Bup Kudus meri kitai iring ti amat manah kena ngaga pemutus. Iya nulung kitai ngulihka “penemu-dalam enggau runding ti dalam.” (Jaku-Dalam 4:5) Ba sekeda kes, iya madahka ke kitai pemutus ti pemadu manah. Ba kes ti bukai, iya meri iring ngambika ulih dikena ngaga pemutus ti manah.

Ba artikel tu

•  Tip ke ulih nulung nuan ngaga pemutus ti manah

•  Patut aku ngubah pemutus ke udah digaga?

•  Baka ni enti aku enda ulih ngubah pemutus ke enda manah?

•   Anang beguai ngaga pemutus. Bup Kudus madah: “Orang ke pintar deka nyingkang enggau bejimat.” (Jaku-Dalam 14:15) Enti nuan beguai ngaga pemutus, nuan engka enda beratika utai ti penting agi. Berunding meh enggau manah pasal pemutus ke deka digaga.—1 Tesalonika 5:21.

•   Anang ngaga pemutus semina bepelasarka emosi enggau runding nuan aja. Bup kudus nangkan kitai enda ulih seruran pechayaka ati kitai. (Jaku-Dalam 28:26; Jeremiah 17:9) Ambika chunto, kitai engka enda ulih ngaga pemutus ti manah lebuh maya kitai ringat, berasai ditekan, asa ati, enda sabar tauka kelalu lelak.—Jaku-Dalam 24:10; 29:22.

•   Sampi minta penemu-dalam. (James 1:5) Petara rindu ati nyaut sampi ke baka tu. Iya seiku Apai ti pengibuh, ke deka bala anak iya nyeliahka mayuh penanggul. “Penemu-dalam nya utai ti diberi Jehovah. Penemu enggau pemereti ati endang datai ari Iya.” a (Jaku-Dalam 2:6) Iya meri penemu-dalam nengah jaku Iya, Bup Kudus.—2 Timoti 3:16, 17.

•   Ngaga Pansik. Kena ngaga pemutus ti manah, nuan begunaka penerang ke ulih dikearapka. Baka ke dipadah Bup Kudus, “Jaku-dalam tu tau nambahka penemu orang ke endang bepenemu-dalam.” (Jaku-Dalam 1:5) Dini nuan ulih tetemuka penerang ke bekaul sereta ulih dikarapka?

   Keterubah iya, pansik meh Bup Kudus ke bekaul enggau pemutus ke diperundingka. Laban Penempa kitai nemu utai ti pemadu manah ke kitai, lalu jaku Iya ngundan jaku lalau ti amat ulih dikearapka. (Jaku-Dalam 25:12) Ba sekeda pemutus, Bup Kudus meri iring ti chukup terang, baka ngena adat tauka pesan. (Isaiah 48:17, 18) Ba pekara bukai, Bup Kudus nadai madah enggau nyemetak. Tang, iya bisi meri iring nengah mayuh prinsip ti manah. Tu ulih ngiring kitai ngaga pemutus ti manah, taja pan pemutus tiap iku kitai enda sama. Kena ngiga penerang ari Bup Kudus, pansik meh artikel tauka publikasi ke bepelasarka Bup Kudus, ambika chunto litaricha ke bisi ba laman web tu. b

   Ba sekeda pemutus, nuan engka patut meresa ba penerang ti tau dipechaya. Ambika chunto, sebedau meli sesiti utai—kelebih agi utai ke mar—manah enti nuan meresa utai ke dibeli sereta sapa ke ngaga, nyengkaum polisi baka waranti enggau atur enti sema utai ke dibeli nya rusak. Endang amat, nuan patut nentuka penerang bekaul enggau utai ke dibeli nitih ke deka nuan.

   Bup Kudus madah: “Enti nuan nadai bulih jaku lalau, pengawa nuan deka puntan.” (Jaku-Dalam 15:22) Nya alai sebedau ngaga pemutus, betanya ngagai orang ke tau dikarapka. Ambika chunto, manah enti nuan nanya siku lutur pasal pemutus bekaul enggau pekara berubat. (Matthew 9:12) Ba sekeda situasi, nuan ulih berandau enggau orang ke kala napi utai ti sama enggau nuan. Kingatka meh, iya kebendar, iya nya nuan—ukai orang ke endur nuan betanya—ke deka ngaga pemutus lalu nerima asil nya.—Galatia 6:4, 5.

•   Perundingka semua fakta. Bepelasarka penerang ke udah dikembuan, nuan deka ngaga siti lis ke ulih dipilih pasal penguntung enggau penusah ba tiap iti pemutus. Udah nya, perundingka enggau jujur, nama asil tauka kesan ke engka nyadi ari pemutus ke digaga. (Ulang-adat 32:29) Ambika chunto, baka ni pemutus nuan meri empas ngagai nuan, kita sebilik, tauka orang bukai? (Jaku-Dalam 22:3; Rome 14:19) Enti nuan belematika tanya tu sereta berundingka ajar Bup Kudus, nuan deka ngaga pemutus ti bepenemu-dalam enggau bepengerindu.

•   Ngaga Pemutus. Kekadang, kitai engka betangguh ngaga pemutus ketegal kitai kakang ati ngagai pemutus nya. Tang enti kitai enda ngaga pemutus, kitai engka lenyau peluang tauka penusah ulih nyadi ba kitai. Pandakka jaku, enti enda ngaga pemutus, nya beli agi ari ke ngaga pemutus ti salah. Baka sempama orang ke betanam, Bup Kudus madah: “Enti nuan nganti hari enggau ribut ti ngena, nuan enda tetanamka utai, lalu nuan nadai utai diketau.”—Pengajar 11:4.

 Kingatka, pemutus ke manah ukai reti nya patut sempurna. Kesuah agi, maya kitai milih siti utai, kitai patut ngelengkaka utai bukai. Pia mega, utai ke enda disadang engka nyadi. (Pengajar 9:11) Nyadi kena meh penerang ti manah ke dikembuan nuan, lalu pilih chara ke tau ulih mai pemujur.

 Ukai semua pemutus enda ulih diubah. Situasi nuan engka berubah, tauka nuan engka tetemuka pemutus ke udah digaga mai empas ti enda disangka. Nya alai, manah enti nuan berunding baru sereta milih chara ke tau ulih mai pemutus ti mujur.

 Taja pia sekeda pemutus enda ulih diubah. (Masmur 15:4) Ambika chunto, Petara dekaka laki bini ngetankan semaya sida lebuh sida kawin. c (Malaki 2:16; Matthew 19:6) Lebuh bisi penanggul nyadi, sida enda patut ngerarika diri ari penanggul nya tang sida patut enggau naka ulih mutarka nya.

 Bisi maya kitai ngaga pemutus ti enda entu manah. (James 3:2, nota kaki) Kitai engka berasai nesal tauka besalah lalu tu utai ke biasa. (Masmur 69:5) Amat, asai ati ke baka nya ulih nulung kitai nyeliahka diri ari ngaga pemutus ti enda manah agi (Jaku-Dalam 14:9) Bup Kudus ngelalau kitai ambika enda kelalu berasai besalah, laban tu ulih ngasuh kitai kelalu tusah ati. (2 Korint 2:7) d Bup Kudus madah: “Jehovah endang kasih sereta rindu.” (Masmur 103:8-13) Nyadi belajar meh ari pemutus ti enda manah ke digaga nuan, lalu ngereja utai ke ulih nuan kena ngaga pemutus ti manah agi ila.