John 1:1-51
1 Dulu kelia menya, sebedau utai bukai digaga,* Jaku endang udah bisi. Jaku nya enggau Petara, lalu Jaku nya petara.*
2 Iya endang udah enggau Petara kenyau ari pun.
3 Petara ngena iya ngaga semua utai, lalu nadai utai tau bisi enti enda digaga nengah iya.
4 Nengah iya bisi pengidup, lalu pengidup nya penampak ke mensia.
5 Penampak nya manchar dalam pemetang. Tang pemetang enda ulih madamka iya.
6 Bisi siku lelaki ke dianjung nyadi pengari Petara. Nama iya John.
7 Iya datai nyadi saksi ngambika ulih besaksi pasal penampak nya, awakka semua macham orang ulih arap ketegal jaku iya.
8 Iya ukai penampak nya. Tang iya dianjung ngambika meri saksi pasal penampak nya.
9 Penampak ti bendar ke deka manchar ngagai semua macham orang deka datai ke dunya enda lama da agi.
10 Iya kala bisi ba dunya, lalu Petara ngena iya ngaga dunya. Tang dunya enda ngelala iya.
11 Iya datai ngagai menua asal iya. Tang orang ke sama bansa enggau iya enggai nerima iya.
12 Taja pia, semua orang ke nerima iya udah diberi iya hak nyadi anak Petara, laban sida arapka nama iya.
13 Sida enda diadaka ari darah enggau isi tauka ketegal peneka mensia, tang sida iya ada nyadi anak Petara.*
14 Jaku nya nyadi mensia, lalu diau begulai enggau kitai. Kitai udah meda mulia iya, iya nya mulia ke diterima siku anak tunggal ari apai iya. Iya penuh enggau pemanah ati Petara ti besai sereta pemendar.
15 (John udah besaksi pasal iya, lalu enggau nyawa ti inggar John madahka: “Iya meh orang ke disebut aku lebuh aku madahka, ‘Orang ke datai pengudah aku udah dulu ari aku. Laban iya udah bisi sebedau aku.’”)
16 Semua kitai majak nerima pemanah ati ti besai, laban iya penuh enggau pemanah ati ti besai nya.
17 Adat diberi nengah Moses. Tang pemanah ati ti besai enggau pemendar datai nengah Jesus Kristus.
18 Nadai orang kala meda Petara, kelimpah ari anak tunggal Iya ke baka Petara, sereta ke bisi ba sepiak Apai.* Iya nya meh ke udah nerangka pasal Petara ngagai kitai.
19 Tu saksi ke diberi John, lebuh orang Judah nganjung bala imam enggau orang Lewi ari Jerusalem ngambika nanya iya: “Sapa nuan?”
20 Iya nyaut lalu terus terang ngaku: “Aku ukai Kristus.”
21 Nya alai sida nanya: “Enti pia, sapa nuan? Kati nuan tu Elijah?” Iya nyaut: “Ukai.” “Kati nuan tu Nabi ke udah disemayaka nya?” Iya nyaut: “Ukai.”
22 Sida lalu nanya iya: “Sapa nuan deh? Padahka ngagai kami ngambika kami ulih meri saut ngagai orang ke nganjung kami. Terangka ngagai kami sapa nuan.”
23 Ku iya: “Aku tu meh orang ke ngangau enggau nyawa ti inggar ba menua puang, ‘Gaga jalai Jehovah* rurus,’ baka ke udah dipadah Nabi Isaiah.”
24 Bala sida nya dianjung orang Parisi.
25 Sida nanya iya: “Nuan ukai Kristus, Elijah, tauka Nabi ti disemaya nya. Nyadi nama kebuah nuan maptisa* orang?”
26 John nyaut sida: “Aku maptisa ngena ai. Tang iya ke enda dikelala kita bediri ba entara kita.
27 Iya datai pengudah aku, tang aku enda layak muka tali kasut* iya.”
28 Semua utai tu nyadi ba Betani ba seberai Sungai Jordan, endur John maptisa orang.
29 Hari siti, lebuh John meda Jesus datai ngagai iya, ku iya bejaku: “Peda, Anak Bedus Petara ke muai dosa dunya!
30 Iya meh orang ke disebut aku lebuh aku madahka: ‘Orang ke datai pengudah aku udah dulu ari aku. Laban iya udah bisi sebedau aku.’
31 Indah aku pan enda ngelala iya. Tang aku datai maptisa ngena ai, ngambika Israel ulih ngelala iya.”
32 John mega besaksi lalu madahka: “Aku meda kuasa kudus* Petara, ke baka burung achang, nurun ari langit lalu mengkang ba atas iya.
33 Aku pan enda ngelala iya, tang Petara ke nganjung aku ngambika maptisa ngena ai udah bejaku ngagai aku: ‘Lebuh nuan meda kuasa kudus Petara nurun ngagai sesiku orang lalu mengkang ba atas iya, iya meh orang ke deka maptisa ngena kuasa kudus Petara.’
34 Aku udah meda semua nya, lalu aku udah besaksi, iya meh Anak Petara.”
35 Ba hari siti, John benung bediri enggau dua iku murid iya.
36 Lebuh iya meda Jesus mansa, iya lalu bejaku: “Peda, Anak Bedus Petara!”
37 Lebuh dua iku murid nya ninga utai ku iya, seduai iya pan nitihka Jesus.
38 Udah nya, Jesus nguing lalu meda dua iku murid nya nitihka iya. Ku Jesus nanya seduai iya: “Nama utai ke digiga seduai?” Seduai iya nyaut: “Rabbi (reti iya, “Pengajar”), dini nuan diau?”
39 Ku iya nyaut seduai iya: “Enti seduai deka meda, aram nitihka aku.” Seduai iya pan nitihka iya lalu meda dini endur iya diau. Maya nya, kira pukul empat lemai.* Lalu sehari nya, seduai iya diau enggau Jesus.
40 Siku ari dua iku murid ke ninga jaku John lalu nitihka Jesus nya benama Andrew. Iya menyadi Simon Peter.
41 Iya pan terus ngiga menyadi iya Simon, lalu madahka ngagai Simon: “Kami udah tetemuka Messiah” (reti iya, “Kristus”).
42 Udah nya, Andrew mai Simon ngagai Jesus. Lebuh Jesus meda Simon, iya madahka: “Nuan tu Simon anak John. Nuan deka dikumbai Kefas” (iya nya, “Peter” dalam jaku Gerika).
43 Hari siti, Jesus deka mupuk ngagai Galili. Udah nya, Jesus betemu enggau Philip lalu madah ngagai iya: “Nyadi murid aku.”
44 Philip datai ari Betsaida, menua asal Andrew enggau Peter.
45 Philip betemu enggau Natanel lalu madahka: “Kami udah tetemuka orang ke disebut dalam Adat Moses enggau Ajar Sida Nabi. Orang nya Jesus anak Josep, ke datai ari Nasaret.”
46 Tang Natanel madah ngagai iya: “Kati ulih utai ti badas datai ari Nasaret?” Ku Philip madahka: “Aram meh, ngambika nuan empu ulih meda.”
47 Lebuh Jesus meda Natanel mansang ngagai iya, ku Jesus bejaku pasal iya: “Peda, iya tu orang Israel ti bendar. Iya nadai nemu ngelakar.”
48 Ku Natanel nanya iya: “Baka ni ku nuan ngelala aku?” Ku Jesus nyaut: “Aku endang udah meda nuan ba baruh pun kayu ara nya tadi, sebedau Philip ngangauka nuan.”
49 Ku Natanel madahka: “Rabbi, nuan amat Anak Petara, nuan Raja orang Israel.”
50 Ku Jesus madah ngagai iya: “Kati nuan arap laban aku udah madahka, aku udah meda nuan ba baruh pun kayu ara nya tadi? Nuan deka meda utai ti besai agi ari nya.”
51 Ku Jesus agi: “Enggau bendar aku madah ngagai semua kita: Kita deka meda langit tebuka sereta meda bala melikat Petara nurun-niki ari serega ngagai Anak Mensia.”
Nota Kaki
^ Jaku Asal, “Ba pun iya kelia.”
^ Tauka “Jaku nya baka Petara.”
^ Jaku Asal, “ada ari Petara.”
^ Tauka “dada Apai.” Reti iya, iya nyadi orang ti dikesayau.
^ Peda nota kaki ba Matthew 1:20.
^ Tauka “nyepuhka; nyelamka.”
^ Tauka “sandal.”
^ Peda Penerang Leka Jaku.
^ Jaku Asal, “jam ke-10.”
