PELAJAR 10
“Jaku Jehovah Majak Ngerembai”
Peter diselamatka, lalu taja pan diperinsa, tang pengawa nginjil pasal Berita Manah enda ngetu dikerembaika
Bepelasarka Surat Kereja Rasul 12:1-25
1-4. Nama penusah ke ditapi Peter, lalu nama asai ati nuan enti nuan napi penusah ti baka nya?
SITI pagar ti besai ditutup, lalu bunyi iya amat inggar. Bisi dua iku jejaga mai Peter tama ngagai bilik jil. Iya lama nganti kena nemu utai ke deka nyadi ba iya. Ba bilik jil, Peter enda ulih meda mayuh utai. Iya semina ulih meda dinding, pagar besi, rantai kaki enggau jari iya sereta bala jejaga rumah jil.
2 Peter nerima berita pasal iya ke deka diukum enggau berat. Raja Herod Agripa I keran deka munuh iya. a Nitihka pelan ke digaga Raja Herod, Peter deka dibai bediri ba mua orang mayuh pengudah pengerami Paska. Pemati Peter deka nyadi siti hadiah kena ngagaka ati orang mayuh. Tu reti iya, Peter tentu deka dibunuh. Tu ketegal, enda lama sebedau nya, rasul James mega udah diukum bunuh Raja Herod.
3 Maya Peter deka diukum bunuh nyau majak semak. Nama utai ke engka diperundingka Peter lebuh iya ba bilik jil nya? Kati iya ingatka jaku Jesus beberapa taun sebedau nya, ke madahka Peter deka ditangkap sereta diukum bunuh? (Jhn. 21:18, 19) Nya alai, Peter engka berunding, jaku Jesus deka dikeamatka ba maya nya.
4 Nama asai ati nuan enti nuan napi penusah baka Peter? Mayuh orang deka putus asa. Tang ba murid Jesus Kristus ti bendar, kati semua penusah enda ulih diputarka? Nama ulih dipelajarka kitai ari Peter, enggau bala menyadi Kristian maya nya lebuh sida diperinsa? Aram meda.
“Raban Gempuru Majak Bebendar Besampi” (Surat Kereja Rasul 12:1-5)
5, 6. (a) Nama kebuah Raja Herod Agripa I nyerang raban gempuru Kristian, lalu baka ni iya ngereja nya? (b) Nama kebuah pemati James nyadi penguji ngagai bala menyadi ba raban gempuru?
5 Baka ke udah dipelajarka kitai ba pelajar sebedau tu, lebuh Kornelius enggau diri sebilik iya nyadi orang Kristian, nya siti pemansang ti ngagitka ati semua ba raban gempuru. Tang, orang Judah ke enda arap tentu berasai tekenyit lebuh nemu orang Kristian ke bebansa Judah sama nyembah Petara enggau orang ke datai ari bansa bukai.
6 Herod siku ahli politik ti amat pintar. Ba Herod, situasi nya meri iya peluang ngambika iya ulih minta puji ba orang Judah ke bukai. Nya alai, iya merinsaka orang Kristian. Iya tentu nemu, rasul James amat rapat enggau Jesus Kristus. Nyadi, “James, iya nya menyadi John, udah dibunuh [Herod] ngena pedang.” (SKR. 12:2) Pemati James tentu nyadi penguji ti besai ngagai semua ba raban gempuru! Suba, James bisi enggau Peter seduai John lebuh Jesus berubah gamal. James mega meda beberapa kereja ajih ke digaga Jesus ke enda ditunjukka ngagai bala rasul ke bukai. (Mat. 17:1, 2; Mrk. 5:37-42) Ketegal James enggau menyadi iya, John amat ransing, Jesus meri nama “Anak Guntur” ngagai seduai iya. (Mrk. 3:17) Nyadi, lebuh James udah dibunuh, raban gempuru lenyau siku rasul ke amat dikerinduka, saksi ti tetap ati sereta berani.
7, 8. Nama digaga raban gempuru lebuh Peter dijil?
7 Baka ke dikearapka Herod, pemati James ngagaka ati orang Judah. Ketegal nya, iya pan deka munuh Peter. Baka ke udah dikerandauka kitai sebedau tu, Herod nangkap Peter. Tang Herod mega nemu, bala rasul suba ulih ngelepaska diri ari jil. Sida ulih ngereja tu ketegal kereja ajih ari Petara. Ngambika Peter enda ulih ngelepaska diri, Herod minta ngambika Peter dirantai entara 2 iku jejaga ke bukai. Bisi 16 iku bala soldadu begintir nyaga Peter siang enggau malam. Enti Peter ulih ngelepaska diri, bala soldadu tu meh ke deka diukum bunuh. Nyadi, nama ulih digaga bala menyadi Kristian kena nulung Peter?
8 Raban gempuru nemu utai ke deka digaga. Surat Kereja Rasul 12:5 madahka: “Nya alai, Peter ditan ba jil, tang raban gempuru majak bebendar besampi ngagai Petara ke iya.” Sida bebendar besampi ari ati. Sida enda putus asa pengudah James diukum bunuh. Sida mega enda ngumbai sampi sida nadai guna. Sida nemu sampi sida amat berega ba Jehovah. Enti sampi sida sejalai enggau peneka Jehovah, Iya deka nyaut sampi sida. (Heb. 13:18, 19; Jas. 5:16) Orang Kristian kemayaharitu ulih belajar ari teladan sida.
9. Nama ulih dipelajarka kitai ari teladan menyadi Kristian ke bebendar besampi kena nulung Peter?
9 Kati nuan nemu bisi bala menyadi ke benung napi penguji diatu? Ambika chunto, pengawa Kristian sida engka ditagang bala pemerintah. Sida engka diperinsa tauka napi bencana alam. Nuan ulih besampi pasal sida ngagai Jehovah. Nuan mega engka nemu pasal sekeda menyadi ke napi penguji ke enda entu ditemu orang. Sida engka napi penanggul ba ruang bilik, berasai asa ati, tauka bisi penguji ke ulih ngachau pengarap sida. Enti nuan berunding enggau dalam sebedau besampi, nuan engka bisi berundingka beberapa orang, lalu nyebut nama sida dalam sampi nuan. Andal meh, Jehovah “nyaut sampi.” (Mas. 65:2) Enti nuan napi penanggul dudi hari ila, nuan mega tentu amat begunaka sampi ari bala menyadi kena nulung nuan.
Kitai besampika bala menyadi Kristian ke dijil ketegal ngetanka pengarap sida
“Titihka Aku” (Surat Kereja Rasul 12:6-11)
10, 11. Baka ni melikat Jehovah nyelamatka Peter ari jil? Terangka.
10 Kati Peter irau enggau penusah ke ditapi iya? Kitai enda entu nemu. Tang ba malam ti penudi iya dijil, iya tinduk jenak ba entara dua iku jejaga. Taja pan Peter enda nemu utai ke deka nyadi ngagai iya pengudah nya, tang iya nemu Jehovah bisi enggau iya. (Rom. 14:7, 8) Tang bisi utai ke luar biasa deka nyadi ngagai Peter, lalu iya enda nyangka utai nya nyadi. Enda memukai, penampak manchar dalam bilik jil nya. Siku melikat bediri ba dia. Melikat nya enda ulih dipeda bala jejaga, lalu iya ngasuh Peter jampat dani. Tekala nya, rantai lalu tebeleka labuh ari jari Peter.
“Seduai iya datai ba pintu besi ke nuju ngagai nengeri. Pintu nya tebuka kediri.”—Surat Kereja Rasul 12:10
11 Melikat nya ngasuh Peter: “Jampat dani! . . . Besedia nuan, lalu pasukka kasut nuan. . . . Pasukka gari luar nuan.” Peter nitihka utai ku melikat nya. Ke pengujung iya, melikat nya madahka iya: “Titihka aku,” lalu Peter pan nitihka iya. Sida ninggalka rumah jil nya, bejalai mansa jejaga ba luar lalu nuju ngagai pintu besi. Baka ni sida ulih mujur ngereja nya? Pintu nya “tebuka kediri.” Utai ke nyadi nya amat jampat. Sida udah pansut ari rumah jil, lalu bejalai ngagai jalai ti mit. Lebuh maya nya, melikat nya ninggalka iya. Diatu, Peter nyau sedar, utai nya amat nyadi, ukai genera. Peter udah bibas!—SKR. 12:7-11.
12. Baka ni kitai tau bulih pengelantang lebuh berundingka chara Jehovah nyelamatka Peter?
12 Endaka nya ngelantangka ati kitai lebuh berundingka kuasa Jehovah nyelamatka nembiak Iya? Maya nya, Peter dijil Raja Herod ke bisi disukung kuasa politik ba jeman nya. Tang, Peter ulih lepas ari rumah jil nya. Endang amat, Jehovah enda ngereja kereja ajih ke baka tu ngagai semua nembiak Iya. Ambika chunto, Jehovah enda nyelamatka James ari rumah jil. Lalu Peter mega bisi kena jil sekali agi. Tang maya nya, Jehovah enda nyelamatka iya. Nya alai, tu ngamatka jaku Jesus pasal Peter ke deka dibunuh. Orang Kristian kemayaharitu enda ngarapka Jehovah nyelamatka sida ngena kereja ajih. Tang kitai patut ingat, Jehovah enda kala berubah. (Mal. 3:6) Enda lama da agi, Jehovah deka ngena Anak Iya ngelepaska bejuta-juta iku orang ari pemati. (Jhn. 5:28, 29) Lebuh kitai berundingka semaya Jehovah, kitai ulih nyadi berani lebuh napi penusah kemayaharitu.
‘Sida Meda Iya, lalu Balat Tekenyit’ (Surat Kereja Rasul 12:12-17)
13-15. (a) Nama reaksi bala menyadi ke begelumu ba rumah Maria lebuh Peter datai? (b) Pengudah Peter, bup Surat Kereja Rasul becherita pasal sapa, tang baka ni teladan Peter udah nulung bala menyadi Kristian?
13 Peter bediri ba jalai ti petang. Lalu iya berunding kini tunga pejalai iya. Enda jauh ari nya, bisi siti rumah menyadi Kristian ke benama Maria. Taja pan iya indu balu, tang iya amat bepemisi. Rumah iya amat besai, lalu ulih nyadi alai begempuru. Iya indai John, ti dikumbai Mark. Tu meh keterubah kali Bup Surat Kereja Rasul nyebut pasal John Mark. Nyau kelama, iya nyadi baka anak Peter. (1 Pet. 5:13) Ba malam nya, mayuh sida datai besampi ba rumah Maria taja pan udah jauh malam. Sida tentu besampi ngambika Peter dilepaska ari jil. Tang sida enda nyangka Jehovah nyaut sampi sida tekala nya!
14 Peter ngetuk pintu rumah Maria. Siku ulun indu ke benama Rhoda datai ngagai pintu nya. Dalam jaku Gerika, nama Rhoda mai reti “Rose.” Iya enda nyangka nya nyawa Peter. Ketegal iya kelalu gagit, iya enda muka pintu penama nya. Nya alai, Peter patut nganti ba luar. Iya beguai tama ngagai rumah lalu madah ngagai bala menyadi, Peter udah datai. Sida madah Rhoda udah gila. Tang iya majak madahka, orang nya Peter. Ketegal nya, sekeda menyadi pechaya Rhoda bisi ninga utai ba luar. Nyadi sida ngumbai, bisi melikat datai ngarika Peter. (SKR. 12:12-15) Peter majak ngetuk pintu nyentukka sida muka pintu nya.
15 Ba pintu penama nya, ‘sida meda iya, lalu balat tekenyit’! (SKR. 12:16) Sida amat gaga ati nyentukka sida amat inggar. Peter ngasuh sida anang inggar. Lalu iya madahka baka ni iya ulih lepas ari rumah jil. Udah nya, Peter ngasuh sida madahka pekara tu ngagai siku murid ke benama James, sereta bala menyadi ke bukai. Lalu iya mupuk ngambika bala soldadu enda tetemuka iya. Peter pan ngagai endur bukai ti selamat agi kena neruska pengawa ke Jehovah. Ba Surat Kereja Rasul bagi 15, bisi madah pasal Peter nulung mutarka penanggul bekaul enggau pengawa besunat. Pengudah nya, iya nadai agi disebut dalam bup Surat Kereja Rasul. Bup Surat Kereja Rasul lalu nyeritaka pengawa nginjil sereta pejalai rasul Paul. Taja pia kitai pechaya, teladan Peter tentu udah ngeringka pengarap bala menyadi Kristian enda ngira kini tunga pejalai iya pengudah nya. Ambika chunto, bala menyadi ba rumah Maria tentu amat gaga ati pengudah betemu enggau iya.
16. Nama kebuah utai ke deka nyadi jemah ila ngasuh kitai gaga ati?
16 Bisi maya iya, Jehovah meri lebih agi ari utai ke dipinta nembiak Iya. Tu tentu ngasuh bala nembiak Jehovah gaga ati. Nya meh utai ke diasaika bala menyadi lebuh Peter dilepaska ari jil. Kitai mega ngasaika pengaga ati lebuh nerima mayuh berekat ari Jehovah. (J-lam. 10:22) Ba jemah ila, Jehovah deka ngamatka semua semaya Iya ba serata dunya. Berekat ari Jehovah tentu jauh manah agi ari utai ke ulih digambarka kitai. Seagi-agi kitai mengkang setia, kitai deka nerima mayuh berekat ari Jehovah ke ngasuh kitai gaga ati.
“Melikat Jehovah lalu Nyerang Herod Ngena Penyakit” (Surat Kereja Rasul 12:18-25)
17, 18. Nama kebuah Herod dipuji orang mayuh?
17 Ketegal Peter ulih lepas ari rumah jil, Herod balat tekenyit. Nya alai, Herod ngasuh orang ngiga Peter. Lalu, bala jejaga Peter ditasat kena nemu utai ke nyadi. Sida “dibai ngambika diukum.” Sida engka deka diukum bunuh. (SKR. 12:19) Herod Agripa ukai orang ti pengasih. Nya alai, kati iya deka diukum?
18 Herod berasai malu ketegal iya enda mujur ngukum bunuh Peter. Tang ketegal iya sumbung, iya ngiga chara bukai kena ngagaka ati orang Judah. Bisi sekali, bala munsuh deka bebaik enggau Herod. Nyadi iya enda sabar deka bejaku ba mua orang mayuh. Luke madahka, kena nyediaka diri ba pengawa nya, “Herod ngena baju diraja iya.” Pakar sejarah orang Yahudi ke benama Josephus madahka, gari ke dikena Herod digaga ari pirak. Perenching ari baju Herod ngasuh iya tampak dipeda. Lebuh Herod bejaku ba mua orang mayuh, orang ba dia manjung madah: “Tu nyawa petara, ukai nyawa mensia!”—SKR. 12:20-22.
19, 20. (a) Nama kebuah Jehovah ngukum Herod? (b) Nama dipelajarka kitai ari chara Jehovah ngukum Herod?
19 Mulia enggi Jehovah, lalu Iya beratika pengawa Herod ti jai nya! Herod bisi peluang kena nyeliah ari diukum Jehovah. Herod ulih ngerara orang mayuh nya tauka enda setuju enggau sida. Tang Herod nyadi chunto kena nunjukka pengamat utai ke ditulis ba Jaku Dalam ke madahka: “Penyumbung nuju ngagai pengerusak.” (J-lam. 16:18) Bup Kudus madah: “Tekala nya, melikat Jehovah lalu nyerang Herod ngena penyakit.” Iya “diempa ulat lalu mati.” Penyakit nya ngasuh Herod mati merinsa. (SKR. 12:23) Pakar sejarah ke benama Josephus madahka Herod ngenyit sakit, lalu kena penyakit ti raya ketegal nerima mulia ari orang mayuh. Josephus mega madah, Herod merinsa sakit lima hari sebedau iya mati. b
20 Kesuah iya, orang ke jai ulih rari ari diukum. Tu enda ngasuh kitai tekenyit laban “serata dunya di baruh kuasa Sitan.” (1 Jhn. 5:19) Taja pia, nembiak Petara ti tetap ati kekadang irau lebuh orang jai selalu enda kena ukum. Nya alai, cherita pasal Jehovah ngukum orang jai baka Herod ngelantangka ati kitai. Kitai ulih meda Jehovah masuk champur sereta mutarka penanggul tu. Tu nunjukka, Jehovah rinduka atur ti lurus. (Mas. 33:5) Jemah ila, atur ti lurus ari Jehovah tentu deka menang.
21. Nama utai ti penting ke dipelajarka kitai ari Surat Kereja Rasul bagi 12, lalu nama kebuah tu ulih ngelantangka ati kitai?
21 Cherita ba Surat Kereja Rasul bagi 12 disimpulka enggau ajar ti meransang ati kitai, iya nya: “Jaku Jehovah majak ngerembai.” (SKR. 12:24) Riput pasal pemansang pengawa nginjil maya nya ngingatka kitai pasal berekat Jehovah ke pengawa nginjil kitai kemayaharitu. Surat Kereja Rasul bagi 12 ukai semina cherita pasal James ke diukum bunuh, sereta pasal Peter ke ulih rari ari rumah jil. Tang, mayuh befokus ba Jehovah enggau asai ati Iya ti enda rindu meda Sitan ngachau raban gempuru Kristian, enggau pengawa nginjil. Semua penyai ke digaga Sitan ngagai kitai enda ulih mujur. (Isa. 54:17) Andal meh, orang ke ngereja pengawa Jehovah enggau Jesus deka mujur belama. Endaka tu meransang kitai? Semua kitai bisi basa ti besai ulih ngerembaika “jaku Jehovah” kemayaharitu!
a Peda kutak “ Raja Herod Agripa I.”
b Siku lutur enggau penulis madahka, tanda-tanda ke disebut Josephus enggau Luke nunjukka ulat ke nyerang Herod engka dikumbai cacing gelang. Ulat tu makai usus. Ulat nya pansut ari muntah sereta pansut ari tubuh lebuh orang nya mati. Siti rujukan madahka: “Ketegal Luke siku lutur, iya ulih ngambarka enggau silik chara Herod mati enggau merinsa.”
