1-6. Padahka siti peneleba pasal Saksi-Saksi Jehovah nginjil ba mayuh macham situasi.

 REBECCA, siku Saksi Jehovah ke biak ba Ghana, nyadika sekula iya endur alai iya nginjil. Iya suah mai litaricha Bup Kudus ngagai sekula. Maya rehat, iya ngiga peluang meri saksi ngagai nembiak ke sama sekula enggau iya. Ketegal nya, Rebecca udah mujur belajarka Bup Kudus enggau sida ke sekelas enggau iya.

² Ba pulau Madagascar, di begian pantai timur Africa, bisi sepasang laki bini ke nyadi pengerintis selalu bejalai kaki 25 kilometer ngagai siti kampung ti amat jauh. Seduai iya ngereja tu taja pan gaya hari ba dia amat angat. Taja pia, seduai iya bisi mayuh pemelajar Bup Kudus ba kampung nya.

³ Bala Saksi ba Paraguay enggau bala sukarela ari 15 bengkah menua sama bekereja ngaga sebuah kapal. Sida deka nginjil ngagai orang ke diau ba tebing sungai Paraguay enggau sungai Paraná. Berat kapal nya 45 tan, lalu ulih mai 12 iku orang. Ngena kapal tu, bala penginjil Perintah Petara udah nusui Berita Manah enggau ransing ngagai endur ke tusah dituju.

⁴ Ba Alaska, bala Saksi ngambi peluang nginjil lebuh musin panas. Maya nya, mayuh bala pelancong datai ari mayuh menua ngena kapal. Nya alai, bala Saksi deka nganti ba penyangkai kapal. Sida mandangka mayuh litaricha Bup Kudus ari bemacham bansa jaku, kena narit minat pelancong ke datai. Ba Alaska mega, bilun amat beguna kena nuju ngagai kampung ti amat jauh. Nyadi, Berita Manah ulih ditusui ngagai orang bansa Aleut, Athabascan, Tsimshian enggau Klinket.

⁵ Larry, ke diau ba Texas, di Amerika Serikat diau ba rumah orang tuai. Iya nyadika endur nya alai iya ulih nginjil. Larry kala balat bakal, nya kebuah iya enda ulih bejalai. Nyadi, iya ngena kerusi roda. Taja pia, iya mengkang sibuk bekunsika Berita Manah pasal Perintah Petara ngagai orang bukai. Iya mega madahka ba Perintah Petara jemah ila, iya ulih bejalai baru.—Isa. 35:5, 6.

 ⁶ Lebuh deka ngagai Gempuru Besai di utara Myanmar, seraban bala Saksi ngena feri ari Mandalay pengelama tiga hari. Sida ransing amat deka nginjil pasal Berita Manah. Nya alai, sida mai litaricha ngambika ulih meri ngagai orang ke sama nepan feri nya. Tiap kali feri nya ngetu ba siti bandar tauka kampung, bala penginjil enggau jampat nurun ari feri. Lalu, sida ngagai rumah semak dia sereta meri litaricha ngagai orang ba dia. Lebuh sida pulai baru ngagai feri, sida mega nginjil ngagai orang ke baru nepan feri nya.

7. Nama sekeda chara bala penyembah Jehovah meri saksi pasal Perintah Petara, lalu nama tuju sida?

⁷ Baka chunto bala menyadi ke dipadah sebedau tu, penyembah Jehovah ransing “meri saksi enggau silik pasal Perintah Petara” ba serata dunya. (SKR. 28:23) Sida nginjil ari rumah ke rumah, bejaku enggau orang ke ditemu sida ba rantau jalai, nulis surat, sereta ngena talipun. Sida mega ngiga peluang meri saksi pasal Perintah Petara lebuh nepan bas, bejalai ba taman tauka lebuh maya rehat ba endur gawa. Taja pan chara nginjil nya bebida, tang tuju nya agi sama, iya nya nginjil pasal Berita Manah enda ngira dini alai orang ulih ditemu.—Mat. 10:11.

8, 9. (a) Nama kebuah Berita Manah pasal Perintah Petara ti udah dikerembaika nya siti kereja ajih? (b) Nama tanya ke deka disaut kitai, lalu nama patut digaga kitai kena ngiga saut nya?

⁸ Kemayaharitu, bala Saksi nginjil ba lebih ari 235 bengkah menua. Kati nuan siku ari sida ke benung ransing nginjil? Enti pia, nuan mega sama enggau pengawa madahka Berita Manah pasal Perintah Petara. Berita Manah tu udah dikerembaika ngagai serata dunya. Lalu, tu siti kereja ajih. Tu ketegal, pengawa nginjil enda senang sereta bisi mayuh penanggul. Indah, bisi pemerintah nyakal sereta merinsaka bala Saksi. Taja pia, Saksi-Saksi Jehovah enda ngetu meri saksi enggau silik pasal Perintah Petara ngagai semua orang ari bemacham bansa.

⁹ Diatu, bisi siti tanya ti ngalitka ati. Enda ngira nama penusah ke nuntung, enda ngira baka ni Sitan ngelaban, nama kebuah semua nya enda ulih nagang pengawa nginjil pasal Perintah Petara ari terus dikerembaika? Kena ngiga saut tu, kitai patut meda baru utai ke kala nyadi ba abad keterubah. Kebendar iya, kitai ke nyadi Saksi-Saksi Jehovah kemayaharitu, benung neruska pengawa ti berengkah ba maya nya suba.

10. Nama pengawa ke dikereja Jesus enggau bebendar, lalu nama utai ke ditemu iya pasal pengawa nya?

¹⁰ Jesus meh ke ngepunka raban gempuru Kristian. Nyadi, iya  bebendar nginjil Berita Manah pasal Perintah Petara. Lalu, Jesus ngenuluka pengawa tu ba pengidup iya. Jesus kala madah: “Aku mega patut nusui Berita Manah pasal Perintah Petara ba endur bukai. Laban nya tuju aku dikirumka.” (Luk. 4:43) Jesus ngepunka pengawa nginjil. Taja pia, iya nemu pengawa tu enda ulih ditembuka iya kediri. Nya alai, enda lama sebedau pemati iya, Jesus madah pesan pasal Perintah Petara deka ditusui “ngagai semua bansa.” (Mrk. 13:10) Tang baka ni pengawa tu deka dikereja, lalu sapa deka ngereja iya?

11. Nama pengawa ti penting ke diberi Jesus ngagai bala murid iya, lalu nama sukung ke deka diterima sida ba pengawa nya?

¹¹ Pengudah Jesus diangkatka idup baru, iya ngayanka diri ngagai bala murid iya. Maya nya, iya meri sida pengawa ti penting. Ku iya: “Nya alai, mupuk kita ngagai semua bansa, lalu ajar sida nyadi murid aku. Baptisa sida dalam nama Apai, Anak, enggau kuasa kudus Petara. Ajar sida ngasika semua utai ke udah dipadah aku ngagai kita, lalu ingat, aku deka seruran enggau kita nyentuk ngagai pengujung dunya.” (Mat. 28:19, 20) Rambai jaku “aku deka seruran enggau kita” nunjukka, Jesus deka nyukung bala murid iya ba pengawa nginjil sereta ngajar orang nyadi murid. Sida amat begunaka sukung nya, laban Jesus kala madah “semua bansa deka begedika” bala murid iya. (Mat. 24:9) Kelimpah ari nya, bala murid Jesus mega deka nerima sukung nengah chara ke bukai. Sebedau iya pulai baru ngagai serega, Jesus madah bala murid iya deka nerima kuasa kudus ngambika ulih nyadi saksi-saksi iya “nyentuk ngagai ujung dunya.”—SKR. 1:8.

12. Nama sekeda tanya ti penting ke bisi, lalu nama kebuah kitai patut nemu saut ke tanya nya?

¹² Diatu bisi sekeda tanya ti penting: Kati bala rasul Jesus sereta bala murid ba abad keterubah ngemeratka pengawa nginjil? Taja pan penyampau orang Kristian ba maya nya semina mimit aja sereta sida balat diperinsa, tang kati sida udah meri saksi enggau silik pasal Perintah Petara? Kati sida amat bisi nerima bantu ari Jehovah sereta sukung ari kuasa kudus Iya ba pengawa ngajar orang nyadi murid? Semua saut ke tanya tu enggau tanya ke bukai bekaul enggau nya bisi ba bup Surat Kereja Rasul. Nama kebuah kitai patut nemu saut ke semua tanya nya? Tu ketegal Jesus besemaya, pengawa nginjil deka terus dikereja “nyentuk ngagai pengujung dunya.” Nya alai, pengawa nginjil patut dikereja semua orang Kristian ti bendar, nyengkaum kitai ke idup ba hari ti penudi. Nya meh kebuah, semua kitai amat deka nemu utai ke ditulis sereta dipadahka ba bup Surat Kereja Rasul.

13, 14. (a) Sapa penulis bup Surat Kereja Rasul, lalu baka ni penulis tu ngulihka penerang iya? (b) Nama utai ke ditulis ba bup Surat Kereja Rasul?

¹³ Sapa penulis bup Surat Kereja Rasul? Bup Surat Kereja Rasul empu nadai kala madahka sapa penulis iya. Tang, jaku pemuka ba bup Surat Kereja Rasul nunjukka, penulis iya mega nulis Bup Injil Luke. (Luk. 1:1-4; SKR. 1:1, 2) Nya alai kenyau ari suba, Luke, siku “lutur ke dikerinduka” sereta siku pakar sejarah, mega dikumbai penulis bup Surat Kereja Rasul. (Kol. 4:14) Bup tu madahka utai ti nyadi ba timpuh kira-kira dalam 28 taun. Maya nya berengkah lebuh Jesus niki ke serega ba taun 33 M., nyentuk ngagai Rasul Paul dijil ba Rome kira-kira ba taun 61 M. Lebuh Luke nuliska bup Surat Kereja Rasul, iya nukar leka jaku “sida” ngagai “kami.” Tu nunjukka, iya bisi enggau dalam mayuh utai ke nyadi ba utai ke ditulis iya. (SKR. 16:8-10; 20:5; 27:1) Luke mega siku orang ke mansik enggau silik. Nyadi, iya tentu ngulihka penerang iya ari Paul, Barnabas, Philip sereta orang bukai ke bisi dipadah ba bup Surat Kereja Rasul.

¹⁴ Nama utai ke ditulis ba bup Surat Kereja Rasul? Ba bup Injil iya sebedau tu, Luke nulis pasal utai ke disebut sereta digaga Jesus. Tang ba bup Surat Kereja Rasul, Luke nuliska utai ke disebut enggau utai ke dikereja bala murid Jesus. Nya alai, bup Surat Kereja Rasul madah pasal sida ke nembuka pengawa ti luar biasa. Lalu, tu ulih nyadi taja pan mayuh ari sida nya dikumbai “orang biasa aja sereta ukai orang ke bepelajar.” (SKR. 4:13) Enggau secara lansa, utai ke ditulis tu madahka baka ni raban gempuru Kristian ditumbuhka sereta majak mansang. Bup Surat Kereja Rasul mega nunjukka chara sereta ulah orang Kristian ba abad ti keterubah pasal pengawa nginjil. (SKR. 4:31; 5:42) Bup tu mega nerangka, baka ni kuasa kudus nulung ba pengawa ngerembaika Berita Manah. (SKR. 8:29, 39, 40; 13:1-3; 16:6; 18:24, 25) Bup Surat Kereja Rasul mandangka tema Bup Kudus ti nyengkaum pasal nama Petara dikuduska nengah Perintah Petara dibaruh Kristus. Bup tu mega nunjukka, baka ni Berita Manah pasal Perintah Petara dikerembaika taja pan balat disakal.—SKR. 8:12; 19:8; 28:30, 31.

15. Baka ni kitai deka bulih penguntung enggau belajarka bup Surat Kereja Rasul?

¹⁵ Lebuh belajarka bup Surat Kereja Rasul, kitai gagit ati lalu pengarap kitai deka dikeringka! Teladan bala murid Kristus ba abad keterubah ke nunjukka pemerani sereta pengeransing negu ati kitai. Enggau nya, kitai deka diperansang neladan pengarap sida. Kitai mega deka disikap kena ngereja pengawa ke udah diberi ngagai kitai,  iya nya ‘mupuk, lalu ajar sida nyadi murid.’ Bup ke benung dibacha nuan diatu digaga ngambika ulih nulung nuan belajarka bup Surat Kereja Rasul enggau dalam agi.

16. Nama tiga iti tuju bup tu?

¹⁶ Nama tuju bup tu? Bisi tiga iti tuju: (1) kena nulung kitai pechaya agi, Jehovah ngena kuasa kudus Iya nyukung kitai ba pengawa nginjil pasal Perintah Petara sereta pengawa ngajar orang nyadi murid, (2) meransang kitai ransing agi nginjil nitihka teladan bala murid Jesus ba abad keterubah, lalu (3) kena nulung kitai bebasaka agi gerempung Jehovah sereta ngagai sida ke ngiring ba pengawa nginjil enggau ke nyaga raban gempuru.

17, 18. Baka ni chara bup tu ditusun, lalu nama begian bukai ke ulih nulung ba pengawa belajarka Bup Kudus kediri empu?

¹⁷ Baka ni chara bup tu ditusun? Bup tu dibagi ngagai lapan iti begian. Tiap iti begian deka nulung kitai meresa begian ti mit agi ba bup Surat Kereja Rasul. Tuju tiap iti pelajar ba bup tu, ukai dikena berandauka tiap iti ayat ba bup Surat Kereja Rasul. Tang kitai deka ngiga utai ke ulih dipelajarka kitai ari utai ke nyadi ti dipadah ba bup nya. Kitai mega deka meda chara kitai ulih nitihka utai ke dipelajar ba pengidup diri empu. Ba tiap iti pun pelajar, deka bisi jaku pemuka ke nerangka batang poin ke pelajar nya. Bisi mega, siti ayat ari bup Surat Kereja Rasul sama disimpan enggau jaku pemuka kena nunjukka utai ke deka dikerandauka kitai ba pelajar nya.

¹⁸ Bisi begian bukai ba bup tu ke ulih nulung ba pengawa belajarka Bup Kudus kediri empu. Bisi mayuh gambar ke manah ti ulih nulung nuan ngambarka utai ke nyadi. Tu beguna seraya nuan berunding  enggau dalam pasal cherita Bup Kudus tu. Mayuh pelajar mega bisi kutak penerang ti beguna. Sekeda kutak nunjukka pengarap siku watak Bup Kudus ke tau dititihka kitai. Sekeda kutak mega nerangka endur, utai ke nyadi, adat sereta orang bukai ke bisi disebut ba bup Surat Kereja Rasul.

19. Kena selalu meresa diri empu, nama ulih digaga kitai?

¹⁹ Bup tu ulih nulung nuan meresa diri empu enggau jujur. Enda ngira berapa lama nuan udah nyadi penginjil, nuan patut nyediaka awak seruran meresa diri empu. Nuan ulih meresa nama utai ke dikenuluka nuan ba pengidup sereta runding nuan pasal pengawa nginjil. (2 Kor. 13:5) Tanya meh diri empu: ‘Kati aku agi ngasaika pengawa nginjil nya patut diperumbanka? (1 Kor. 7:29-31) Kati aku nginjil Berita Manah enggau yakin sereta ransing? (1 Tes. 1:5, 6) Kati aku bebendar nginjil sereta ngajar orang nyadi murid?’—Kol. 3:23.

20, 21. Nama kebuah pengawa nginjil patut dikereja enggau bebendar, lalu nama utai ke keran dikereja kitai?

²⁰ Semua kitai patut ingatka pekara tu. Kitai udah diberi pengawa ti amat penting iya nya, nginjil sereta ngajar orang nyadi murid. Pengujung dunya tu nyau majak semak. Nya alai, pengawa nginjil kitai patut majak agi dikereja enggau bebendar. Ketegal nya, pengidup orang bepanggai ba pengawa nginjil kitai. Agi bisi mayuh orang ke bisi pengingin deka idup meruan belama iya. Lalu, sida engka deka nerima pesan kitai. Taja pia, kitai nadai nemu berapa penyampau sida tu. (SKR. 13:48) Nyadi sebedau pengujung datai, semua kitai bisi tanggung pengawa nulung sida tu.—1 Tim. 4:16.

²¹ Nya alai, kitai patut nitihka teladan bala penginjil ba abad ti keterubah, ke udah nginjil enggau ransing. Arapka utai ke dipelajarka nuan ari bup tu ulih nulung nuan nginjil enggau ransing sereta berani agi. Lalu arapka nuan deka keran agi “meri saksi enggau silik pasal Perintah Petara.”—SKR. 28:23.