Peda meh anak mit ba gambar nya. Kati iya sunyi enggau takut? Kala nuan ngasaika nya?— Semua orang kala ngasaika nya. Bup Kudus madah pasal pangan Jehovah ke sunyi enggau takut. Seiku ari sida nya, Elijah. Aram belajar pasal iya.

Elijah diau ba Israel lama sebedau Jesus ada. Raja Israel ke benama Ahap, enda nyembah Jehovah. Ahap enggau bini iya, Jesebel, nyembah petara pelesu ke dikumbai Baal. Mayuh orang ba Israel mega nyembah Baal. Jesebel jai lalu deka munuh semua orang ke nyembah Jehovah, nyengkaum Elijah! Nemu nuan nama digaga Elijah?—

Elijah rari! Iya rari jauh ngagai menua puang lalu belalai ba lubang gua. Nama kebuah iya baka nya?— Amat, iya ta kut. Tang Elijah enda ibuh kelalu takut. Nama kebuah? Laban iya nemu Jehovah ulih nulung iya. Jehovah kala ngayanka kuasa iya ngagai Elijah. Bisi sekali, Jehovah ngasuh api nurun ari langit maya Iya nyaut sampi Elijah. Amat, Jehovah ulih nulung Elijah diatu!

Maya Elijah dalam lubang gua, Jehovah nanya iya: ‘Nama gaga nuan ditu?’ Elijah nyaut: ‘Semina aku aja ke agi nyembah nuan. Aku takut kena bunuh.’ Elijah ngumbai semua penyembah ti bukai udah kena bunuh. Tang, Jehovah madahka Elijah: ‘Enda, nya enda amat. Agi bisi 7,000 iku orang nyembah aku. Anang takut. Aku bisi pengawa ke deka diberi ngagai nuan!’ Kati Elijah gaga ninga nya?—

Nama ulih dipelajar nuan ari Elijah?— Nuan enda ibuh berasai sunyi enggau takut. Nuan bisi kaban ke sayauka Jehovah enggau nuan. Pia mega, Jehovah bisi kuasa, lalu Iya seruran deka nulung nuan! Kati nuan gaga ati laban Jehovah seruran nulung nuan?—