Dalam Bup Kudus, leka jaku “pengangkat ari mati” datai ari jaku Gerika a·naʹsta·sis ke mai reti “angkat” tauka “bediri baru.” Pengudah seseiku orang diangkatka ari mati, iya deka nyadi orang ti sama baka ke sebedau iya mati.—1 Korint 15:12, 13.

 Taja pan leka jaku “pengangkat ari mati” nadai kala dipeda ba jaku Hebrew, ke dikumbai Sempekat Lama, tang ajar pasal pengangkat ari pemati bisi disengkaum ba dia. Ambika chunto, Isaiah madahka: “Bala kami ke udah mati, deka idup baru! Bangkai sida deka idup baru. Semua sida ke tinduk dalam kubur deka dani lalu belagu gaga ati.”—Jop 14:13-15; Isaiah 26:19; Daniel 12:2, 13.

 Dini endur orang ke deka diangkatka idup baru nya? Bisi sekeda orang deka diangkatka ngagai serega lalu merintah nyadi raja begulai enggau Jesus. (2 Korint 5:1; Pemandang 5:9, 10) Dalam Bup Kudus ngumbai pengangkat ari pemati tu “diangkatka ari mati ti keterubah”. Tu nunjukka bisi pengangkat ari mati ke bukai deka nyadi. (Pemandang 20:6) Pengangkat ke siti da agi nya, pengangkat ari mati ke mayuh orang ti deka diidupka baru ba dunya.—Masmur 37:29

 Baka ni sida diangkatka ari mati? Petara meri Jesus kuasa kena ngangkatka orang ari mati. (John 11:25) Jesus deka ngangkatka semua orang ke dikingatka Petara “pansut ari kubur,” lalu sida deka diidupka baru enggau ulah sereta pengingat ti sama. (John 5:28, 29) Orang ke diangkatka ngagai serega deka diangkatka enggau tubuh roh, tang orang ke deka diangkatka idup baru ba dunya deka ngembuan tubuh ti gerai, kering sereta nadai penimpang.—Isaiah 33:24; 35:5, 6; 1 Korint 15:42-44, 50.

 Sapa ke deka diangkatka idup baru? Bup Kudus madahka, Petara deka ngangkatka “semua orang ke lurus enggau ke enda lurus.” (Kereja Rasul 24:15) Orang ke lurus nya nyengkaum Noah, Sarah, enggau Abraham. (Pemungkal 6:9; Hebrew 11:11; James 2:21) Orang ke enda lurus nya nyengkaum orang ke enda nitihka standard Petara laban sida nadai peluang belajar sereta ngasika ajar dalam Bup Kudus.

 Tang, orang ke amat jai nyentukka sida tentu enda ulih berubah, nadai nerima peluang pengangkat ari mati tu. Pengudah sida mati, sida deka punas sereta nadai pengadang deka diidupka baru.—Matthew 23:33; Hebrew 10:26, 27.

 Kemaya orang ke udah mati diangkatka idup baru? Bup Kudus madahka, pengangkat ari mati ngagai serega deka nyadi pengudah Kristus merintah, iya nya berengkah ari taun 1914. (1 Korint 15:21-23) Pengangkat ari mati ba dunya deka nyadi maya Jesus Merintah Seribu Taun, iya nya maya dunya tu berengkah nyadi Paradais.—Luke 23:43; Pemandang 20:6, 12, 13.

 Nama kebuah kitai ulih pechayaka ajar pasal pengangkat ari mati? Dalam Bup Kudus ngembuan mayuh penerang ti silik pasal semilan iti cherita pengangkat ari mati ke kala nyadi, lalu tiap iti utai ke nyadi nya bisi orang meda. (1 Raja 17:17-24; 2 Raja 4:32-37; 13:20, 21; Luke 7:11-17; 8:40-56; John 11:38-44; Kereja Rasul 9:36-42; Kereja Rasul 20:7-12; 1 Korint 15:3-6) Cherita pasal Lasarus ke diangkatka ari mati nya pemadu ngalitka ati, laban Lasarus udah mati pengelama empat hari lalu utai ke nyadi nya dipeda mayuh orang. (John 11:39, 42) Indah bala munsuh Jesus pan enda ulih nyakal pengawa Jesus ke ngangkatka Lasarus ari mati nya. Nya kebuah sida beaum deka munuh Jesus enggau Lasarus.—John 11:47, 53; 12:9-11.

 Bup Kudus madahka, Petara bisi penau sereta deka ngangkatka orang ari mati. Pengingat sereta kuasa ari Petara nadai tatak. Iya ulih ingatka semua utai pasal tiap iku orang ke deka diangkatka Iya idup baru. (Jop 37:23; Matthew 10:30; Luke 20:37, 38) Petara endang ulih ngangkatka orang ari mati, lalu Iya mega deka ngereja nya! Dalam Bup Kudus bisi ngambarka asai ati Petara pasal ngelaluka orang ke deka diangkatka Iya idup baru: “Nuan deka gaga ati ke aku, ti udah digaga Nuan.”—Jop 14:15.

Penemu ti salah pasal pengangkat ari mati

 Penemu mayuh orang: Lebuh pengangkat ari mati nyadi, seput enggau tubuh iya deka begulai baru.

 Fakta: Bup Kudus madahka seput reti nya tubuh ti idup. Bup Kudus nadai madahka bisi utai dalam tubuh ke mengkang idup, pengudah orang nya mati. (Pemungkal 2:7; Esekiel 18:4) Lebuh orang diangkatka idup baru, seput enggau tubuh iya enda disegulaika baru. Tang, iya diberi tubuh ti idup.

 Penemu mayuh orang: Sekeda orang diangkatka idup baru lalu dipunaska tekala nya.

 Fakta: Bup Kudus madahka “orang ke udah ngereja penyai” deka “diangkatka idup baru lalu diukum.” (John 5:29) Tang, sida deka diakim bepanggai ba utai ke digaga sida pengudah sida diangkatka idup baru, ukai sebedau sida diangkatka. Ku Jesus: ‘Orang ke mati deka ninga nyawa Anak Petara, lalu orang ke ninga nyawa nya deka idup.’ (John 5:25) Orang ke deka “ninga”, tauka ngasika utai ke udah dipelajarka sida pengudah sida diangkatka idup baru, nama sida deka ditulis ba “bup pengidup.”—Pemandang 20:12, 13.

 Penemu mayuh orang: Maya orang diangkatka idup baru, sida deka nerima tubuh ti sama baka ke sebedau iya mati.

 Fakta: Pengudah mati, tubuh orang nya deka anchur sereta luluh.—Pengajar 3:19, 20.