Pemandang 7:1-17
7 Udah nya, aku meda empat iku melikat bediri ba empat iti sukut dunya. Sida ngetanka enggau rat empat angin dunya ngambika angin enda bepuput ba dunya, tasik, tauka pun kayu.
2 Aku lalu meda siku da agi melikat niki ari endur mata panas tumbuh.* Iya megai chop Petara ti idup. Enggau nyawa ti inggar, iya ngangauka empat iku melikat ke udah diberi pemendar ngambika nganchurka dunya enggau tasik:
3 “Anang nganchurka dunya tauka tasik tauka pun kayu, nyentukka kami udah ngechop kening bala ulun Petara kitai.”
4 Aku ninga bisi 144,000 iku orang ke udah dichop. Sida iya datai ari tiap iti raban bansa Israel:
5 Ari raban bansa Judah, 12,000 iku dichop;ari raban bansa Reuben, 12,000 iku;ari raban bansa Gat, 12,000 iku;
6 ari raban bansa Aser, 12,000 iku;ari raban bansa Naptali, 12,000 iku;ari raban bansa Manasi, 12,000 iku;
7 ari raban bansa Simion, 12,000 iku;ari raban bansa Lewi, 12,000 iku;ari raban bansa Isakar, 12,000 iku;
8 ari raban bansa Sebulun, 12,000 iku;ari raban bansa Josep, 12,000 iku;ari raban bansa Benjamin, 12,000 iku dichop.
9 Udah nya, aku meda seraban orang ti mayuh nyentukka enda alah diitung sapa-sapa. Sida datai ari semua menua, raban bansa, bansa, enggau jaku. Sida bediri ba mua kerusi diraja enggau ba mua Anak Bedus, ngena baju jubah burak sereta megai dan engkerema ba jari sida.
10 Enggau penuh terima kasih, sida majak manjung enggau nyawa ti inggar: “Petara kitai ke duduk ba kerusi diraja enggau Anak Bedus udah nyelamatka kami.”
11 Semua bala melikat bediri ngelingi kerusi diraja, bala tuai, sereta empat iku melikat nya. Sida besugang ba mua kerusi diraja nyembah Petara,
12 lalu madahka: “Amin! Awakka Petara kitai ti bepenemu-dalam, ti bekuasa, ti kering, nerima puji, mulia, enggau basa, lalu awakka semua meri terima kasih ngagai Iya nyentuk ke belama iya. Amin.”
13 Udah nya, siku ari bala tuai nanya aku: “Sapa sida ke ngena baju jubah burak nya? Ari ni penatai sida?”
14 Aku pan lalu tekala nya nyaut iya: “Tuan aku, nuan meh ke nemu.” Iya lalu madah ngagai aku: “Sida meh ke selamat pansut ari Penusah ti Besai, lalu ngena darah Anak Bedus, sida udah masu baju jubah sida nyadi burak.
15 Nya meh kebuah sida ba mua kerusi diraja Petara. Ba Rumah Sembiang Iya, siang malam sida bejalaika pengawa ti tuchi ke Iya. Iya ke duduk ba kerusi diraja deka ngerembaika langkau kain Iya ba atas sida kena nyaga sida.
16 Sida enda agi lapar tauka aus. Mata panas tauka pengangat mata panas mega enda ngemediska sida,
17 laban baka siku pengibun bedus, Anak Bedus ke bediri semak enggau kerusi diraja deka ngiring sida ngagai pun penatai ai* pengidup. Petara mega deka ngendas semua ai mata sida.”
