Pemungkal 3:1-24
3 Ular nya jelu ti pemadu bejimat* ari semua jelu liar ti digaga Petara Jehovah. Ku ular nanya indu nya: “Amat Petara enda ngasuh seduai makai buah ari semua pun kayu ba taman tu?”
2 Ku indu nya nyaut: “Kami tau makai buah ari semua pun kayu ba taman tu.
3 Tang pasal buah ari pun kayu ba tengah taman tu, Petara madah: ‘Nuan enda tau makai buah ari pun kayu nya tauka negu iya. Enti nuan ngereja nya, nuan deka mati.’”
4 Tang ku ular nya nyaut: “Enda seduai mati.
5 Petara nemu, lebuh seduai makai buah nya, tekala nya mata seduai deka tebuka lalu nyadi baka Petara, ngelala utai ti manah enggau utai ti jai.”
6 Indu nya lalu beratika buah ari pun kayu nya manah ke pemakai sereta manah dipeda, lalu tu narit ati iya. Nya alai iya ngambi buah nya lalu makai buah nya. Lebuh iya begulai enggau laki iya, iya meri sekeda ari buah nya ngagai laki iya, lalu laki iya pan makai buah nya.
7 Udah nya, mata seduai iya tebuka lalu seduai iya nemu diri telanjai. Nya alai seduai iya nyait daun kayu ara kena nutup tubuh diri.
8 Lemai nya, lebuh maya angin bepuput, Petara Jehovah bejalai ba taman nya. Lebuh lelaki nya enggau bini iya ninga nyawa Petara, seduai iya lalu belalai ari Petara Jehovah ba sebelah pun kayu dalam taman nya.
9 Petara Jehovah majak ngangauka lelaki nya. Ku Iya: “Dini nuan?”
10 Nyau kelama, lelaki nya pan nyaut: “Bisi aku ninga nyawa Nuan, tang aku takut laban aku telanjai. Nya alai aku belalai.”
11 Petara lalu nanya iya: “Sapa madah nuan telanjai? Kati nuan udah makai buah ari pun kayu ke enda diasuh Aku?”
12 Ku lelaki nya nyaut: “Indu ke diberi Nuan ngagai aku nya, iya meh ke meri aku buah nya. Nya kebuah aku makai buah nya.”
13 Petara Jehovah lalu bejaku enggau indu nya: “Nama kebuah nuan ngereja nya?” Indu nya nyaut: “Ular nya ke nipu aku! Nya alai aku makai buah nya.”
14 Udah nya, Petara Jehovah bejaku ngagai ular nya: “Ketegal pengawa nuan nya, ari semua jelu tupi enggau semua jelu liar, semina nuan aja deka kena sumpah. Nuan deka ngerayap ngena perut nuan, lalu nuan deka makai debu seumur idup nuan.
15 Aku deka ngasuh nuan enggau indu nya bemunsuh enggau pangan diri. Aku mega deka ngasuh peturun nuan enggau peturun indu nya bemunsuh enggau pangan diri. Peturun indu nya deka ngeredakka pala nuan, lalu nuan deka mantuk tumbit iya.”
16 Ku Petara bejaku ngagai indu nya: “Nuan deka majak pedis maya nuan ngandung, lalu nuan deka berasai pedis maya nuan beranak. Nuan mega balat inginka laki nuan, lalu iya deka bekuasa atas nuan.”
17 Petara bejaku ngagai Adam:* “Taja pan Aku udah meri nuan pesan tu, ‘Nuan enda tau makai buah ari pun kayu nya,’ tang nuan mendingka jaku bini nuan lalu makai buah nya. Nya alai, ketegal pengawa nuan nya, tanah deka kena sumpah. Nuan deka bebendar gawa ngulihka pemakai ari tanah seumur idup nuan.
18 Tanah deka mansutka babas ti beduri enggau lalang, lalu nuan mesti makai utai ke tumbuh ba tanah.
19 Nuan deka bepeluh tusur ngiga pemakai nyentukka nuan pulai ke tanah laban nuan digaga ari tanah. Ketegal nuan tanah, nuan deka pulai baru ke tanah.”
20 Udah nya, Adam meri bini iya nama Awa,* laban bini iya deka nyadi indai ke semua mensia.
21 Petara Jehovah lalu ngaga gari ti panjai ari kulit jelu ke Adam enggau bini iya. Seduai iya pan ngena gari nya.
22 Udah nya, Petara Jehovah bejaku: “Lelaki nya udah sama baka tua,* nemu ngelala utai ti manah enggau utai ti jai. Iya enda tau ngambi buah ari pun kayu pengidup, makai buah nya lalu idup belama iya.”
23 Nya alai, Petara Jehovah muru lelaki nya ari taman Eden ngambika iya gawa ba tanah. Lelaki nya udah digaga ari tanah, lalu iya deka gawa ba tanah.
24 Pengudah Petara muru lelaki nya, Iya ngengkahka melikat cherub ba timur taman Eden enggau pedang ti beapi-api ke enda ngetu bepusin kena nyaga jalai ngagai pun kayu pengidup.
Nota Kaki
^ Tauka “pintar; licik.”
^ Reti nya “Mensia.”
^ Reti nya “Iya ti Idup.”
^ Dalam jaku Hebrew asal, leka jaku tu ulih merujuk ngagai dua iku orang tauka lebih.
