Nama nyadi pengudah Jesus ngajar pasal pengampun ba rumah Simon? Iya pan berengkah nginjil ba serata Galili. Nya meh taun ti kedua Jesus ngereja pengawa nginjil, lalu iya enda kediri. Maya nya bisi 12 iku rasul sereta beberapa iku bala indu enggau iya. Jesus kala “ngeraika sekeda ari bala indu nya sereta muru melikat ti jai ari sida.” (Luke 8:2) Sida nyengkaum Maria Magdalin, Susana, sereta Joana, bini pengurus rumah Raja Herod Antipas.

Majak mayuh orang nemu pasal pengawa Jesus. Ketegal nya, orang mayuh majak agi nyebut bemacham-macham utai pasal pengawa iya. Utai tu nyadi lebuh Jesus ngeraika siku lelaki ke buta sereta bisu ketegal dirasuk melikat ti jai. Lelaki nya dilepaska ari kuasa melikat ti jai lalu ulih meda enggau bejaku baru. Nya alai, orang mayuh balat alit ati, sida madahka: “Kati iya kini, Anak David?”—Matthew 12:23.

Bisi mayuh orang begelumu ba rumah endur Jesus diau, nyentukka Jesus enggau bala murid iya enda ulih makai. Ukai semua orang nerima Jesus nya “Anak David” ke udah disemaya. Sekeda penulis Adat sereta orang Parisi datai ari Jerusalem. Tang sida ukai deka belajar ari Jesus tauka nyukung iya. Sida madah ngagai orang ba dia: “Iya dirasuk Belsebup” sereta iya bekaban enggau “ketuai melikat ti jai.” (Mark 3:22) Lebuh kaban belayan Jesus ninga utai tu, sida datai ngambika ulih mai Jesus mupuk ari endur nya. Nama kebuah?

Maya nya, bala menyadi lelaki Jesus enda pechaya Jesus nya Anak Petara. (John 7:5) Ba sida, Jesus udah berubah lalu iya enda sama baka suba, laban pengawa iya maya nya ngasuh orang begau. Nya alai, sida madah: “Iya nyau udah gila.”—Mark 3:21.

Nadai orang ulih nyangkal Jesus udah ngeraika siku lelaki ke dirasuk melikat ti jai, lalu lelaki nya ulih meda sereta bejaku baru. Nyadi, bala penulis Adat enggau orang Parisi nuduh Jesus. Ku sida madahka: “Iya muru melikat ti  jai ngena kuasa Belsebup, ketuai melikat ti jai.”—Matthew 12:24.

Jesus nemu utai ti dirunding bala penulis Adat sereta orang Parisi, lalu Jesus madahka: “Genap bengkah perintah ti bepechah-belah lalu ngelaban diri empu, deka rusak. Genap bengkah nengeri tauka ruang bilik ti bepechah-belah lalu ngelaban diri empu, enda ulih tan lama. Pia mega, enti Sitan muru Sitan, iya ngelaban diri empu. Enti pia, baka ni ku perintah iya ulih tan?”—Matthew 12:25, 26.

Ajar Jesus masuk akal! Orang Parisi nemu, bisi sekeda orang Judah ulih muru melikat ti jai. (Surat Kereja Rasul 19:13) Nyadi Jesus nanya: “Enti aku muru melikat ti jai ngena kuasa Belsebup, kuasa sapa ke dikena bala nembiak kita muru melikat ti jai?” Reti iya, bala nembiak orang Parisi mega ulih dituduh muru melikat ti jai ngena kuasa Belsebup. Ku Jesus nerangka: “Tang enti aku muru melikat ti jai ngena kuasa kudus Petara, reti nya, Perintah Petara udah bisi ba ditu, tang kita enda nemu pasal nya.”—Matthew 12:27, 28.

Jesus ulih muru bala melikat ti jai ketegal iya jauh bekuasa agi ari Sitan. Nyadi, iya madahka siti jaku sempama kena nulung orang faham. Ku Jesus madahka: “Baka ni ku orang ulih tama ngagai rumah orang ke kering lalu ngerampas reta orang ke kering nya? Endaka iya patut nanchang orang ke kering nya dulu? Udah nya, baru iya ulih ngerampas reta ari rumah orang ke kering nya. Barang sapa ke enda setanah enggau aku, ngelaban aku. Lalu barang sapa ke enda enggau aku ngempuruka orang ngagai aku, iya muru orang ari aku.” (Matthew 12:29, 30) Bala penulis Adat enggau orang Parisi ngelaban Jesus. Tu nunjukka, sida dikena Sitan, laban sida muru orang ari Jesus, iya nya Anak Petara ke disukung Jehovah.

Jesus meri jaku tangkan ngagai sida ke ngelaban iya: “Semua dosa ke dikereja mensia, enggau semua jaku ke ngelaban utai ti kudus ke disebut sida, deka diampun. Tang barang sapa ke bejaku ngelaban kuasa kudus Petara, enda sekali-kali ulih diampun. Dosa nya deka mengkang belama iya.” (Mark 3:28, 29) Jesus ulih muru bala melikat ti jai ketegal bantu ari kuasa kudus Petara. Tang bala penulis Adat sereta orang Parisi nuduh Jesus ngereja nya ketegal kuasa ari Sitan. Nya alai, perundingka meh utai ke deka nyadi ngagai sida ke ngelaban kuasa kudus Petara!