Semina sekali aja Bup Kudus bisi nyebut pasal pantang ba Adat Lewi 19:28: “Anang ngaga ukir ba tubuh kita.” Petara meri ukum tu ngagai bansa Israel, kena ngemidaka sida enggau bansa bukai ke ngurik tubuh diri enggau nama tauka tanda petara sida. (Ulang Adat 14:2) Taja pan orang Kristian enda nitihka ukum ke kala diberi ngagai bansa Israel, tang prinsip tu agi patut dikemeratka.

Kati ulih orang Kristian ngaga pantang?

 Ayat Bup Kudus tu nulung nuan berunding pekara tu enggau dalam:

•   ‘Sida ke indu . . . ukai kelalu balat gaya.’ (1 Timoti 2:9) Prinsip tu patut dititihka lelaki enggau indu. Kitai patut bebasaka ati orang bukai, ukai semina berundingka diri empu.

•   Sekeda orang ngaga pantang ketegal deka nunjukka diri bisi runding diri empu, tauka sida nunjukka diri enda begunaka tulung sesapa. Bisi mega nunjukka diri bisi hak ngereja sebarang utai ngagai tubuh diri. Taja pia, Bup Kudus ngelalau orang Kristian, ‘nyerahka tubuh kita nyadi pemeri ti kudus, ti dikerinduka Petara.’ (Rome 12:1) Perundingka meh enggau dalam kebuah nuan ngaga pantang. Enti nuan semina deka nitihka orang bukai tauka diterima ba sesiti raban, kingatka meh, ati nuan ulih berubah tang pantang ke udah digaga enda ulih diubah tauka dibuai enggau senang. Ari meresa diri empu, nuan ulih ngaga pemutus enggau manah.—Jaku Dalam 4:7.

•   “Bejimat lebuh nuan ngaga pelan, nya baru nuan deka bulih mayuh utai. Enti nuan kelalu beguai-guai ngereja utai, nuan nadai kala chukup utai.” (Jaku Dalam 21:5) Kesuah iya, pemutus deka ngaga pantang digaga enggau beguai-guai. Tang pantang ke digaga nya deka lekat lama tauka belama iya. Tu ulih ngachau runding orang bukai pasal nuan tauka nuan pedis deka bulih peluang kereja. Nambahka nya, nuan begunaka belanja ti besai sereta ngetatka diri pedis enti nuan deka muai pantang ke udah digaga. Nitihka pansik, orang ke bedagang ba pengawa bebuaika pantang majak untung. Tu nunjukka mayuh orang nesal pengudah sida ngaga pantang.