Jesus udah ngajar bala murid iya chara ngena pengaya sida enggau manah. Kebendar iya orang Parisi mega bisi ba dia, lalu sida patut ninga jaku lalau Jesus. Nama kebuah? Laban sida “angkunka duit.” Tang, sida “belabuh ngeleseka iya.”—Luke 15:2; 16:13, 14.

Taja pia, Jesus enda takut. Iya madah ngagai sida: “Ba mua orang kita madahka diri lurus. Tang Petara nemu ati kita, laban utai ti dikumbai berega ba mata mensia, keji ba mata Petara.”—Luke 16:15.

Orang Parisi udah lama “dikumbai berega ba mata mensia,” tang gaya pengidup sida deka berubah. Sida ke kaya, sereta sida ti bisi kuasa ba politik enggau agama ngembuan penuduk ti tinggi. Tang sida deka dikemaruhka, lalu orang biasa ke nemu diri begunaka Petara deka ditinggika. Nya alai, Jesus madahka bisi ubah ti besai benung nyadi ba jeman nya.

Ku iya: “Adat enggau Ajar Sida Nabi udah ditusui nyentuk ngagai jeman John. Udah nya, Berita Manah pasal Perintah Petara ditusui, lalu genap iku orang bebendar deka tama ngagai Perintah nya. Au, taja pan langit enggau dunya lesap, nadai siti urup tauka titik ke pemadu mit dalam bup Adat deka lenyau, sebedau semua utai ke udah ditulis dikeamatka.” (Luke 3:18; 16:16, 17) Baka ni utai ke dipadahka Jesus nunjukka bisi ubah ti besai benung nyadi ba maya nya?

Bala tuai pengarap Judah sumbung ketegal sida ngumbai diri nitihka Adat Moses. Lebuh Jesus ngeraika siku lelaki ke buta ba Jerusalem, orang Parisi enggau sumbung madah: “Kami murid Moses. Kami nemu Petara udah bejaku ngagai Moses.” (John 9:13, 28, 29) Kebendar iya, siti ari tuju Adat Moses nya ngambika ulih ngiring orang ke baruh ati ngagai Messiah iya nya, Jesus. Lalu John Pemaptisa madahka Jesus nya Anak Bedus Petara. (John 1:29-34) Lebuh John berengkah nginjil, iya nusui pesan “Perintah Petara” ngagai orang Judah ke baruh ati, kelebih agi sida ke miskin. Nya alai, pesan tu nyadi “Berita Manah” ngagai orang ke deka nyadi rayat Perintah Petara, sereta nerima berekat ari nya.

Adat Moses udah nulung orang ngelala Messiah. Pengudah tuju Adat nya dikeamatka, nembiak Petara enda ibuh agi nitihka Adat nya. Ambika chunto, Adat nya ngemendarka orang sarak ketegal mayuh kebuah. Tang Jesus madahka: “Barang sapa nyarakka bini iya, lalu jadi enggau indu bukai, iya butang. Lalu barang sapa ke jadi enggau indu ke udah sarak enggau laki iya, mega butang.” (Luke 16:18) Jaku Jesus nya tentu ngasuh orang Parisi balat ringat laban sida rindu ngaga mayuh atur, lalu nambahka nya ba Adat.

 Diatu Jesus madahka siti jaku sempama ke nunjukka ubah ti besai ke nyadi ba jeman nya. Iya nyebut pasal dua iku lelaki ke bisi gaya pengidup ti enda sama. Lalu seduai iya deka napi ubah ti besai ba pengidup. Maya nya, bisi orang Parisi ke angkunka duit sereta dipebasa orang mayuh ninga jaku Jesus.

Jesus madahka: “Bisi siku lelaki ti kaya ke suah ngena gari ke digaga ari kain ungu enggau kain linin ti mar. Pengidup iya nyamai sereta lantang ninting hari. Lalu bisi siku lelaki ti minta sedekah ke benama Lasarus, suah dibai ngagai pintu penama rumah lelaki ti kaya nya. Tubuh iya penuh enggau pisa. Iya amat ingin deka makai teda pemakai ke labuh ari mija orang kaya nya. Indah ukui pan datai nilat pisa iya.”—Luke 16:19-21.

Sapa “lelaki ti kaya” dalam sempama nya? Tu tentu orang Parisi laban sida angkunka duit. Sida mega rindu ngena gari ti mar sereta manah dipeda. Sida kaya, nerima mayuh basa sereta dilayan orang enggau chukup manah. Lelaki ti kaya dalam sempama nya ngena kain ungu. Tu nunjukka sida bisi penuduk ti tinggi. Lalu kain linin ti burak nunjukka sida ngumbai diri alim agi ari orang bukai.—Daniel 5:7.

Nama runding orang Parisi pasal orang biasa sereta miskin? Sida ngumbai orang biasa nya ʽam ha·ʼaʹrets, tauka orang ari tanah, laban sida nya enda nemu Adat lalu dikumbai enda layak  diajar. (John 7:49) Nya meh situasi siku “lelaki ti minta sedekah ke benama Lasarus,” iya amat ingin deka makai “teda pemakai ke labuh ari mija orang kaya nya.” Baka Lasarus ke sakit laban tubuh iya penuh enggau pisa, orang biasa suah dikemaruhka, laban orang Parisi ngumbai sida sakit ari segi rohani sereta enda diterima Petara.

Situasi nya amat ngenyinuka ati sereta udah lama nyadi. Tang Jesus nemu maya udah datai alai situasi ke baka nya patut berubah ba sida ke baka lelaki ke kaya sereta orang ke baka Lasarus.

Pengudah nya, Jesus nerangka ubah ti besai ke nyadi ngagai sida: “Pengujung iya, orang ke minta sedekah nya mati lalu dibai bala melikat ngagai sepiak Abraham. Lelaki ti kaya nya mega mati lalu dikuburka. Lebuh iya merinsa ba dalam Kubur, iya malik ke atas lalu meda Abraham ari jauh. Lasarus mega bisi ba sepiak Abraham.”—Luke 16:22, 23.

Bala peninga Jesus nemu Abraham udah lama mati. Bup Kudus madahka orang ke udah mati nyengkaum Abraham, enda ulih meda tauka bejaku. (Pengajar 9:5, 10) Nyadi, nama runding bala tuai pengarap lebuh Jesus madahka jaku sempama tu? Nama utai ke dipadahka iya pasal orang biasa enggau bala tuai pengarap ke angkunka duit?

Bekaul enggau pekara tu, Jesus madahka: “Adat enggau Ajar Sida Nabi udah ditusui nyentuk ngagai jeman John Pemaptisa. Udah nya, Berita Manah pasal Perintah Petara ditusui.” Nama nyadi ketegal pengawa nginjil John enggau Jesus Kristus? Pengidup orang ke baka Lasarus enggau lelaki ti kaya udah berubah.

Bala tuai pengarap enggai ngajar sida ke enda dikeibuhka tauka sida ke miskin. Tang sida nerima tulung lebuh sida nerima Berita Manah pasal Perintah Petara ke ditusui John Pemaptisa enggau Jesus. Suba, sida baka ke makai ‘teda pemakai rohani ke labuh ari mija.’ Reti iya, bala tuai pengarap semina ngajar sida mimit aja utai. Tang diatu sida kenyang enggau pemendar Bup Kudus, kelebih agi ari ajar Jesus ti ngalitka ati. Lalu sida udah diterima Petara Jehovah.

Tang bala tuai pengarap ti kaya sereta bekuasa nulak pesan pasal Perintah Petara ke ditusui John enggau Jesus. (Matthew 3:1, 2; 4:17) Sida berasai ringat laban pesan nya madahka Petara deka ngakim sida. (Matthew 3:7-12) Bala tuai pengarap deka berasai lantang agi ati enti Jesus enggau bala murid iya badu nusui pesan Petara. Sida baka lelaki ti kaya dalam jaku sempama nya ke madah: “Apai Abraham, kasihka  aku. Asuh Lasarus nyepuhka tunjuk iya ke dalam ai kena ngenyelapka dilah aku, laban aku pedis amat merinsa ba dalam api ti mau tu.”—Luke 16:24.

Tang utai tu enda nyadi. Mayuh ari bala tuai pengarap enda berubah laban sida enggai “mendingka pesan dalam Adat Moses enggau Ajar Sida Nabi.” Pesan nya patut ngiring sida nerima Jesus nya Messiah sereta raja. (Luke 16:29, 31; Galatia 3:24) Petara udah merekatka sida ke miskin, laban sida nerima Jesus, lalu nusui pesan pasal Perintah Petara. Taja pia, bala tuai pengarap enda baruh ati lalu enggai nerima pesan ke dibai sida. Tang bala murid Jesus enda patut ngubah pemendar ketegal deka ngelantangka ati bala tuai pengarap. Dalam jaku sempama nya, Jesus nerangka, bala murid iya enda patut ngereja nya. Tu ulih dipeda ari jaku ke disebut “Apai Abraham” ngagai lelaki ti kaya nya.

Ku iya: “Anak, kingatka meh. Maya nuan agi idup, nuan udah ngasaika semua utai ti manah. Tang Lasarus napi mayuh macham penusah. Diatu iya bulih pengelantang ba ditu. Tang nuan balat merinsa. Kelimpah ari nya, bisi lebak ti dalam ke nyeraraka kitai. Nya alai orang ari ditu, enda ulih ngagai nuan kia. Lalu orang ari dia, enda ulih ngagai kami kitu.”—Luke 16:25, 26.

Ubah ke disebut Jesus amat ngena! Gaya pengidup bala tuai pengarap ke sumbung enggau orang ke baruh ati deka berubah laban sida ke nerima ajar Jesus udah dikeringka baru. (Matthew 11:28-30) Beberapa bulan udah nya, lebuh sempekat Adat Moses diganti enggau sempekat baru, ubah tu deka dipeda enggau lebih terang agi. (Jeremiah 31:31-33; Kolosi 2:14; Hebrew 8:7-13) Petara deka meri kuasa kudus Iya ba Pentikos 33 M. Tu nunjukka, Petara nerima bala murid Jesus, ukai orang Parisi enggau bala tuai pengarap bukai.