Enda lama pengudah Jesus ngintu Pengerami Paska kena taun 30 M., John Pemaptisa dijil. John deka bala murid iya nitihka Jesus. Taja pia, ukai semua sida ngereja nya taja pan John udah beberapa bulan dijil.

Diatu, Pengerami Paska kena taun 31 M. deka diintu baru. Nya alai, sekeda ari bala murid John datai ngagai Jesus lalu nanya: “Nama kebuah kami enggau orang Parisi selalu bepasa, tang bala murid nuan enda?” (Matthew 9:14) Kebendar iya, bepasa nya siti ari pengawa sembah ke digaga orang Parisi. Jesus indah ngena siti jaku sempama pasal siku orang Parisi ke ngumbai diri manah agi ari orang bukai. Ku orang Parisi nya besampi: “O Petara, aku beterima kasih ngagai Nuan laban aku enda baka orang bukai. Aku bepasa dua kali seminggu.” (Luke 18:11, 12) Nyadi, bala murid John engka ngumbai pengawa bepasa nya siti adat ke patut dititihka. Tauka sida engka bepasa laban deka nunjukka diri tusah ati ketegal John udah dijil. Nya alai, orang engka nanya nama kebuah bala murid Jesus enda bepasa, laban sida engka mega patut nunjukka diri tusah ati ke penusah ke nyadi ba John.

Ku Jesus nyaut sida ngena siti jaku sempama: “Seagi-agi pengantin lelaki agi begulai enggau bala sida ke datai ngagai pengerami tikah iya, kati sida deka tusah ati? Tentu enda. Tang maya deka datai alai pengantin lelaki nya deka diambi ari sida, nya baru sida deka bepasa.”—Matthew 9:15.

John empu kala madah Jesus nya baka siku pengantin lelaki. (John 3:28, 29) Lebuh Jesus agi bisi ba dunya, bala murid iya enda ibuh bepasa. Tang lebuh Jesus mati, bala murid iya deka balat tusah ati nyentukka sida enggai makai. Tang semua nya deka berubah pengudah Jesus diangkatka idup baru! Pengudah nya, bala murid iya nadai agi kebuah deka bepasa ketegal deka nunjukka diri balat tusah ati.

Udah nya, Jesus madahka dua iti jaku sempama tu: “Nadai orang nampal baju ti lama ngena chebik kain ti baru, laban chebik kain ti baru deka nyadi mit, lalu ngasuh baju nya balat agi charik. Pia mega, nadai orang nyimpan wain ti baru dalam kambut kulit wain ti lama, laban tu deka ngasuh kambut nya pechah lalu jai, lalu wain nya deka naya. Tang orang deka nyimpan wain ti baru dalam kambut kulit wain ti baru. Nya baru wain enggau kambut nya enda jai.” (Matthew 9:16, 17) Nama reti ku Jesus?

Jesus nulung bala murid John nemu, nadai orang ulih ngasuh bala murid Jesus nitihka adat lama ke digaga orang Judah empu baka pengawa bepasa. Reti iya, Jesus enda datai ke dunya laban deka nyambung pengawa sembah ke digaga orang Judah. Tu ketegal, pengawa sembah orang Judah nya udah lama lalu deka diketuka enda lama da agi. Pengawa sembah ke  dititihka orang Judah maya jeman Jesus penuh enggau adat mensia. Tang Jesus enda ngasuh sida nyembah Petara nitihka chara nya. Enggau nya, Jesus enda nampal baju ti lama ngena chebik kain ti baru tauka nyimpan wain ti baru dalam kambut wain ti lama.