Josep ngerak Maria lalu madah melikat Jehovah baru aja ayan dalam mimpi iya. Melikat nya madahka: “Angkat, lalu bai anak mit nya enggau indai iya ngagai Ejip. Diau din dulu nyentukka aku meri pesan baru ngagai nuan, laban Herod deka ngiga anak mit nya lalu munuh iya.”—Matthew 2:13.

Ba malam nya mega, Josep mai sida sebilik ngerarika diri ngagai Ejip. Sida patut mupuk enggau jampat, laban Herod nemu diri nyau ditipu bala orang ke nemu nujum nya. Herod udah madah ke sida, enti sida tetemuka Jesus, sida patut madahka utai nya ngagai iya. Taja pia, sida enda ngereja nya. Nyadi, Herod balat pedis ati. Ketegal iya agi keran deka munuh Jesus, iya ngaga atur ngambika semua anak lelaki ke beumur dua taun ke baruh ba Betlehem, sereta endur ke semak enggau menua nya, dibunuh magang. Iya netapka umur nya nitihka penerang ari orang ke nemu nujum nya.

Utai ke digaga Herod amat jai! Kitai enda nemu penyampau anak mit lelaki ke udah dibunuh. Tang jaku benabi Jeremiah pasal bala indai ke bekeduie nyabakka anak sida udah dikeamatka.—Jeremiah 31:15.

Ba maya nya, Josep enggau sida sebilik udah ngerarika diri ngagai Ejip. Lalu sida terus diau din. Nyau kelama, melikat Jehovah sekali agi ayan ba mimpi Josep lalu madahka: “Angkat, lalu bai anak mit nya enggau indai iya ngagai menua Israel. Laban orang ke deka munuh anak mit nya udah mati.” (Matthew 2:20) Nya alai, Josep mai Maria enggau Jesus pulai baru ke menua asal sida. Utai ke nyadi tu ngamatka jaku benabi ke madahka Anak Petara deka dibai pansut ari Ejip.—Hosea 11:1.

 Josep deka pulai baru ngagai Betlehem ba Judea, iya nya endur asal sida sebedau sida ngerarika diri ngagai Ejip. Tang iya ninga anak Herod ke benama Arkelaus udah nyadi raja ba Judea. Lalu, Arkelaus amat jai. Nya alai nengah siti agi mimpi, Petara nangkan Josep ngambika enda pulai baru ke Betlehem. Nyadi, Josep enggau sida sebilik mupuk ngagai Galili lalu diau ba nengeri Nasaret, ke jauh ari Jerusalem. Enggau nya, jaku benabi Bup Kudus ke madahka: “[Jesus] deka dikumbai orang Nasaret” mega dikeamatka.—Matthew 2:23.