Enda. Petara enda kala nentuka pemati seseiku orang. Iya ke bendar, dalam Bup Kudus bisi ngajar pemati nya nyadi ketegal “utai ti jai endang tau nyadi ba genap iku orang.”—Pengajar 9:11.

Ukai enda Bup Kudus bisi madah, ‘maya mati nya udah diletak’?

 Amat, ba bup Pengajar 3:2 bisi madah, “Iya ngeletak maya ada, enggau maya mati, maya betanam, enggau maya ngetau”. Iya ke bendar, batang ajar ba ayat tu nunjukka Bup Kudus benung nyebut pasal utai ke nyadi ba dunya tu. (Pengajar 3:1-8) Petara enda ngeletak kemaya kitai mati, sama baka Iya enda kala nentuka kemaya seiku orang ke bumai patut nanam padi. Iya ke amat, ayat nya meransang kitai enda kelalu kisuk enggau pengawa ninting hari, nyentukka kitai enda ingatka tanggungjawap diri ngagai Penempa kitai.—Pengajar 3:11; 12:1, 13.

Umur mensia ulih dipanjaika

 Taja pan kitai enda nemu baka ni pengujung iya pengidup diri, tang umur kitai ulih panjai agi enti kitai ngaga pemutus enggau betul. Bup Kudus madah, “Jaku ajar ari orang ke bepenemu-dalam, nya pun pengidup. Jaku ajar nya deka nulung nuan ngerarika diri lebuh nuan ditempuh utai ti tau nganu nyawa.” (Jaku Dalam 13:14) Sama mega, Moses madahka orang Israel sida deka “panjai umur” enti sida ngasika pesan Petara. (Ulang Adat 6:2) Tang, kitai deka pandak umur enti kitai ngereja utai ti jai tauka utai ti ulih ngemediska diri empu.—Pengajar 7:17.

 Taja pia, enda ngira ni pemintar kitai, tauka ni pemendar kitai bejimat, kitai tetap enda ulih rari ari pemati. (Rome 5:12) Tang, utai ti ngenusahka ati tu deka berubah. Laban Bup Kudus bisi semaya ba jemah ila, “pemati nadai agi”.—Pemandang 21:4.