Matthew 23:1-39
23 Udah nya, Jesus bejaku ngagai orang mayuh sereta ngagai bala murid iya:
2 “Sida penulis Adat enggau orang Parisi udah milih diri empu ngambi penuduk Moses.
3 Nya alai, kereja sebarang utai ti diasuh sida gaga kita, tang anang nitihka pengawa sida, laban sida enda nitihka utai ke diajar sida empu.
4 Sida nanchangka ma ti berat, lalu ngengkahka ma nya ba bau orang bukai, tang sida empu enggai negu ma nya ngena tunjuk jari sida.
5 Sida minta diri dipeda orang mayuh lebuh ngereja semua pengawa sida. Peda pemesai utai ke alai sida nyimpan ayat Bup Kudus* ti dikena sida nyadika jimat!* Peda meh pemanjai buchai* gari sida!
6 Sida rinduka endur ti pemadu badas maya pengerami makai besai, enggau rindu duduk ba endur ti pemadu mua* ba balai gempuru.
7 Sida rindu dipebasa orang ba sebelah pasar, lalu rindu dikumbai orang Rabbi.*
8 Tang kita anang nerima gelar Rabbi, laban kita semina bisi siku aja Pengajar, lalu semua kita diri menyadi magang.
9 Pia mega, anang ngumbai orang ba dunya tu apai,* laban kita semina bisi siku aja Apai, Iya ke ba serega.
10 Anang mega nerima gelar kepala, laban kita semina bisi siku aja Kepala, iya nya Kristus.
11 Orang ke pemadu besai ba bala kita patut ngintu* kita.
12 Barang sapa ke ngeninggika diri, deka dikemaruhka, lalu barang sapa ke ngemaruhka diri, deka ditinggika.
13 “Tulah meh kita penulis Adat enggau orang Parisi. Kita orang ke pura-pura ngapa! Kita nutup pintu Perintah serega ba mua orang mayuh. Kita empu enda tama, tang kita mega nagang orang bukai tama.
14 * ——
15 “Tulah meh kita penulis Adat enggau orang Parisi. Kita orang ke pura-pura ngapa! Laban kita belayar meraka tasik lalu bejalai ngagai mayuh endur, nguji mai siku orang megai pengarap kita. Tang lebuh iya megai pengarap kita, kita ngasuh iya balat agi bedosa ari kita, lalu iya patut dibuai ngagai Gehena.*
16 “Tulah meh kita malin* ke buta! Kita nyebut: ‘Enti orang besumpah atas nama Rumah Sembiang, iya tau enda ibuh ngamatka sumpah iya. Tang enti iya besumpah atas nama emas ke ba Rumah Sembiang, iya patut ngamatka sumpah iya.’
17 Kita tu beli sereta buta! Ni ke beguna agi? Emas tauka Rumah Sembiang ke ngasuh emas nya kudus?
18 Kita mega madahka: ‘Enti orang besumpah atas nama alta, iya tau enda ibuh ngamatka sumpah iya. Tang enti iya besumpah atas nama pemeri ke bisi ba atas alta nya, iya patut ngamatka sumpah iya.’
19 Kita tu buta! Ni ke beguna agi? Pemeri tauka alta ke ngasuh pemeri nya kudus?
20 Nya alai, barang sapa ke besumpah atas nama alta, iya besumpah mega atas nama alta nya, enggau atas nama semua pemeri ke ba atas alta nya;
21 barang sapa ke besumpah atas nama Rumah Sembiang, iya besumpah mega atas nama Rumah Sembiang nya, enggau atas nama Petara ti diau dalam Rumah Sembiang nya;
22 lalu barang sapa ke besumpah atas nama serega, iya besumpah mega atas nama kerusi diraja Petara, enggau atas nama Iya ke duduk ba kerusi diraja nya.
23 “Tulah meh kita penulis Adat enggau orang Parisi. Kita orang ke pura-pura ngapa! Kita meri pudina, adas manis, enggau jintan* nyadika pemeri,* tang kita enda beberatka utai ke beguna agi ba Adat, baka pengelurus, pengasih, enggau pengarap. Pemeri endang beguna, tang pekara ke bukai mega patut dikemeratka.
24 Kita malin ke buta! Kita muai kerengit ari ai irup kita, tang kita nelan unta!
25 “Tulah meh kita penulis Adat enggau orang Parisi. Kita orang ke pura-pura ngapa! Kita nuchi mangkuk enggau chapak kita ari luar, tang ba dalam penuh laban pengamu enggau pengingin ti enda ditagang.
26 Kita orang Parisi ke buta! Tuchi dulu mangkuk enggau chapak kita ari dalam, ngambika iya mega beresi ari luar.
27 “Tulah meh kita penulis Adat enggau orang Parisi. Kita orang ke pura-pura ngapa! Kita baka kubur ti udah dichat burak, ti manah gaya dipeda ari luar, tang ba dalam penuh laban tulang orang mati sereta semua macham utai ti kamah.
28 Baka nya mega kita, ba luar kita baka orang ke lurus, tang ba dalam ati kita penuh enggau pemula sereta penyai.
29 “Tulah meh kita penulis Adat enggau orang Parisi. Kita orang ke pura-pura ngapa! Kita begagaka pendam ke bala nabi, lalu ngias kubur orang ke lurus,
30 lalu kita mega madah: ‘Enti sema kami idup maya aki ini kami kelia, kami tentu enda enggau sida munuh bala nabi.’
31 Nya alai, jaku kita empu nunjukka kita peturun orang ke udah munuh bala nabi.
32 Enti pia, tembuka meh pengawa ti udah berengkah digaga bala aki ini kita.
33 “Kita nya ular sereta anak ular ti bisa! Baka ni ku kita ulih ngerarika diri ari diukum ba Gehena?*
34 Nya alai, aku ngirumka bala nabi, orang ke bepenemu-dalam, sereta bala pengajar ngagai kita. Sekeda ari sida deka dibunuh kita, sereta dipantang ba tiang. Sekeda deka disipat kita ba balai gempuru kita, lalu sekeda nya diperinsa kita ari nengeri sebuah ngagai nengeri sebuah.
35 Nya alai, kita deka dikumbai besalah ketegal darah semua orang ti lurus, ke udah naya ba dunya tu, berengkah ari darah Abel nyentuk ngagai darah Sekariah anak Barakiah, ke udah dibunuh kita ba entara Rumah Sembiang enggau alta.
36 Enggau bendar aku madah ngagai kita: Rebak tu deka diukum ketegal semua dosa nya.
37 “Jerusalem, Jerusalem, nuan munuh bala nabi, lalu nuku orang ke dianjung ngagai nuan ngena batu. Aku suah bendar deka ngempuruka bala anak nuan, baka indu manuk ke ngempuruka anak iya ba baruh sayap iya! Tang nuan enggai.
38 Nya alai, Petara deka ninggalka rumah nuan.*
39 Aku madah ngagai nuan: Berengkah ari diatu, nuan nadai agi meda aku, nyentuk ngagai maya nuan nyebut: ‘Beberekat meh iya ke datai dalam nama Jehovah!’”
Nota Kaki
^ Iya nya, siti kutak ti mit ke bisi ayat Bup Kudus. Kutak tu dikena tuai orang Judah nyadika jimat.
^ Tauka “utai ke dikena nyaga diri!”
^ Tauka “burai; puting.”
^ Tauka “manah.”
^ Tauka “Pengajar.”
^ Jesus enda ngasuh gelar ‘apai’ dikena ngangauka siku-siku orang kena nunjukka pangkat iya ba jalai pengarap. Chunto iya, baka gelar ‘father.’
^ Tauka “nyadi ulun.”
^ Ayat tu nadai ditemu ba sekeda manuskrip ke lama, lalu engka ukai sebagi ari ayat ba Bup Kudus.
^ Peda Penerang Leka Jaku.
^ Iya nya, orang ke ngiring.
^ Rempah ke dikena ba pemakai.
^ Nitihka Adat, enti orang ngumpul 10 bakul utai ke ditanam sida, sebakul patut diberi ngagai Petara.
^ Peda Penerang Leka Jaku.
^ Tauka engka, “rumah nuan deka ditinggalka puang.”
