Matthew 25:1-46
25 “Kelimpah ari nya, Perintah serega tau dibandingka enggau 10 iku indu dara, ke mai lampu kelita mansang ngambat pengantin lelaki.
2 Lima iku ari sida nya beli, lalu lima iku da agi pintar.*
3 Sida ke beli mai lampu kelita sida, tang sida nadai mai minyak lebih.
4 Tang sida ke pintar mai lampu kelita sida, sereta mega mai minyak dalam butul.
5 Lebuh pengantin lelaki nya laun datai, semua sida ngantuk lalu tinduk.
6 Tang ba tengah malam, bisi orang ngangau: ‘Pengantin lelaki udah datai! Pansut kita lalu ambat iya.’
7 Semua indu dara nya angkat lalu nyediaka lampu kelita sida.
8 Sida ke beli lalu bejaku ngagai sida ke pintar: ‘Beri kami minyak, laban lampu kelita kami nyauka padam.’
9 Tang ku sida ke pintar nyaut: ‘Engka enda chukup minyak tu dibagi kitai. Manah kita mansang ngagai orang ke bejual minyak, lalu meli minyak ke diri empu.’
10 Lebuh sida mansang meli minyak, pengantin lelaki nya pan datai. Bala indu dara ke udah besedia nya, tama enggau pengantin lelaki nya ngagai pengerami tikah. Pintu pan lalu ditutup.
11 Udah nya, bala indu dara ke bukai pan datai. Ku sida: ‘Tuan, tuan! Buka pintu ke kami!’
12 Tang ku pengantin lelaki nya nyaut: ‘Enggau bendar aku madah ngagai kita: Aku enda ngelala kita.’
13 “Nya alai, kita patut seruran bejaga, laban kita enda nemu hari tauka jam iya.
14 “Perintah serega mega baka siku lelaki, ke baru deka bejalai ngagai menua bukai. Iya ngangauka bala ulun iya, lalu ngasuh sida ngemataka reta tengkira iya.
15 Siku diberi iya lima beg duit pirak,* siku da agi diberi iya dua beg duit pirak,* lalu siku ke bukai diberi iya sebeg duit pirak,* nitihka pengelandik sida siku-siku. Udah nya, iya mupuk ngagai menua bukai.
16 Ulun ke nerima lima beg duit pirak, lalu tekala nya bedagang ngena duit nya. Iya bulih untung lima beg agi duit pirak.
17 Pia mega, ulun ke nerima dua beg duit pirak, bulih untung dua beg agi duit pirak.
18 Tang ulun ke nerima sebeg duit pirak, numbak lubang tanah lalu ngelalaika duit pirak tuan iya ba dalam lubang nya.
19 “Nyau kelama, tuan bala ulun nya pulai. Iya meresa nama ke udah digaga sida enggau duit iya.
20 Ulun ke nerima lima beg duit pirak, datai lalu mai lima beg agi duit pirak. Ku iya: ‘Tuan, nuan udah meri lima beg duit pirak ngagai aku. Peda nuan! Aku bulih untung lima beg agi duit pirak.’
21 Ku tuan iya nyaut: ‘Manah nya! Nuan meh ulun ke manah sereta tetap ati. Nuan tau dikearapka ngemataka utai ti mimit. Nya alai, aku deka milih nuan ngemataka mayuh agi utai. Aram sama gaga ati enggau tuan nuan.’
22 Udah nya, ulun ke nerima dua beg duit pirak datai. Ku iya: ‘Tuan, nuan udah meri dua beg duit pirak ngagai aku. Peda nuan! Aku bulih untung dua beg agi duit pirak.’
23 Ku tuan iya nyaut: ‘Manah nya! Nuan meh ulun ke manah sereta tetap ati. Nuan tau dikearapka ngemataka utai ti mimit. Nya alai, aku deka milih nuan ngemataka mayuh agi utai. Aram sama gaga ati enggau tuan nuan.’
24 “Ke penudi sekali, ulun ke nerima sebeg duit pirak datai. Ku iya: ‘Tuan, aku nemu nuan endang orang ke terit. Nuan ngetau taja pan nuan enda nanam, lalu nuan ngumpul gandum ke udah ditampi orang.
25 Nya alai, aku takut lalu ngelalaika duit pirak nuan dalam tanah. Nah, tu duit nuan.’
26 Tang ku tuan iya nyaut iya: ‘Nuan tu ulun ke jai sereta ngelusu!* Nuan nemu aku ngetau taja pan enda nanam, lalu aku ngumpul gandum ke udah ditampi orang, enda pia?
27 Enti pia, nuan patut nyimpan duit pirak aku dalam bank, ngambika lebuh aku datai, aku ulih nerima duit nya enggau bungai iya.
28 “‘Nya alai, ambi duit pirak nya ari iya, lalu beri ngagai ulun ke bisi 10 beg duit pirak.
29 Genap iku orang ke bisi utai, deka diberi mayuh agi, ngambika iya bisi mayuh utai, lebih ari ke chukup. Tang orang ke nadai utai, indah utai ti dikemisi iya deh, deka diambi ari iya.
30 Buai ulun ke nadai guna nya ke luar ngagai endur ti petang. Ba dia meh iya deka nyabak sereta begerit ngeli.’
31 “Lebuh Anak Mensia datai dalam mulia iya enggau semua melikat, iya deka duduk ba kerusi diraja iya ti bemulia.
32 Semua bansa deka digempuruka ba mua iya, lalu iya deka nyeraraka sida ari pangan diri, baka pengibun bedus ke nyeraraka bedus ari kambin.
33 Bala bedus deka diengkah iya ba sepiak kanan iya. Tang bala kambin diengkah ba sepiak kiba iya.
34 “Udah nya, Raja deka bejaku ngagai orang ke ba sepiak kanan iya: ‘Datai kitu, kita ke udah diberekatka Apai aku, awakka kita bempu Perintah ti udah disedia ke kita kenyau ari penumbuh dunya.*
35 Laban lebuh aku lapar, kita meri aku makai; lebuh aku aus, kita meri aku ngirup; kita enda ngelala aku, tang kita ngelaluka aku ngagai rumah kita;
36 lebuh aku telanjai,* kita meri aku gari; lebuh aku sakit, kita ngintu aku; lebuh aku dijil, kita ngabas aku.’
37 Udah nya, orang ke lurus deka nyaut iya: ‘Tuan, kemaya kami meda nuan lapar, lalu meri nuan makai, tauka meda nuan aus, lalu meri nuan ngirup?
38 Kemaya kami ngelaluka nuan ngagai rumah kami taja pan kami enda ngelala nuan, tauka meda nuan telanjai, lalu meri nuan gari?
39 Kemaya kami meda nuan sakit, tauka meda nuan dijil, lalu ngabas nuan?
40 Nya alai, Raja nyaut sida: ‘Enggau bendar aku madah ngagai kita: Lebuh kita ngereja nya ngagai siku ari menyadi aku ti pemadu mit, kita ngereja nya ngagai aku.’
41 “Udah nya, iya bejaku ngagai orang ke ba sepiak kiba iya: ‘Rari ari tu, kita ke kena sumpah. Alai kita ngagai api ti enda nemu padam, ke udah disedia ke Sitan* enggau ke bala melikat iya.
42 Laban lebuh aku lapar, kita enda meri aku makai; lebuh aku aus, kita enda meri aku ngirup;
43 lebuh kita enda ngelala aku, kita enda ngelaluka aku ngagai rumah kita; lebuh aku telanjai, kita enda meri aku gari; lebuh aku sakit enggau dijil, kita enda ngintu aku.’
44 Ku sida nyaut: ‘Tuan, kemaya kami meda nuan lapar tauka aus, kemaya kami enda ngelala nuan, tauka meda nuan telanjai tauka sakit tauka dijil, lalu enda ngintu nuan?’
45 Nya alai, iya deka nyaut sida: ‘Enggau bendar aku madah ngagai kita: Enti kita enda ngereja nya ngagai siku ari menyadi aku ti pemadu mit, kita enda ngereja nya ngagai aku.’
46 Lalu sida tu deka mati belama iya.* Tang sida ke lurus deka idup belama iya.”
Nota Kaki
^ Tauka “bepenemu-dalam.”
^ Jaku Asal, “lima talenta.” Satu talenta Gerika berat iya 20.4 kg.
^ Jaku Asal, “dua talenta.”
^ Jaku Asal, “satu talenta.”
^ Tauka “buruk; malas!”
^ Iya nya, kenyau ari maya anak Adam seduai Awa ada.
^ Tauka “lebuh gari aku enda chukup.”
^ Jaku Gerika, “di·a′bo·los.” Leka jaku tu dikena ba orang ke ngenyaika nama manah orang bukai.
^ Jaku Asal, “ditetak belama iya,” baka dan ke ditetak ari pun kayu.
