Rome 15:1-33
15 Kitai ke tegap ba pengarap patut berundingka pengelemi sida ke enda tegap. Kitai enda patut semina deka ngelantangka diri empu aja.
2 Tiap iku kitai patut ngelantangka ati orang bukai sereta ngereja utai ti manah kena negapka sida.
3 Laban indah Kristus enda ngelantangka diri empu. Bup Kudus madahka: “Jaku jai ke disebut sida pasal Nuan dikena sida bejaika aku.”
4 Semua utai ke udah ditulis dulu kelia ba Bup Kudus endang ditulis kena ngajar kitai, laban Bup Kudus nulung kitai betan sereta meri kitai peransang. Nya alai, kitai andal nganti utai ke deka diberi Petara jemah ila.
5 Awakka Petara nulung kita betan sereta meri kita peransang, lalu aku besampi ngambika Iya meri semua kita runding ti sama baka Jesus Kristus.
6 Enggau nya, kita deka beserakup ngemuliaka Petara, iya nya Apai Tuan kitai, Jesus Kristus.
7 Baka Kristus ke nerima* kita, kita patut nerima pangan diri ngambika Petara dimuliaka.
8 Aku madah ngagai kita, Kristus nyadi ulun orang Judah* kena nunjukka jaku Petara endang amat sereta nunjukka semaya ke diberi Iya ngagai aki ini sida tau dikearapka.
9 Kristus mega ngereja nya ngambika bansa bukai ulih ngemuliaka Petara ketegal pengasih Iya. Bup Kudus madahka: “Nya meh kebuah aku deka muji Nuan ba mua bansa bukai, lalu aku deka belagu muji nama Nuan.”
10 Lalu Petara mega madahka: “Gaga ati meh kita orang bansa bukai begulai enggau nembiak Petara.”
11 Ayat bukai madahka: “Puji meh Jehovah, semua kita orang bansa bukai, lalu awakka semua orang muji Iya.”
12 Isaiah mega madahka: “Siku orang ari peturun* Jesi deka datai merintah orang ari mayuh bansa, lalu sida deka pechayaka iya.”
13 Awakka Petara ke nulung kita nganti enggau andal utai ke udah disemayaka Iya ngemenuhka ati kita enggau pengaga sereta pengelantang ti besai, laban kita pechayaka Iya. Ngarapka enggau tulung kuasa kudus, pengandal kita ke semaya Iya deka majak nambah.
14 Bala menyadi, aku andal, kita amat manah. Kita bisi penemu sereta ulih ngajar* pangan diri.
15 Tang ketegal pemanah ati ti besai ke udah diayanka Petara ngagai aku, aku udah nulis enggau terus terang pasal sekeda pekara kena ngingatka kita.
16 Aku tu ulun Jesus Kristus ke nusui Berita Manah pasal Petara ngagai orang bansa bukai. Aku bebendar ngereja pengawa ti kudus tu, ngambika sida ulih nyadi pemeri ti ngelantangka Petara, iya nya pemeri ti udah dikuduska ke Iya nengah kuasa kudus.
17 Aku gaga ati nyadi murid Jesus Kristus sereta ngereja pengawa ari Petara.
18 Aku enggai bejaku pasal nama-nama utai kelimpah ari pasal utai ke udah digaga sereta disebut Kristus nengah aku, kena nulung orang bansa bukai ngasika iya.
19 Sida ngasi ketegal kereja ajih enggau tanda ke digaga kuasa kudus Petara. Enggau chara nya, aku udah nusui Berita Manah enggau silik pasal Kristus ari Jerusalem nyentuk ngagai Ilirikum.
20 Aku bebendar nyeliahka diri ari nusui Berita Manah ba endur orang ke udah nemu pasal Kristus, laban aku enggai neruska pengawa ke udah dulu digaga orang bukai.
21 Baka ke ditulis ba Bup Kudus: “Orang ke enda kala dipadah pasal iya, deka meda iya, lalu orang ke enda kala ninga, deka mereti.”
22 Nya meh kebuah aku suah enda ulih datai ngagai kita.
23 Tang diatu, aku udah nembuka pengawa nginjil aku ba endur nya. Nambahka nya, udah betaun-taun aku sigi keran deka nemuai ngagai kita.
24 Nya alai, lebuh mansang ngagai Sepanyol, aku ngarapka diri ulih betemu enggau kita. Pengudah rindu ati begulai enggau kita ba sesiti timpuh, aku ngarapka kita ulih sama bejalai enggau aku enda lama lebuh aku neruska pejalai ngagai Sepanyol.
25 Tang diatu, aku deka mansang ngagai Jerusalem ngambika ulih nulung bala nembiak Petara ti kudus ba din.
26 Bala menyadi ba Masedonia enggau Akaya gaga ati meri bantu ngagai nembiak Petara ti kudus ke seranta ba Jerusalem.
27 Sida gaga ati ngereja nya, laban sida berutang budi ngagai bala menyadi ba Jerusalem. Bala menyadi ba Jerusalem udah bekunsika utai ke diterima ari Petara enggau sida. Nya alai, sida patut bekunsika utai enggau bala menyadi ba Jerusalem.
28 Pengudah aku nganjung bantu nya ngagai sida, aku deka ngetu betemu enggau kita lebuh aku mansang ngagai Sepanyol.
29 Aku nemu, lebuh aku datai ngagai kita, aku deka mai naka pemayuh berekat ari Kristus.
30 Bala menyadi, nengah Tuan kitai, Jesus Kristus, enggau nengah pengerindu ke datai ari kuasa kudus, aku minta kita sama enggau aku bebendar besampika aku ngagai Petara.
31 Besampi meh ngambika aku diselamatka ari orang ke enda arap ba Judea. Besampi mega ngambika nembiak Petara ti kudus ba Jerusalem lantang ati nerima bantu ke dibai aku ngagai sida.
32 Enggau nya, enti nya peneka Petara, aku deka datai ngagai kita enggau ati ti balat gaga, lalu kitai ulih meransang pangan diri.
33 Ngarapka Petara ke meri pengelantang deka seruran enggau semua kita. Amin.
Nota Kaki
^ Tauka “nyambut.”
^ Jaku Asal, “sida ke udah disunat.”
^ Jaku Asal, “urat.”
^ Tauka “ngelalau.”
