Surat Kereja Rasul 21:1-40
21 Taja pan ati kami tusah beserara enggau sida, tang kami patut mupuk. Udah nya, kami belayar ngagai Kos. Hari siti, kami mupuk ngagai Rodes, lalu ari endur nya, kami bekejang ngagai Patara.
2 Pengudah tetemuka kapal ke deka mansang ke seberai ngagai Finisia, kami nepan kapal nya lalu belabuh belayar.
3 Pengudah kami meda Pulau Saiprus ba sepiak kiba, kami terus belayar ngagai Siria. Udah nya, kapal kami sangkai ba Tirus laban deka mantaika barang ba dia.
4 Kami ngiga bala murid ba dia. Pengudah tetemuka sida, kami diau enggau sida pengelama tujuh hari. Nitihka iring kuasa kudus, sida suah nagang Paul mupuk ngagai Jerusalem.
5 Lebuh maya kami patut mupuk, kami pan neruska pejalai kami. Tang semua sida, nyengkaum bala indu enggau bala anak, nganjung kami nyentuk ngagai tebing tasik. Ba dia, kami besugang lalu besampi.
6 Pengudah meri selamat tinggal ngagai pangan diri, kami pan nepan kapal, lalu sida pulai ke rumah.
7 Pengudah bekejang ari Tirus, kami datai ba Pitolemais. Kami meri tabi ngagai bala menyadi ba dia lalu diau sehari enggau sida.
8 Hari siti, kami mupuk baru lalu datai ba Kaisaria. Ba dia, kami tama ngagai rumah Philip lalu diau enggau iya. Iya siku penginjil sereta mega siku ari tujuh iku lelaki ke dipilih bala rasul ba Jerusalem.
9 Iya bisi empat iku anak indu ke bedau belaki, lalu sida ulih benabi.
10 Lama ati diri kami diau ba dia. Udah nya, siku nabi ke benama Agabus datai ari Judea.
11 Iya datai ngagai kami lalu ngambi belulang Paul. Udah nya, iya nanchang kaki enggau jari iya empu ngena belulang nya lalu madahka: “Tu utai ke disebut kuasa kudus, ‘Baka tu ku orang Judah ba Jerusalem deka nanchang orang ke ngempu belulang tu, lalu sida deka nyerahka iya ngagai orang bansa bukai.’”
12 Pengudah kami ninga jaku iya, kami enggau semua orang ba dia bebendar enda ngasuh Paul ngagai Jerusalem.
13 Tang Paul madahka: “Nama kebuah kita nyabak lalu nguji deka ngelemika ati aku? Anang irau. Aku ukai semina sedia deka ditanchang, tang aku mega sedia deka mati ba Jerusalem ketegal nama Tuan Jesus.”
14 Ketegal Paul enggai mendingka kami, kami badu agi nguji nagang iya lalu madahka: “Awakka peneka Jehovah nyadi.”
15 Pengudah nya, kami bekemas lalu mupuk ngagai Jerusalem.
16 Sekeda murid ari Kaisaria mega enggau kami, lalu sida nganjung kami ngagai rumah Manason laban kami deka diau ba rumah iya. Manason datai ari Saiprus, lalu iya siku ari murid ti keterubah.
17 Lebuh kami datai ba Jerusalem, bala menyadi nerima penatai kami enggau gaga ati.
18 Ba hari siti, kami sida Paul betemu enggau James. Semua bala tuai gempuru mega bisi ba dia.
19 Paul meri jaku tabi ngagai sida lalu belabuh nusui enggau silik pasal utai ke udah digaga Petara ba orang bansa bukai nengah pengawa nginjil ke digaga iya.
20 Pengudah ninga nya, sida ngemuliaka Petara lalu bejaku ngagai Paul: “Menyadi, bisi beribu-ribu iku orang Judah ke arap lalu semua sida ransing nitihka Adat.
21 Tang sida ninga cherita pasal nuan ke ngajar semua orang Judah ke diau begulai enggau orang bansa bukai. Kenu ku cherita, nuan ngasuh sida ninggalka Adat Moses laban nuan enda ngasuh sida nyunat* anak sida tauka enda ngasuh sida iya nitihka adat sida.
22 Nyadi, nama patut digaga kitai? Sida tentu deka nemu nuan udah datai.
23 Nya alai, kereja utai ke diasuh kami tu. Ba ditu bisi empat iku lelaki ke udah besumpah ngagai Petara.
24 Bai sida iya lalu tuchi diri empu enggau sida nitihka adat. Bayar mega belanja sida ngambika sida ulih ngukur pala sida. Enggau nya, semua orang deka nemu, cherita pasal nuan nya semina cherita ngapa laban pendiau nuan manah, lalu nuan nitihka Adat.
25 Tang kami udah nganjung surat pasal pemutus kami ngagai orang ari bansa bukai ke udah arap. Sida patut nyeliahka diri ari nama-nama utai ke diberi ngagai engkeramba, ari darah, ari makai dagin jelu ke mati dichekal,* enggau ari ulah seks ti kamah.”*
26 Nya alai, hari siti, Paul mai sida empat nya, lalu sida sama nuchi diri nitihka adat. Udah nya, iya tama ngagai Rumah Sembiang lalu madahka ni maya timpuh pengawa nuchi diri nya deka abis, ngambika imam ulih meri pemeri ngarika tiap iku sida.
27 Lebuh timpuh ke pengelama tujuh hari nya nyauka abis, orang Judah ari Asia tepedaka Paul ba Rumah Sembiang. Sida ngasut* orang mayuh lalu nangkap Paul.
28 Ku sida iya manjung: “Orang Israel, tulung kami! Tu meh orang ke ngajar orang ba serata endur ngambika ngelaban bansa kitai, Adat kitai, enggau Rumah Sembiang tu. Ukai nya aja, iya indah mai orang Gerika ngagai Rumah Sembiang lalu ngamahka endur ti kudus tu.”
29 Sida nyebut munyi nya laban sida kala meda orang Epesus ke benama Tropimus enggau Paul ba Jerusalem. Nya alai, sida ngumbai Paul udah mai iya ngagai Rumah Sembiang.
30 Semua orang ba nengeri nya lalu begau magang. Orang mayuh sama belanda ngagai Rumah Sembiang. Sida nangkap Paul lalu ngirit iya pansut ari nya. Pintu Rumah Sembiang lalu ditutup tekala nya.
31 Lebuh sida nguji deka munuh Paul, siku ketuai soldadu nerima berita pasal orang ke begau ba Jerusalem.
32 Nya alai, iya lalu tekala nya mai bala soldadu enggau bala pegawai soldadu mupuk kia enggau lengkas. Lebuh orang mayuh meda ketuai soldadu nya enggau bala soldadu, sida pan ngetu malu Paul.
33 Udah nya, ketuai soldadu nya mansang ngagai Paul lalu nangkap iya. Pengudah ngasuh bala soldadu iya nanchang Paul ngena dua iti rantai, iya nanya orang mayuh pasal sapa Paul enggau nama utai ke udah digaga iya.
34 Tang orang ba dia nyau begau baru. Bisi nya manjung munyi tu, lalu bisi nya manjung munyi nya. Nya alai, ketuai soldadu nya enda ulih nemu nama utai ke amat nyadi. Iya pan ngasuh Paul dibai ngagai endur alai soldadu diau.
35 Tang lebuh Paul datai ba tangga, bala soldadu patut ngangkatka iya, laban orang mayuh balat deka ngemediska iya.
36 Sida majak nitihka iya lalu manjung: “Bunuh iya!”
37 Lebuh Paul nyauka datai ba endur alai soldadu diau, iya bejaku ngagai ketuai soldadu nya: “Ulih aku bejaku enggau nuan, tuan?” Ketuai soldadu nya nyaut: “Ulih nuan bejaku ngena jaku Gerika?
38 Kati nuan tu orang Ejip ke mai orang ngelaban perintah, lalu bedau lama ti udah nuan nguluka 4,000 iku lelaki ke besenyata mansang ngagai menua puang?”
39 Ku Paul nyaut: “Ukai. Kebendar iya, aku orang Judah ke datai ari Tarsus, nengeri ti tebilang ba Kilikia. Tuan, aku minta nuan ngemendarka aku bejaku ngagai orang mayuh tu.”
40 Pengudah ketuai soldadu nya meri iya pemendar bejaku, Paul bediri ba tangga lalu ngaga tanda ngena jari iya ngagai orang mayuh. Lebuh sida nyau jenuh, iya lalu bejaku ngagai sida ngena jaku Hebrew. Ku iya:
Nota Kaki
^ Tauka “nutus.”
^ Tauka “jelu ke dibunuh tang darah enda dibuai ari tubuh jelu nya.”
^ Jaku Gerika, “por·nei′a.” Peda Penerang Leka Jaku.
^ Tauka “nyungkak.”
