Perang Armagedon nya perang ti penudi entara perintah mensia enggau Petara. Indah diatu, perintah mensia enggau orang ke nyukung sida ngelaban Petara sereta enggai ngasika Iya. (Masmur 2:2) Perang Armagedon deka ngujungka semua perintah mensia.​—Daniel 2:44.

 Leka jaku “Armagedon” ayan sekali aja ba Bup Kudus, iya nya ba Pemandang 16:16. Jaku benabi tu madahka, ba “endur ke dikumbai Armagedon dalam jaku Hebrew,” “bala raja ba serata dunya” deka digempuruka “ngagai perang ke nyadi maya hari besai Petara ti Pemadu Bekuasa.”​—Pemandang 16:14.

 Sapa deka enggau perang Armagedon? Jesus Kristus deka nguluka seraban soldadu ba serega lalu sida deka ngalahka bala munsuh Petara. (Pemandang 19:11-16, 19-21) Bala munsuh Petara tu nyengkaum orang ke ngelaban hak Petara merintah sereta enda bebasaka Iya.​—Esekiel 39:7.

 Kati perang Armagedon amat-amat deka nyadi ba Timur Tengah? Enda. Perang Armagedon ukai semina nyadi ba siti endur aja, tang deka bisi ba serata dunya.​—Jeremiah 25:32-34; Esekiel 39:17-20.

 Armagedon, kekadang ditulis “Har–Magedon” (jaku Hebrew Har Meghiddohnʹ), lalu mai reti “Bukit Megido.” Ba jeman kelia bisi siti kuta ke dikumbai Megido ba menua Israel. Dalam sejarah, bisi perang ti penting ke nyadi ba dia, nyengkaum sekeda perang ke ditulis dalam Bup Kudus. (Pengulu 5:19, 20; 2 Raja 9:27; 23:29) Taja pia, Armagedon ukai merujuk ngagai endur ke semak kuta Megido kelia. Nadai bukit ti besai ba dia, lalu indah semua Lebak Jesril pan enda chukup besai alai semua munsuh Petara begelumu lalu beperang ngelaban Petara. Armagedon merujuk ngagai maya semua bala politik ba serata dunya begempung kena ngelaban Perintah Petara kena kali ti penudi.

 Baka ni gaya perang Armagedon? Taja pan kitai enda nemu baka ni Petara deka ngena kuasa Iya maya nya ila, kitai ulih meda chara Iya ngena kuasa Iya suba lebuh Iya mantaika ujan batu, tanah berenyang, bah, api, kilat enggau penyakit, lalu Iya ulih ngena chara nya baru. (Jop 38:22, 23; Esekiel 38:19, 22; Habakuk 3:10, 11; Sekariah 14:12) Sekeda ari munsuh Petara deka charut datai ke sida nyau bebunuh pangan diri, tang sida deka nemu, kebendar iya Petara meh ke belaban enggau sida.​—Esekiel 38:21, 23; Sekariah 14:13.

 Kati Armagedon nya mai pengujung dunya? Planet bumi enda anchur maya perang Armagedon, laban Petara udah meri bumi tu ngagai mensia nyadika endur kitai diau belama iya. (Masmur 37:29; 96:10; Pengajar 1:4) Armagedon ukai deka ngemunaska mensia, tang deka nyelamatka mensia. Maya nya, “seraban orang ti mayuh” ke nyembah Petara deka selamat.​—Pemandang 7:9, 14; Masmur 37:34.

 Kekadang, Bup Kudus ngena leka jaku “dunya” kena madahka pasal sida ke ngelaban Petara. (1 John 2:15-17) Nyadi Armagedon ulih dikumbai mai “pengujung dunya” laban orang ke ngelaban tu deka dipunaska maya nya.​—Matthew 24:3.

 Kemaya perang Armagedon deka datai? Ku Jesus: “Nadai orang nemu hari enggau jam iya. Melikat ke ba serega enda nemu. Indah Anak pan enda nemu. Semina Apai aja nemu.” (Matthew 24:21, 36) Taja pia, Bup Kudus bisi madahka Armagedon deka nyadi dalam timpuh ke dikumbai “maya Anak Mensia [Jesus] pulai baru,” lalu timpuh nya berengkah kena taun 1914.​—Matthew 24:37-39.