Orang Kristian nemu, Jesus mati ketegal deka nebus dosa mensia. (1 Peter 3:18) Tang, semina nemu Jesus nya penyelamat enda chukup ngambika ulih selamat. Indah, bala antu pan nemu Jesus nya ‘Anak Petara.’ Tang sida enda ulih diselamatka. Sida deka dipunaska.—Luke 4:41; Jude 6.

•  Nama patut digaga aku ngambi ulih selamat?

•  Kati sampi ti spesial ulih nyelamatka kitai?

•  Baka ni enggau asal ‘sampi orang ke bedosa’?

•   Nuan patut pechaya, Jesus udah nyerahka nyawa iya kena nebus dosa kitai. (Kereja Rasul 16:30, 31; 1 John 2:2) Reti iya, kitai mega patut pechaya, Jesus nya amat-amat bisi. Lalu semua utai ke dipadahka dalam Bup Kudus pasal iya nya enda bula.

•   Belajarka Bup Kudus. (2 Timoti 3:15) Ba Bup Kudus, rasul Paul enggau Silas kala madah ngagai orang ke nyaga rumah jil, ‘Arapka Jesus, lalu nuan deka diselamatka.’ Udah nya, Paul enggau Silas pan belabuh ngajar iya “jaku Jehovah.”  a (Kereja Rasul 16:31, 32) Reti iya, orang ke nyaga rumah jil ulih pechayaka Jesus enti iya bisi penemu pasal Bup Kudus. Iya patut bulih penemu ti betul ari Bup Kudus.—1 Timoti 2:3, 4.

•   Nesal ati. (Kereja Rasul 3:19) Nuan mega patut amat nesal ati enggau ulah sereta penyalah diri. Penesal ati nuan ulih dipeda, enti nuan badu ngereja penyalah ke dipegedika Petara. Kelimpah ari nya, nuan mega patut ‘ngereja utai ti nunjukka nuan amat udah nesal ati.’—Kereja Rasul 26:20.

•   Dibaptisa. (Matthew 28:19) Jesus kala madah, orang ke deka nyadi murid iya patut dibaptisa. (Kereja Rasul 16:33) Orang ke nyaga rumah jil nya tadi pan dibaptisa. Pia mega, pengudah rasul Peter ngajar mayuh orang pasal Jesus, “Sida ke arapka pesan iya, lalu dibaptisa.”—Kereja Rasul 2:40, 41.

•   Ngasika Jesus. (Hebrew 5:9) Nuan patut “ngasika semua pesan” Jesus. Nya alai, dalam semua pengawa nuan, tunjukka meh nuan nya amat murid iya. (Matthew 28:20) Iya ke pemadu beguna nya, “anang semina mendingka jaku nya, lalu nipu diri empu. Kereja utai ti diasuh jaku nya.”—James 1:22.

•   Betan nyentukka ujung. (Mark 13:13) Murid Jesus patut ngembuan “ati ti tan” ngambi ulih selamat. (Hebrew 10:36) Baka rasul Paul, kenyau ari iya nyadi orang Kristian nyentukka iya mati, iya seruran ngasika ajar Jesus, sereta tetap ati ngagai Petara.—1 Korint 9:27.

 Ba sekeda pengarap, bisi sampi spesial ke dikumbai “Sampi Orang ke Bedosa” tauka “Sampi Ngambi Diselamatka.” Ba sampi ke baka tu, kesuah iya orang nya ngaku dosa diri, lalu sida madahka diri arapka Jesus, ngambi dosa sida diampun. Sida mega minta Jesus datai ngagai ati enggau pengidup sida. Tang sampi ke baka nya, nadai kala dipadahka dalam Bup Kudus.

 Bisi mega ngumbai, orang ke nyebut sampi tu tentu selamat. Tang iya ke bendar, nadai orang ulih selamat enti semina nyebut sampi nya aja. Tang Jesus ngajar murid iya, terus besampi minta ampun, laban kitai ngaku diri enda sempurna, sereta selalu ngereja penyalah. (1 John 1:8) Nambahka nya, sekeda orang Kristian ke ngetu nyembah Petara kelia, mega enda ulih diselamatka.—Hebrew 6:4-6; 2 Peter 2:20, 21.

 Pakar sejarah ngembuan penemu ti enda sama. Bisi ke madah, mensia berengkah besampi baka nya ba jeman Reformasi Protestan (ke berengkah kenyau ari taun 1517). Bisi mega ke madah, “Sampi Orang ke Bedosa” berengkah maya mayuh pengarap ti baru ditumbuhka, kena taun 1700-an ngagai 1800-an. Tang ari semua tu kitai ulih nyimpulka, sampi ke baka tu ukai datai ari ajar Bup Kudus. Indah, Bup Kudus ngajar, kitai enda patut ngulang sampi enggau enda berunding. Sampi patut datai ari ati.