Petara nentuka seks nya semina ba seiku lelaki enggau seiku indu ti udah jadi. (Pemungkal 1:27, 28; Adat Lewi 18:22; Jaku Dalam 5:18, 19) Bup Kudus nagang seks ba entara orang ke ukai laki bini, sekalika nya ba entara lelaki enggau lelaki tauka indu enggau indu. (1 Korint 6:18) Tu nyengkaum pengawa seks, megai organ seks orang bukai, enggau seks oral.

 Taja pan Bup Kudus nagang pengawa homoseksual, tang ukai reti iya kitai patut begedi tauka takut ngagai homoseksual. Tang, orang Kristian diasuh ‘bebasaka semua orang.’—1 Peter 2:17.

 Kati seseiku orang endang udah diadaka homoseksual?

Bup Kudus nadai madah pasal genetik orang ke bisi pengingin homoseksual, tang semua kitai endang diadaka enggau pengingin ti deka ngelaban ukum Petara. (Rome 7:21-25) Bup Kudus nagang pengawa homoseksual, ukai beberatka pasal pun kebuah homoseksual nyadi.

 Baka ni kitai ulih ngelantangka ati Petara enti kitai dekaka orang ke sama penempa?

Bup Kudus madah, “bunuh semua pengingin dunya ti dalam kita, baka: pengawa bambai, ulah ti kamah”. (Kolosi 3:5) Ngambi ulih munuh pengingin ti salah ke ngujungka nuan ngereja utai ti salah, nuan patut nagang runding diri. Enti nuan ngisi runding diri enggau utai ti badas, senang agi ke nuan nulak pengingin ti salah. (Pilipi 4:8; James 1:14, 15) Keterubah, nuan tusah ngereja nya, tang nyau kelama, nya deka nyadi senang agi. Petara besemaya deka nulung nuan ngembuan ati enggau runding ti baru.—Epesus 4:22-24.

 Bejuta iku orang ke deka nitihka standard Bup Kudus, mega benung belaban enggau pengingin seks ke sama penempa, iya nya heterosexual. Chunto iya, bisi orang ke agi bujang tauka dara tusah deka ngiga kaling pengidup ti ngena, tauka orang ke udah kawin tang kaling sida enda ulih bisi seks enggau sida. Taja pan sida bisi penguji, sida milih deka nagang pengingin seks diri, lalu agi ulih idup lantang. Orang ke benung ngelaban pengingin seks ke sama penempa, mega ulih ngereja tu enti sida amat deka ngelantangka ati Petara.—Ulang Adat 30:19.