Saksi Jehovah. Nama utai ke bisi ba laman web tu?

Saut ari Bup Kudus ngagai utai ke suah ditanya. Nuan ulih tetemuka saut ngagai sekeda tanya ti berat ke bisi ditanya orang. Ngambika chunto, surat mit Amat Pemerinsa Deka Nadai Agi? enggau Ulih Orang ke Udah Mati Idup Baru? udah bisi ba online dalam lebih ari 600 iti bansa jaku. Nuan mega ulih tetemuka Bup Kudus New World Translation dalam lebih ari 130 iti bansa jaku enggau sekeda utai ke dikena belajarka Bup Kudus, nyengkaum bup Nama Utai ti Bendar Diajar Bup Kudus? sereta majalah Menara Jaga ke baru. Mayuh ari litaricha tu ulih dibacha tauka didinga nengah online, tauka di download ngena format MP3, PDF tauka EPUB. Indah nuan ulih nyelak beberapa lambar ke deka dikena bekunsi enggau orang ke bisi minat macha dalam bansa jaku iya empu! Video bansa jaku orang bisu mega mayuh disediaka. Nuan ulih download audio macha Bup Kudus enggau dramatik, drama Bup Kudus, sereta musik ti manah ke dikena merindang ati.

Fakta ti betul pasal Saksi-Saksi Jehovah. Ba laman web tu bisi berita ti pemadu baru enggau klip video pasal pengawa kami di serata dunya, utai ke bekaul enggau Saksi-Saksi Jehovah, sereta pengawa mantu ke bisi dipejalaika kami. Nuan mega ulih ngiga penerang pasal konvensyen ti deka datai sereta penerang pasal pampang opis kami.

Enggau tu, kami mancharka penampak pemendar nyentuk ke ujung bumi. Orang ari genap benua, nyengkaum Antartika mega bulih penguntung. Kami besampi ngambika ‘pesan Jehovah majak ngelekai’ ba serata dunya, kena ngemuliaka Iya.—2 Tesalonika 3:1.

• Baka ni jw.org nulung mayuh agi orang belajarka pemendar Bup Kudus?

• Nama utai ke deka digiga nuan ba laman web kami?