Surat Kereja Rasul 7:1-60
7 Tang imam besai nanya: “Kati semua utai tu amat?”
2 Ku Stepen nyaut: “Bala menyadi enggau bala apai, dinga kita. Sebedau aki kitai Abraham diau ba Haran, Petara ti bemulia udah ngayanka Diri ngagai iya ba Mesopotamia.
3 Petara madah ngagai iya: ‘Tinggalka menua nuan sereta bala kaban belayan nuan, lalu mupuk ngagai menua ke deka ditunjukka Aku ngagai nuan.’
4 Nya alai, iya pan ninggalka menua Kaldea lalu diau ba Haran. Pengudah apai iya nadai, Petara ngasuh iya pindah ngagai menua tu, ke alai kita diau diatu.
5 Tang sekaki tanah ba menua tu pan enda meh diberi Petara ngagai Abraham nyadika pesaka. Taja pia, Petara besemaya deka meri menua tu ngagai Abraham ngambika diempu iya enggau peturun iya, taja pan Abraham nadai anak maya nya.
6 Petara mega madah ngagai iya, bala peturun iya deka nyadi orang asing ba menua bukai lalu sida deka nyadi ulun sereta diperinsa pengelama 400 taun.
7 Ku Petara bejaku, ‘Aku deka ngakim bansa ke ngasuh sida nyadi ulun. Lalu udah nya, sida deka pansut ari menua nya, lalu bejalaika pengawa ti tuchi ngagai Aku ba endur tu.’
8 “Petara mega ngaga sempekat enggau Abraham. Nitihka sempekat nya, Abraham enggau semua anak lelaki iya patut disunat.* Nya alai, Abraham nyunat Isak ba hari kelapan pengudah Isak ada. Isak nyadi apai Jakop,* lalu Jakop nyadi apai 12 iku ketuai raban bansa kitai.
9 Bala ketuai raban bansa nya chemburu ngagai Josep, lalu nyual iya ngagai orang Ejip. Tang Petara bisi enggau Josep,
10 lalu nyelamatka iya ari semua pemerinsa ke ditapi iya. Lebuh iya dibai ngagai Firaun, iya nya raja Ejip, Petara meri iya penemu-dalam sereta nulung iya ngambika Firaun rinduka iya. Nya alai, Firaun milih iya ngambika merintah Ejip sereta ngintu istana Firaun.
11 Tang lapar pungkang nyadi ba serata menua Ejip enggau Kanaan. Penusah ti besai nya nyadi, lalu aki ini kitai enda ulih ngiga pemakai.
12 Tang Jakop ninga ba Ejip bisi pemakai.* Nya alai, iya nganjung aki ini kitai kia keterubah kali.
13 Lebuh sida kia kali kedua, Josep madahka diri ngagai bala menyadi iya, lalu Firaun* ninga rita pasal sida Josep sebilik.
14 Nya alai, Josep ngirum pesan ngambika apai iya, Jakop, sereta semua kaban belayan iya, datai ngagai Ejip. Penyampau sida ke datai nya 75 iku orang.
15 Nya alai, Jakop pan mansang ngagai Ejip, lalu iya mati ba dia. Pia mega enggau bala aki ini kitai.
16 Udah nya, tulang sida dibai ngagai Sekem lalu diengkah ba kubur ke dibeli Abraham ngena duit pirak. Kubur nya dibeli Abraham ari bala anak Hamor ba Sekem.
17 “Lebuh maya nyauka datai alai Petara ngamatka semaya ke udah dipadah Iya ngagai Abraham, bansa kitai majak nambah nyadi mayuh-semayuh ba Ejip.
18 Udah nya, siku raja ke enda ngelala Josep belabuh merintah menua Ejip.
19 Raja nya landik ngena pemula ngelaban bansa kitai, lalu mejal aki ini kitai muai anak sida ke baru ada, ngambika anak nya mati.
20 Maya nya meh Moses ada. Iya balat manah gamal ba mata Petara. Iya diibun ba rumah apai iya pengelama tiga bulan.
21 Tang lebuh apai indai iya dipejal muai iya, anak indu Firaun* ngambi iya lalu ngemesaika iya baka anak diri empu.
22 Nya alai, Moses diajar pasal semua penemu-dalam orang Ejip, lalu iya amat bekuasa sekalika ba jaku tauka ba pengawa iya.
23 “Lebuh iya beumur 40 taun, iya mutuska deka meda gaya pendiau bala menyadi iya, iya nya orang Israel.
24 Lebuh iya meda siku orang Ejip ngereja utai ti enda lurus ngagai siku orang Israel, iya nulung orang Israel ke diperinsa nya. Iya munuh orang Ejip nya kena iya bebalas ngarika orang Israel nya.
25 Moses ngumbai bala menyadi iya ulih nemu Petara deka ngena iya nyelamatka sida. Tang sida agi enda nemu nya.
26 Hari siti, iya datai baru ngagai bala menyadi iya, lalu meda dua iku ari sida benung belaya. Iya pan nguji ngasuh seduai iya bebaik enggau pangan diri. Ku iya bejaku: ‘Seduai sama menyadi. Nama kebuah seduai belaya?’
27 Tang iya ke malu orang nya ngejukka Moses, lalu nanya: ‘Sapa ke milih nuan nyadi pemerintah enggau hakim kami?
28 Kati nuan deka munuh aku baka nuan ke udah munuh orang Ejip nya kemari?’
29 Lebuh Moses ninga nya, iya ngerarika diri ari menua Ejip lalu diau ba Midian nyadi orang asing. Ba dia, iya bisi dua iku anak lelaki.
30 “Empat puluh taun udah nya, siku melikat ngayanka diri ngagai iya ba menua puang ba Bukit Sinai. Melikat nya ayan ba dalam api ti benung mau ba pun kayu ti mit ke beduri.
31 Moses balat alit ati meda nya. Tang lebuh iya mansang semak deka meresa pun kayu nya, iya ninga nyawa Jehovah bejaku:
32 ‘Aku meh Petara aki ini nuan. Aku meh Petara Abraham, Isak, enggau Jakop.’ Moses balat takut lalu enda berani meresa pun kayu nya agi.
33 Jehovah bejaku ngagai iya: ‘Buka kasut nuan. Laban nuan bediri ba tanah ti kudus.’
34 Aku endang udah meda baka ni nembiak Aku diperinsa ba Ejip, lalu Aku udah ninga sebana sida. Nya alai, Aku udah nurun deka nyelamatka sida. Diatu, Aku deka nganjung nuan ngagai Ejip.’
35 Moses nya meh ke enda diterima sida lebuh sida madahka: ‘Sapa ke milih nuan nyadi pemerintah enggau hakim kami?’ Tang nengah melikat ke ngayanka diri ngagai iya ba dalam pun kayu ti mit ke beduri nya, Petara nganjung iya nyadi pemerintah enggau penyelamat sida.
36 Iya mai sida pansut ari Ejip, lalu ngereja mayuh macham pengawa ajih sereta tanda ti ngalitka ati ba Ejip, ba Tasik Mirah, enggau ba menua puang, pengelama 40 taun.
37 “Moses nya meh ke bejaku ngagai orang Israel: ‘Petara deka milih siku nabi baka aku ari bansa kita.’
38 Iya nya meh ke enggau orang Israel ba menua puang. Iya ba dia enggau bala aki ini kitai sereta enggau melikat ke bejaku ngagai iya ba Bukit Sinai. Iya nerima pesan ti kudus ke meruan belama iya,* lalu nusui pesan nya ngagai kitai.
39 Tang aki ini kitai enggai nerima sereta enggai ngasika iya. Indah sida bisi ati deka pulai baru ngagai Ejip.
40 Nya alai, sida madah ngagai Aron: ‘Gaga meh Petara ke kitai kena ngiring kitai, laban kitai enda nemu nama udah nyadi ngagai Moses ke mai kitai pansut ari Ejip.’
41 Nya alai, maya nya, sida ngaga siti engkeramba anak sapi lalu mai pemeri ngagai engkeramba nya. Sida mega ngintu pengerami kena ngayanka basa ngagai utai ke udah digaga sida nya.
42 Nya alai, Petara ninggalka sida sereta nejuka sida nyembah mata panas, bulan, enggau bintang ba langit. Nya endang baka ke udah ditulis ba Ajar Sida Nabi: ‘Orang Israel, pengelama 40 taun kita ba menua puang, kita enda nyayat jelu lalu mai pemeri ngagai Aku.
43 Tang kita mai langkau kain Molok enggau bintang petara Refan ari siti endur ngagai siti endur. Nya meh engkeramba ke digaga lalu disembah kita. Nya alai, aku deka muai kita ngagai endur ti jauh agi ari Babilon.’
44 “Aki ini kitai bisi langkau sembiang* lebuh sida ba menua puang. Petara ngasuh Moses ngaga langkau sembiang nya nitihka chunto ke udah dipeda iya.
45 Udah nya, aki ini kitai nerima langkau sembiang nya, lalu mai iya enggau Josua ngagai menua orang bansa bukai. Petara muru bansa bukai nya lebuh aki ini kitai mansang ngagai menua sida. Langkau sembiang nya agi bisi ba dia nyentuk ngagai jeman David.
46 David dikerinduka Petara, lalu iya minta ngambika diberi peluang ngaga rumah ke Petara Jakop.
47 Tang Solomon meh ke ngaga Rumah nya ke Petara.
48 Taja pia, Petara ti Pemadu Tinggi enda diau ba rumah ke digaga mensia. Utai tu endang amat baka ke disebut siku nabi:
49 ‘Ku Jehovah bejaku, “Serega nya kerusi diraja Aku, lalu dunya nya pelasar kaki Aku. Rumah ke baka ni ti deka digaga kita ke Aku? Ba dini endur Aku belelak?
50 Endaka Aku ke ngaga semua utai nya?”’
51 “Kita tu orang ti kieh.* Kita nutup pending kita sereta enggai ngubah ati kita.* Kita seruran ngelaban kuasa kudus Petara. Utai ke dikereja aki ini kita, nya meh utai ke dikereja kita.
52 Ni bagi nabi ke enda diperinsa aki ini kita? Aki ini kita udah munuh sida ke madah pasal penatai orang ti lurus nya. Diatu, kita udah nyerahka iya ngagai munsuh sereta munuh iya.
53 Kita udah nerima Adat ke dipadah melikat, tang kita enda nitihka Adat nya.”
54 Lebuh sida ninga nya, sida balat pedis ati sereta begerit ngeli lebuh merening Stepen.
55 Tang Stepen penuh laban kuasa kudus Petara. Iya engkadah ke langit lalu meda mulia Petara. Iya mega meda Jesus bediri ba sepiak kanan Petara.
56 “Peda kita,” ku Stepen, “aku meda langit tebuka sereta Anak Mensia bediri ba sepiak kanan Petara.”
57 Sida pan manjung enggau naka penginggar, lalu mampul pending sida ngena jari. Semua sida belanda mansang ngagai Stepen.
58 Sida pan mai iya pansut ari nengeri nya, lalu belabuh nuku iya ngena batu. Bala saksi ti pelesu nya ngengkahka gari luar sida semak kaki siku lelaki ti biak ke benama Saul.
59 Lebuh sida nuku Stepen ngena batu, Stepen lalu bejaku: “Tuan Jesus, aku nyerahka nyawa aku ngagai nuan.”
60 Udah nya, iya besugang lalu ngangau enggau nyawa ti inggar: “O Jehovah, aku minta Nuan, anang ngukum sida ketegal dosa ke digaga sida tu.” Pengudah bejaku munyi nya, iya pan tinduk dalam pemati.
Nota Kaki
^ Tauka “ditutus.”
^ Tauka engka, “Isak ngereja utai ti sama ngagai Jakop.”
^ Tauka “gandum.”
^ Gelar ke diberi ngagai raja Ejip.
^ Gelar ke diberi ngagai raja Ejip.
^ Jaku Asal, “ke idup.”
^ Tauka “langkau ke nyadi saksi ti nunjukka Petara bisi enggau sida.”
^ Tauka “bingking; degil.”
^ Tauka “Kulit ati enggau pending kita enda disunat.”
