Jesus udah ngajar sekeda utai ti penting lebuh iya makai ba rumah siku ketuai orang Parisi. Diatu Jesus neruska pejalai iya ngagai Jerusalem, lalu mayuh orang nitihka iya. Nama kebuah? Kati sida amat deka nyadi murid Jesus lalu sanggup ngelengkaka sekeda utai?

Ba pejalai nya, Jesus madah ngagai sida siti utai ke engka ngasuh sida berasai tekenyit. Ku iya: “Barang sapa ke datai ngagai aku lalu iya lebih agi rinduka apai, indai, bini, anak, diri menyadi, tauka indah diri empu, iya enda ulih nyadi murid aku.” (Luke 14:26) Tang nama reti utai ti dipadah Jesus?

Reti iya, sida patut rinduka Jesus lebih agi ari rinduka kaban belayan sida. Laban enti enda, sida baka lelaki dalam sempama ti dipadah Jesus ke nulak peluang ti berega ketegal iya baru udah kawin.—Luke 14:20.

Peratika Jesus madah murid iya patut rinduka Jesus lebih agi ari “indah diri empu.” Reti iya, murid Jesus ti bendar patut rinduka Jesus nyentukka iya sanggup mati enti sema iya patut bekorban. Endang amat, orang patut berundingka enggau manah sebedau ngaga pemutus nyadika murid Jesus, laban nya siti tanggung pengawa ti berat.

Murid Jesus patut sanggup napi penusah sereta diperinsa, laban baka ku Jesus: “Barang sapa ke enda ngesan tiang perinsa iya lalu nitihka aku, enda ulih nyadi murid aku.” (Luke 14:27) Baka Jesus, bala murid iya patut sanggup diperinsa, indah sanggup dibunuh bala munsuh.

Nya alai, sida ke nitihka Jesus ba pejalai ke Jerusalem patut berunding enggau dalam pasal tanggung pengawa nyadi murid Kristus. Jesus nekanka pekara tu enggau siti sempama. “Ambika chunto, sapa ari bala kita ke deka ngaga sebuah menara enda duduk dulu ngira ungkus utai nya, ngambika iya nemu sekalika iya bisi duit kena nembuka pengawa nya? Enti enda, iya engka nudukka pugu menara nya tang enda ulih nembuka pengawa nya.” (Luke 14:28, 29) Nya alai, sebedau nitihka Jesus, sida patut ngaga pemutus deka bebendar nembuka semua tanggung pengawa sebagai siku murid iya.

Lalu senentang tu, Jesus meri siti da agi jaku sempama: “Enti siku-siku raja deka beperang ngelaban raja ke bukai, endaka raja nya deka duduk dulu lalu baum enggau bala pemesai iya, ngambika iya nemu sekalika 10,000 iku soldadu iya ulih beperang ngelaban raja ke bisi 20,000 iku soldadu? Tang enti iya nemu diri enda ulih menang, iya deka nganjung bala pengari iya ngagai munsuh iya kala ke munsuh iya agi jauh, lalu minta deka bebaik enggau sida. Pia mega, kita patut ingat, kita enda ulih nyadi murid aku seagi-agi kita  enda ngelengkaka semua reta kita.”—Luke 14:31-33.

Jaku ke dipadah Jesus ukai semina dituju ngagai raban orang mayuh ba dia, tang mega dituju ngagai semua ke deka nyadi murid iya. Nya alai, murid Jesus patut besedia ngelengkaka semua reta sida, indah nyawa sida empu mega. Nyadi sebedau ngaga pemutus tu, sida patut besampi sereta berunding enggau dalam.

Udah nya, Jesus ngulang baru ajar pasal murid iya baka “garam dunya,” ke kala dipadah iya dalam Jaku Ajar ba Atas Bukit. (Matthew 5:13) Baka garam ke ulih nulung pemakai enda jampat jai, murid Jesus mega nulung orang ngambika enda rusak ari segi moral enggau rohani. Diatu, Jesus nyau ba pengujung pengawa nginjil iya, iya madah: “Garam endang manah. Tang enti iya nadai agi masin, baka ni ku kita deka ngasuh iya masin baru?” (Luke 14:34) Bala peninga Jesus nemu bisi garam ke udah bechampur enggau utai bukai. Lalu enti garam nya enda agi masin, iya enda ulih dikena agi.

Nyadi, Jesus nunjukka sida ke udah lama nyadi murid iya mega patut bejimat, ngambika sida ulih tetap ati terus nitihka iya. Enti sida putus asa, sida deka nyadi baka garam ke enda masin agi sereta nadai guna. Orang bukai deka ngumbai sida nya beli. Lalu sida ngenyaika nama Petara sereta enda ulih diterima Iya agi. Jesus enggai utai tu nyadi ba murid iya, nya alai iya meransang sida: “Awakka orang ke bisi pending, ninga enggau manah.”—Luke 14:35.